Gedagtes vir elke dag
Of lees almal by Gedagtes vir elke dag
Jare laat wel plooie op ons gesig, maar die mens wat sy geesdrif vir die lewe verloor, kry plooie op sy gees!
WAT MAAK JOU KIND IN 'N STAATSKOOL?
Kriewelkop
Afrikanerouers plaas steeds hulle kinders heel gewilliglik in die kommunistiese staatskole wat vir die Christen totaal onaanvaarbaar moes wees. Besef ouers nie dat die staatskool ideologie bevorder en transformasie wat nooit 'n einde sal kry nie, nastreef? Besef hulle ook nie waarop dit eindelik afstuur nie, naamlik die totale uitwissing van die Afrikanervolk, die Christendom en die Blankedom hier aan die suidpunt van Afrika? Waarom doen Afrikanerouers dit steeds so vrywillig terwyl daar ander keuses is?
In Suid-Afrika is die rede hiervoor eenvoudig naamlik dat staatskool, kerklike lewe en gemeenskapslewe vir baie dekades in die 20ste eeu ‘n eenheid gevorm het. Maar hierdie eenheid is lank reeds verskeur. Dit maak onderwys ondergeskik aan die kommuniste se humanistiese gelykheidsbeskouings. Die matriekeksamen - in die vorm van die “Nasionale Senior Sertifikaat” (NSS) - is deur hierdie gelykmakingsdoelwitte tot ‘n nuttelose oefening wat sertifikate uitdeel maar nie waarde het nie, afgebreek; en dis nie net die matriekeksamen self nie, maar ook die hele proses en inhoud wat daartoe opbou.
Die lae standaarde van onderrig in die huidige kommunistiese staatskole, die gelykmaking of sinkretisme van godsdiens, en die afbreek van ons geskiedenis deur verdraaiing daarvan, is reeds genoeg om jou kind uit so 'n skool te hou.
Daarby vind die universiteite dit nodig om ten spyte van onderskeidings in matriekuitslae, sogenaamde “akademiese geletterdheidstoetse” in te stel. Die Universiteit van Stellenbosch stel dit so:
“En as jy onderskeidings in matriek vir jou tale gekry het? Daar is nie noodwendig ’n verband tussen die uitslag van die toets van akademiese geletterdheid en jou matriekuitslae vir jou taalvakke (ook nie jou ander vakke nie) nie. Die toets van akademiese geletterdheid bepaal of jy taalmatig in die akademiese omgewing oor die weg sal kom. Die taalvakke op skool het iets anders ten doel.”
Die vraag oor die nut al dan nie van opleiding binne die Suid-Afrikaanse nasionale kurrikulum en al sy doelwitte en vereistes, moet ernstig gevra word. Baie ernstig, as 'n gesiene Suid-Afrikaanse universiteit dit prontuit stel dat jou skoolonderskeidings nie noodwendig akademiese geletterdheid meebring nie; en ander (Afrikaanse) universiteite maak soortgelyke opmerkings.
Selfs vir ‘n ouer wat nie meer so sterk op die christelike vraagstukke in die onderwys ingestel is nie, moet die rasionele waarskuwing hieruit na vore kom dat sy kind – dalk jou kind – met ‘n soort skoolopleiding besig is wat nie die nodige akademiese skoling vir die lewe as resultaat het nie. Waarvoor gaan die kind dan skool en watter soort liefde is dit om die kind maar te laat akademies veragter en nie na beter opleiding te soek nie? Hoeveel te meer behoort die christelike gelowige ouer wat waarlik sy kind hoog ag, dan nie op hierdie waarskuwings ag slaan nie?
Die toename in die aantal leerlinge in privaatskole in Suid-Afrika, is dus nie verbasend nie. Dit gaan egter ook nie alles voor die wind nie, en dis veral die Christen-Afrikaner wat tegelyk geloofsomgewing, kultuureie omgewing en gesonde onderwysstandaarde wil handhaaf, wat sukkel om ‘n lewenskragtige en volhoubare onderwysmodel in te stel. Dit is noodsaaklik dat daar meer kapitaal vir hierdie privaatonderwys wat onder eie kulturele en akademiese beheer staan, bymekaargevoeg word om van versplinterde goeie bedoelings na ‘n aantreklike, volhoubare skoolstelsel te vorder wat van pioniersfase na bedryfsfase kan oorskakel.
Dit is ‘n voorvereiste dat Afrikaner-onderwys homself moet befonds en buite die staat se onregmatige wette ‘n moderne korporasie bedryf waartoe leerlinge aangetrek sal word as skool van eerste keuse. Die produk moet losbreek van die onderwysramp wat die huidige regering oor Suid-Afrika gebring het en die losbreek kan nie gebeur solank enige vorm van die NSS aangebied word nie. Dit maak aansluiting by eerste wêreldse standaarde en benutting van internasionale eksamens noodsaaklik totdat daar ‘n behoorlike, vrye Afrikaanse eksamen wat sy akademiese staanplek in die mark sal moet verwerf, gevestig is.
Die strewe na onderwys vry van die kommunistiese gelykmaking is moontlik: bring kapitaal bymekaar daarvoor en bedryf onderwys buite die nasionale kurrikulum en die NSS.