KORSIES VAN PASTEI

(Die hele pastei by: Korsies van Pastei)

BOET, JY GAAN SEERKRY!

Boy Louw was seker een van Suid-Afrika se roemrykste rugbyvoorspelers van alle tye. Hy was 'n harde, eerlike en onverskrokke speler. Sy forse gestalte en sy vreeslose benadering tot die spel het by menige teenstanders ontsag uitgelok... behalwe by 'n paar onnoseles wat gou hulle foute ontdek het!
Op 'n goeie dag speel Boy Louw in 'n plaaslike wedstryd. In die lynstaan het 'n belowende jong slot, ene Malherbe, Boy aanhoudend om die nek beetgekry en sy bene geskop, of hy nou die bal gehad het of nie. Boy het hom gewaarsku, dog sonder sukses.
Toe Boy se humer begin ontvlam, "vee" hy die spelers voor hom weg, gaan staan regoor Malherbe en beduie vir sy vleuel by 'n lynstaan hy moet die bal vir die jong skoorsoeker gooi. Toe hy die bal vang, was ou Boy op hom. Hy gryp hom agter die kraag, bring hom hardhandig aarde toe en vryf sy neus met geweld heen en weer in die grond.
En toe gryp hy hom aan sy kraag en sy broek en smyt hom soos 'n vrot vel heeltemal van die veld af, tot groot vermaak van die toeskouers natuurlik!