Ds Andrè van den Berg

“Toe sê die Here vir Gideon: Deur die driehonderd man wat gelek het, sal Ek julle verlos... En hulle het bly staan elkeen op sy plek, rondom die laer” - Rigt.7:7,21                                

Daar word deesdae baie van statistiek gebruik gemaak.  Statistiek is belangrik omdat dit objektiewe inligting verskaf wat die ware toedrag van sake aan die lig  bring.   Die HAT woordeboek omskryf statistiek as volg:  Die metode wat gegewens in verband met massaverskynsels versamel en in getalle en figure uitdruk.

Gevolglik is statistiek belangrik om inligting wat ʼn samelewing raak mee te evalueer, strukture te orden en die nodige regstellings te maak.   Onlangse misdaadstatistiek wat in Suid-Afrika vrygestel is, was bv. die soveelste bewys van ʼn staatsbeleid wat klaaglik misluk.

Statistiek is ook vir oorlogvoering uiters belangrik.    Wanneer oorlog gevoer  word, moet daar bv. vasgestel hoe getalsterk die vyand en hoe sterk sy slaankrag is.    Ja, statistiek is in die oë van die mens baie belangrik, maar nie vir God nie.

Rigt.7:7 kan tereg die doodvonnis van statistiek genoem word.  Dit lui: “Toe sê die Here vir Gideon: Deur die driehonderd man wat gelek het, sal Ek julle verlos..." Israel het hulle in ʼn slegte situasie bevind - hulle was deur hul eie toedoen aan die Mideaniete onderworpe: “Maar toe die kinders van Israel gedoen het wat verkeerd was in die oë van die Here, het die Here hulle oorgegee in die hand van die Mideaniete, sewe jaar lank” (Rigt.6:1).

Die volgende vers beskryf Israel se vernedering as onderhoriges aan ʼn heidense volk en verarming weens bo-menslike belastings wat op hulle gehef was.  Wat dinge erger gemaak het, was die simbole van die Baälgodsdiens wat soos paddastoele in Israel opgeskiet het.  Toe Israel dinge later nie meer kon hanteer nie, het hulle die regte ding gedoen: “... maar die kinders van Israel het die Here aangeroep” (Rigt.6:6).  God het hul gebede verhoor en Gideon as leier geroep om Israel van die heidene te verlos.

Die Mideaniete het geweet hier kom oorlog en ʼn magtige leer van 135,000 soldate op die been gebring.  Statistiek sou vir Gideon gesê het om ten minste soveel van sy eie manne op die been te bring.  Gideon kry slegs 32,000 man gemonster; ʼn oorwig van 4.2 teen 1!   Hy was seker baie benoud.  Toe God hom aansê om almal wat bang was om te gaan veg te laat omdraai, bly daar 10,000 man oor - 13,5 Mideaniete vir elke Israeliet.   Gideon se hart moes in sy skoene gesak het want die vyand was nie net sterk nie, maar uiters wreed.  Daarom was meer as die helfte van Gideon se aanvanklike 32,000 soldate bang om te gaan veg en het die geleentheid om óm te draai, dadelik aangegryp.

Nog was God nie tevrede nie.  Met die laaste uitdun het daar slegs 300 manne oorgebly - 450 Mideaniete vir elke Israeliet!    Statisties gesproke het Israel geen kans gestaan om te wen nie.   En daaraan kon Israel niks doen nie.  Hulle kon nie die oorlog afstel soos ʼn krieketwedstryd weens reën nie.  Die vyand was alreeds oppad!   Dit was soos met die latere kamikaze loodse, ʼn selfmoordtog, altans so het Israel gedink.  Kom ons stop die verhaal hier vir ʼn wyle.

Die Bybel wil ons leer om te glo.   Daarom is dit vol verhale van mense wat uitsonderlike dinge gedoen het net omdat hulle geglo het.  Hebr.11 gee vir ons ʼn oorsig oor die geloofshelde van die OT wat hul geloofstempel sterk afgedruk het.   Nadat hy etlike van hulle bespreek het, sê die skrywer in 12:1 “Daarom dan, terwyl ons so ʼn wolk van getuies om ons het, laat ons ook elke las aflê”.

Die geloofshelde van die Bybel is soos ʼn wolk rondom ons.  Hulle sit op die pawiljoen en kyk hoe ons die lewensspel speel.   Hulle voorbeeld moedig ons aan.   En onder hierdie toeskouers is Gideon.  Maar hy is nie alleen nie.  Daar is 300 manne by hom.   Al ken ons nie hulle name nie en al is daar beswaarlik ʼn woord uit hul mond vir ons in die Bybel opgeteken, sit hulle op hierdie helde-pawiljoen.   Twee dinge het van hulle helde gemaak - hulle was vol van die geloof in God en getrou op hul pos.

Hierdie slag teen die Mideaniete was een van die uitsonderlike veldslae in die geskiedenis.   Nog nooit het so ʼn klein taakmag so ʼn geweldige groot oormag aangedurf en gewen nie – 300 teen 135,000!  Wat dit so uitsonderlik gemaak het, was die wapens wat hulle gebruik het – ramshorings, krukke en fakkels; uiters ondoeltreffende wapens.   Dis so goed as om vandag met ʼn fluitjie, koeldrankbottel en flits oorlog te gaan voer!

