KRUGER

        Jan F.E. Cilliers

Nog pragtige gedigte by Gedigte

Soos 'n berg, ongebuk,
breed en bonkig van stuk,
dis hy!

Die gelaat, hap vir hap
uit die kranse gekap,
elke kerf, elke knou
harde noodlot se hou;
elke moet, elke merk
vryheidsvyand se werk,
dis hy!

Groot-simpel gerig
deur die Woord as sy lig.
Sonder traan, sonder lag,
stil en stoer in sy krag.
Maats-egaal in sy daad,
wysheidswigtig sy raad, -
suinig woord, raak en kort
soos 'n skot uit 'n fort.
Nie soos storm wat woel,
dog onkeerbaar en koel -
soos die Vaal se vloed gly,
dis hy!

Simonskragtig gepees
soos die korpus, die gees.
Wie die weg ons berei
wat tot vryheid sal lei,
dis hy!