Gedagtes vir elke dag
Of lees almal by Gedagtes vir elke dag
Ons Afrikanervolk kan nie vandag roem op 'n geskiedenis van verstandigheid en harte wat aan die geloof van reg en verkeerd vasgehou het nie. As ons het, sou ons nie vandag in ons eie land verkneg gewees het onder 'n ateïstiese swart owerheid nie.
Die twee Emmaüsgangers was so teleurgesteld dat Jesus dood is omdat hulle gedink het Hy sal die Een wees wat die volk Israel gaan red, en hulle het nie besef Hy het opgestaan en praat nou self met hulle nie want hulle het nie aan die beloftes van sy opstanding vasgehou nie. Daarop het Jesus aan hulle gesê het "o Onverstandiges, met harte wat traag is om te glo alles wat die profete gespreek het!" Bid dat God ook óns volksondes vergewe en ons laat bly leef!
ONS LEWENSLIG
Hannes Ollewagen
Jes. 2:1-22
“Kom, huis van Jakob, en laat ons wandel in die lig van die Here!” (:5)
Hoe gepas is hierdie uitnodiging by monde van die profeet Jesaja nie ook vir ons volk vandag nie. Die profeet rig hierdie wekroep tot sy volk in ’n tyd waarin God se grimmigheid a.g.v. hul ongeregtigheid oor hul uitgestort word. Die volk Israel het in die tyd van Jesaja, soos ons eie volk vandag, in sy eiesinnigheid en navolging van sy afgode so ver van die Lig beweeg dat hulle in die duisternis verdwaal geraak het.
Hierdie verskynsel is in ons tyd ook baie duidelik waarneembaar. Ons kan self sien hoedat mense meer en meer sukkel om tussen reg en verkeerd te onderskei. Inteendeel, ons sien selfs al hoedat mense baie dinge wat ’n paar dekades gelede as heeltemal verkeerd en onaanvaarbaar beskou is vandag gewoon as heeltemal aanvaarbaar en selfs as “reg” beskou. Die rede hiervoor is eenvoudig – die afwesigheid van die ware Lig in die mens van ons tyd se lewe maak dat hulle nie meer kan sien nie. “Maar as ons evangelie dan nog bedek is, is dit bedek in die wat verlore gaan, naamlik die ongelowiges in wie die god van hierdie wêreld die sinne verblind het, sodat die verligting van die evangelie van die heerlikheid van Christus, wat die beeld van God is, op hulle nie sou skyn nie.” (2 Kor. 4:3&4).
Die gebrek aan liefde vir die Lig in ons tyd is teleurstellend en kommerwekkend om die minste te sê. Mense se optrede in ons tyd getuig daarvan dat daar nie meer ’n liefde vir die Lig (die Woord deur God self gestuur) is nie. Die dag van die HERE is nie meer belangrik nie. Mense sal eerder op hierdie dag hul tyd daaraan spandeer om hulself op allerhande wyse te vermaak. En by vermaak sluit ek die menige sogenaamde “kerke” in waar mense bloot na motiveringspraatjies eerder as ware onderrig uit God se Woord sit en luister. Laasgenoemde is maar net ’n ander vorm van vermaak en is ligjare van die ware Godsdiens verwyder omdat dit nie ten doel het om die mens van sy verkeerde weë terug te bring en sy verhouding met God te versterk nie, maar eerder om sy tyd in beslag te neem sodat hy dit nie aan sy verhouding met God spandeer nie. Die Lig van die Woord skyn nie in hierdie plekke nie. En mense verkies om hul tyd op hierdie wyse deur te bring omdat hulle nie met die waarheid van God se Woord gekonfronteer wil word nie. Mense wil nie hoor dat hulle verkeerd handel nie. Mense wil nie na die Lig kom nie omdat hul in hul lewens verdorwe geraak het en hul liefde vir die Lig uitgedoof is. “Want elkeen wat kwaad doen, haat die lig en kom nie na die lig nie, dat sy werke nie bestraf mag word nie.” (Joh. 3:20).
Daar is vir ons net een manier om nie in die duisternis van hierdie lewe te verdwaal nie. En dit is om in die ware lig te wandel. “EN Jesus het weer met hulle gespreek en gesê: Ek is die lig van die wêreld; wie My volg, sal sekerlik nie in die duisternis wandel nie, maar sal die lig van die lewe hê.” (Joh. 8:12).
Maar wat beteken dit om in die lig te wandel? Dit beteken dat ons genoegsame tyd daaraan sal wy om met erns die Woord van die HERE te bestudeer – m.a.w. dat ons na die Lig sal gaan. Ons behoort dan ook verder nie die regverdigheid en insettinge van God deur sy Woord aan ons geopenbaar te bevraagteken nie, maar eerder ons lewens daarvolgens in te rig. Sy Woord moet m.a.w. vir ons die bepalende en deurslaggewende maatstaf van reg en verkeerd wees en ons moet in hierdie lig wandel – ons moet volgens hierdie maatstaf van reg en verkeerd elke oomblik probeer leef. “U woord is 'n lamp vir my voet en 'n lig vir my pad.” (Ps. 119:105).
Mense wat (soos die meeste leiers van die NG Beweging vandag – ons kan dit nie meer ’n kerk noem nie) probeer om alewig debat te voer oor die insettinge wat God aan ons in sy Woord gee en of dit nog in ons tyd van toepassing is en allerhande maniere soek om mense se gehoorsaamheid hieraan te ondermyn, is vyande van die Lig wat hulself daarvoor beywer vir ’n oorwinning van die duisternis oor die lig. Moenie dat hierdie mense u verwar nie. Moenie dat hulle nuttelose gestryery by u ’n weersin in die ware Godsdiens wek nie. Dit waarmee hulle besig is, is nie die ware Godsdiens nie! Die feit dat hierdie mense verkeerd met God se Woord omgaan, maak nie sy Woord verkeerd nie – die verkeerd is by hulle. Moet ook nie agter hierdie soort van mense aan dwaal nie. Moenie dat hulle die ware Lig wat ook u lewe moet verlig, in u lewe verduister nie. U het die voorreg van God se volmaakte Woord tot u beskikking – soek daarin na die Lig in hierdie lewe waarin elke mens behoort te wandel en leef daarin, verbly en verlustig u daarin!
“Want by U is die fontein van die lewe; in u lig sien ons die lig.” (Ps. 36:10).A