Benewens die onvanpaste wapens is daar nog nooit ʼn vreemder oorlogstrategie gevolg nie.   In plaas van saam te staan en ʼn bres in die vyand se linie te probeer slaan, versprei Gideon sy manskappe daardie nag reg rondom die kamp.   Toe die 300 fakkels daarna eensklaps opvlam, die ramshorings blaas en die geluid van kruike wat breek, gehoor word, het dit so ʼn verwarring in die Mideaniete se laer veroorsaak, dat hulle mekaar vir die vyand aangesien en doodgemaak het.  Gideon en sy manne het stom van verbasing hierdie reddingswonder op ʼn afstand staan en aanskou.  Nie een van die 300 manne het hul lewe verloor nie!

Wat was die geheim van die oorwinning?  Naas God se wonderbare verlossing en Gideon se krygsvernuf, was daar iets baie belangrik wat ons nie moet miskyk nie – die manne was soos die tweede teksvers sê, op hulle pos.  En dis waar God, ons groot Generaal, ons wil hê, op sy pos wat Hy vir ons uitgesit het.

Die groot les wat ons vandag hieruit leer, is om op jou pos te wees.  God het vir elke gelowige ʼn pos.  Ons moet net vasstaan en nie lafhartig dros as dinge verlore lyk nie.   As jy nie daar is nie, is jou plek leeg.  In God se span is daar nie plaasvervangers op die bank nie; niemand wat in jou plek opgeroep kan word nie.

Oorwinnings vir God en sy koninkryk word nie deur getalle of wapens beslis nie, maar volgens die raad van God.   En daarvoor gebruik hy gelowiges wat aan Hom gehoorsaam is en getrou op hul pos bly staan al bars die hel aan hulle voete los!    God verwag egter nie van ons roekelose onverskilligheid nie.  Ons moet Hom net op sy Woord neem en onbevange met ons toekoms vertrou.

Al is die oormag teen jou ook hoe groot, jou lewensomstandighede beroerd en teleurstellings meer as wat jy kan hanteer, ja, al voel dit vir jou op jy jouself teen die magte van die hel vasloop en dit nag word, bly staan op jou geestelike pos.  Dis waar God jou geplaas het en waar Hy jou wil vind die dag as Hy jou wil gebruik!

Jy is nie alleen nie.  Langs jou is daar nog volksgenote wat, net soos Gideon en sy 300 dapper manne, net so ernstig oor God en hul volk is en by jou wil inhaak.  En agter julle staan die almagtige God wat die lotgevalle van elke volk, ook ons Boervolk, in sy hande het.

Wat sê die 300 geloofshelde op die pawiljoen vandag vir ons?   Bly staan op jou pos al lyk jou gevegstoerusting ook hoe ondoeltreffend;  God skat dit genoegsaam.  “Want hoewel ons in die vlees wandel, voer ons die stryd nie volgens die vlees nie; want die wapens van ons stryd is nie vleeslik nie, maar kragtig deur God om vestings neer te werp” (2 Kor.10:3,4).

In die slag teen die Mideaniete het God die vyand deur die lig van 300 fakkels, die geskal van 300 ramshorings en die geluid van 300 kruike wat breek, verdryf.  Statisties sou ʼn mens wou sê dat dit onmoontlik is.  Vir God is niks onmoontlik nie.  As Hy die aarde uit niks gemaak het nie, kan Hy van iets ook niks maak!

Aanbid ons miskien ʼn ander God as wat Gideon en sy manskappe aanbid het?  Nee, ons aanbid presies dieselfde God.  Wat Hy vir Israel gedoen het, het Hy ook vir ons op 16 Desember 1838 by Bloedrivier gedoen.   Hy het Hom nie daarna aan ons onttrek nie.

Ons het soos oud-Israel ook van God afvallig geword en presies soos hulle as straf onder ʼn heidense hiel beland.   Dis nie vir altyd nie.  Wat God vir Israel in die tyd van Gideon gedoen het, sal Hy weer vir ons Boerevolk doen, maar dan moet ons volk tot bekering kom en op ons pos bly staan!

Ons land is ontwrig.  Heidene laat niks wat eerbaar is, staan nie omdat hulle die God van orde nie ken nie maar eerder in die stof van die aarde voor hul afgode rondkruip.  Die gevolg is dat Suid-Afrika met iets anders as die nag donker geword het.   En dis ontstellend.  Wat my meer besorg maak, is die donkerte in ons volksgenote se gemoed; manne en vroue wat tou opgegooi, van hul pos gedros en oop plekke gelaat het.

Ons volk se stryd is ten diepste ʼn geestelike stryd.   Dis lig teen duisternis.  Ons is soos oud-Israel baie min in getal en die moderne Mideaniete baie groot.   Statisties gesproke kan ons dit nooit maak nie – slegs met die hulp van God.   Maar dan moet ons geestelik gereed wees en op ons pos bly staan.   Die tyd is só naby dat ons op ons ramshorings gaan blaas, die kruike gaan breek en die fakkels van oorwinning vir God en ons dierbare vaderland omhoog hou!

Amen!