Lees reeks by Siener van Rensburg, die mens
Die Simboliese Ossewatrek
In 1920 het die Siener aan dr. Servaas Rossouw, 'n predikant van Senekal (vroeër van die Nuwe Kerk, Kaapstad en vader van oud-pres. P.W. Botha se eggenote, mev. Elize Botha) 'n breedvoerige en merkwaardige uitleg gegee van sy visioene van al die dinge wat nog in die komende dekades met die Boerevolk sou gebeur. Ek gaan hier slegs na een van daardie belangrike gebeurtenisse kyk omdat dit aansluit by wat oom Nieklas reeds aan mnr. Lategan en sy gesinslede vertel het.
Volgens dr. Rossouw het oom Nieklas gesê hy sien donkiewaens en ossewaens uit die suide optrek na die noorde. Die donkiewaens sak later uit en die ossewaens word al hoe meer en meer. Hulle word gelei deur 'n perdekommando en oom Nieklas sien hom (dr. Servaas Rossouw) op 'n wit perd aan die voorpunt.
Dr. Rossouw het voor sy dood skriftelik bevestig dat hierdie gesig 18 jaar later letterlik bewaarheid is toe hy tydens die Simboliese Ossewatrek van Swellendam af saam met ' n groot kommando aan die voorpunt van die tog Transvaal toe gery het.
Hierdie visioen van Siener word in 'n koerantartikel deur mnr Lategan van Wolmaransstad bevestig:
Ek het al byna vergeet van die swart strepe oor die Unie, skryf hy, toe oom Nieklas dit eendag skielik weer ophaal: "Ek sien ' n menigte van mense uit alle oorde van die land optrek langs die swart strepe na 'n koppie naby 'n groot stad waar hulle almal bymekaarkom. Daar is 'n groot fees aan die gang rondom ‘n baie groot huis wat net so vensterbank hoog gebou is. Rondom die gebou is daar 'n menigte vlae wat wapper en in die middel waai ook die Republikeinse vlae, en dan sien ek ons volk is vry..."
Die dag met die hoeksteenlegging van die Voortrekkermonument in 1938 was mnr. Lategan daar. Hy vertel self: Ek sit toe so en kyk na die Monument met al die vlae wat daar wapper en veral na die Republikeinse vlae wat so 'n prominente plek in die middel inneem, en meteens besef ek dis die gesig wat oom Nieklas gehad het! Toe dink ek aan wat oom Klasie gesê het van ons volk wat dan vry sal wees
Ek gaan roep toe my vrou en vra haar of sy nog kan onthou wat oom Nieklas destyds gesê het, en ek maak toe ook nog die opmerking dat, as oom Nieklas reg was, ons volk vry sal wees om ons toekoms uit te werk wanneer die Monument eendag voltooi is.
Maar skaars nege maande na die hoeksteenlegging, breek die Tweede Wêreldoorlog uit en moes die Monument jare lank onvoltooid staan terwyl daar met tussenposes gepoog is om die skaars en duursame bou- en ander materiale bymekaar te maak en te verwerk.
Toe daar in 1948 'n verkiesing uitgeskryf word, het ek aan verskeie mense vertel van die gesig wat oom Nieklas gehad het en bygevoeg dat die Nasionale Party die verkiesing moet wen, want hoe anders kan ons vry wees? Maar hoe die NP die oorwinning kon behaal, het ek nie geweet nie.
'n Jaar later met die inwyding van die Monument was die Afrikaner aan bewind en was hy vir die eerste keer in sy geskiedenis ‘ n vrye volk - voorlopig altans, want oom Nieklas het ook 'gesien' sy volk sal vorentoe weer daardie vryheid verloor, opnuut verdeeld raak en dan deur die smeltkroes van sy laaste en bitterste vryheidsstryd moet gaan ...
Vervolg...