STRENG SINODE-KEURDERS

KORSIES OP DIE RUGBYVELD (37)
(Die hele pastei by: Korsies van Pastei)

Die oud-Springbokkaptein Dawie de Villiers was in die 1960's soms baie ongewild by ondersteuners in die Noorde want hulle wou altyd vir Piet Uys in die Springbokspan gehad het. Dawie was 'n predikant en het een Sondag in Pretoria 'n kerkdiens gelei. Na die diens sê een man hoorbaar vir 'n ander: "Dit was nie 'n slegte preek nie. Om die waarheid te sê, ek dink dit was 'n baie goeie preek. Maar ek dink nog Piet Uys moes gespeel het."

In dieselfde tydperk het twee seuntjies op 'n dag in die straat staan en praat oor die Springbokspan en die keuse van Dawie bo Piet Uys. "Die keurders moes eerder vir Piet Uys gekies het," sê die een seun. "Nee, my pa sê hulle sal dit nooit doen nie," antwoord die ander wysneus. "Hulle is te bang vir die Sinode."