Gedagtes vir elke dag
Of lees almal by Gedagtes vir elke dag
Elke ras wat toelaat dat sy bloed vermeng raak, verdien om ten gronde te gaan soos elke beskawing in die verlede wat van hul oorspronklike rassesamestelling afstand gedoen het en tot niet gegaan het. Hulle het geval omdat hulle dit wat vir hulle kosbaar moes wees, nie opgepas het nie.
MAAR EK EN MY HUIS...
... ONS SAL DIE HERE DIEN
Hannes Ollewagen
Josua 24:1 – 33
Wanneer ons verse 2 – 12 van die gelese gedeelte bestudeer, sien ons duidelik hoe die volk herinner word aan al die weldade wat God aan hulle en hul voorgeslagte bewys het en word hul gedwing om opnuut tot die besef te kom hoe God nie net sy liefde vir hul in Woorde uitdruk nie, maar dat hulle dit in werklikheid kon beleef!
Is dit nie wonderlik dat ons volk dieselfde kan getuig nie? Behalwe vir die wonderwerke van die Groot Trek, Vryheidsoorloë, ens., hou ons (behoudendes) al vir bykans 180 jaar elke jaar 'n Geloftefees oor die wonderwerk wat God aan ons volk bewys het – so 'n oorweldigende groot wonderwerk, dat dit deur die eeue heen nog nooit vergeet is nie! Daardeur kon ons volk beleef dat God nie net beloftes aan ons maak nie, maar dat Hy ‘n werklikheid in ons lewens is, ons liefhet, ons gebede verhoor en ons uitred!! Waarom is daar dan enigsins twyfel dat Hy wél bestaan? Ons het Hom dan al by meer as een geleentheid as ‘n werklikheid ervaar!
Ons wat weet dat ons God se kinders is, besef ook dat ons ‘n verantwoordelikheid het om te leef soos kinders van die Enigste God van hemel en aarde, nie waar nie? Wat verwag ons Vader wel van ons? Vers 14: “Vrees dan nou die Here en dien Hom in opregtheid en waarheid …” Dat ons Hom moet vrees en dien in OPREGTHEID en waarheid. Dit help dus nie ek volg nuttelose tradisies en gewoontes deur onder andere elke Sondag in 'n kerk te sit waar God nie meer die Oppergesag is en Hy lankal nie meer gevrees word nie. Dit help nie ek onderhou mensgemaakte wette slaafs om God se guns te probeer wen nie. Die Woord sê uitdruklik – dit is tyd vir deeglike selfondersoek. Ken ek God? En het ek Hom lief? Het ek Hom OPREG lief? Het ek Hom WAARLIK lief? Hierdie is dieselfde vraag wat driemaal gevra word, juis omdat dit so uiters, uiters belangrik is. As ek God nie liefhet nie, sal my menslike “geloofstradisies” my t.o.v. my ewige saligheid NIKS baat nie.
Het ek God lief bo ALLES in my lewe? Is ek bereid om enigiets in my lewe prys te gee wat my van Hom afvallig sal maak? Dit is baie duidelik in hierdie gedeelte dat ons nie ander mense kan dwing om God lief te hê en te aanbid nie, soos wat Josua die volk ook nie gedwing het nie, maar ‘n vrye keuse gegee het of hul God wil dien of nie. So moet dit ook vir elkeen van ons wees. Ons kan nie ander dwing om vir God te kies nie, maar dit is ons plig, om nie saam met die menigtes, van God weg te dwaal nie. Wanneer ander kies om agter die wêreld aan te gaan, moet ons ook gedryf word deur ons liefde vir God, om hul te laat gaan (natuurlik nie sonder die nodige vermaning en berisping nie), al is hulle vir ons hoe lief en dierbaar, maar dit duidelik te maak dat ons by God sal bly. Dat ek die Here sal BLY DIEN. “…maar ek en my huis, ons sal die Here dien.” (Vers15).
Wanneer ons vandag voor die vrye keuse te staan kom om te kies tussen die wêreld en God, wat sal ons keuse wees? Sal ons ook die regte keuse maak, soos die volk in vers 18 gemaak het? “…Ook ons sal die Here dien, want Hy is onse God.” Of sal Mammon, die sportgod en die “verafgoding van my kinders” die oorhand oor my keuse kry? Wanneer dit gebeur, moet ons nie verbaas wees wanneer ons dieselfde antwoord kry as wat die volk Israel in vers 19 gekry het nie - dat ons nie God kan dien saam met ons afgode nie: dit is òf die afgode òf God! Daar is nie plek vir albei nie. Jy word nie gedwing om van jou afgode af te sien nie, jy moet net nie verwag dat God deel moet wees daarvan nie. Jy moet KIES. Ons kan God nie dien soos en wanneer dit ons pas nie, want dit is nie Godsdiens nie – dit is presies die teenoorgestelde, nl. die sienswyse dat God by my moet inpas. Gelukkig vir die mensdom, laat God Hom nie voorskryf nie. As jy dus ‘n god soek wat by jou lewe en skedule inpas – en daar is baie - staan dit jou vry om hom te aanbid – jy kan hom selfs benoem soos wat jy goeddunk – jy moet net weet dat jy nie die Waaragtige God ook kan dien wanneer jy afgode aanbid nie. Wanneer jy dan kies om die Ware God te aanbid, sal jy by sy reëls aanpas en jou lewe daarvolgens inrig.
Vers 23: “Verwyder dan nou die vreemde gode wat onder julle is, en neig julle hart tot die Here, die God van Israel.” Is dit nie tyd dat ons deeglike ondersoek in ons lewens instel om seker te maak dat ons besig is met ware Godsdiens in ons daaglikse lewens nie? En om alles in ons lewens te verwyder wat verhoed dat ek my God waarlik ken en ‘n opregte verhouding met Hom het?
Hopelik sal ek en u dan ook vandag kan antwoord na aanleiding van ons keuse: “…Ons sal die Here onse God dien en na sy stem luister.” (Vers 24)