Ds A.E. van den Berg
“Want baie verleiers het in die wêreld ingekom: die wat nie bely dat Jesus Christus in die vleesgekom het nie. Dit is die verleier en die Antichris”(2 Joh.7).
“... Gaan uit haar uit, my volk, sodat julle nie gemeenskap met haar sondes mag hê en van haar plae ontvang nie” (Openb.18:5).
Eeue gelede het mense in Babel ʼn toring begin bou en daarmee die godvyandige ideologie van wêreld-eenheid afgeskop. God het dit met ʼn spraakverwarring gekeer omdat Hy die mensdom apart geplaas het. Moses skryf: “Toe die Allerhoogste aan die nasies 'n erfdeel gegee het, toe Hy die mensekinders van mekaar geskei het, het Hy die grense van die volke vasgestel ...” (Deut.32:8). Paulus herhaal hierdie Skrifwaarheid in Athene: “En Hy het uit een bloed al die nasies van die mensdom gemaak om oor die hele aarde te woon, terwyl Hy vooraf bepaalde tye en die grense van hulle woonplek vasgestel het” (Hand.17:26).
Daar was deur die eeue verskeie pogings van saambondeling. Almal het klaaglik misluk, vanaf Alexander die Grote se poging tot by Desmond Tutu se fatale reënboognasie-nagmerrie. Daniel gee in die uitleg van Nebukadneser se droom oor die beeld wat ineen gestort het die rede vir die mislukking van samebondeling: “Dat u die yster gemeng met kleigrond gesien het — hulle sal deur menslike gemeenskap onder mekaar vermeng raak, maar hulle sal nie aanmekaar vasklewe nie, net soos yster nie met klei meng nie” (Dan.2:43).
God seën mense-apartheid soos ons eertydse volksgeskiedenis ook van getuig. Satan haat mense-apartheid en gaan net voor die wederkoms onder leiding van die valse profeet mense wêreldwyd saambondel soos nog nooit tevore nie.
Hierdie bal is met die stigting van die Klub van Rome in April 1968 met 10 wêreldleiers in Rome afgeskop en is daar vir wêreld-eenwording begin ywer. Dat dit juis in Rome was, was nie toevallig nie. Sedertdien ontvang wêreldleiers gereeld eksklusiewe rapporte van hierdie klub wat hul op hoogte van sake hou. (F.W. de Klerk was ook ‘n lid van hierdie klub.)
Op 17 Sept.1973 is gerapporteer dat die klub-leiers die wêreld in 10 polities-ekonomiese streke verdeel het en koninkryke noem. “En die tien horings wat jy gesien het, is tien konings wat nog geen koningskap ontvang het nie, maar hulle ontvang mag soos konings een uur lank saam met die dier” (Openb.17:12).
Tien nasies uit die gebied van die ou Romeinse ryk gaan ʼn magsgroep vorm en die wêreld aan hulle onderwerp – hoofsaaklik uit die geledere van die Europese Unie (EU). Geen staatshoof het al ooit by ʼn samewerking met Rome gebaat nie. Ook nie Suid-Afrika nie!
Die Klub van Rome is ʼn pion op die skaakbord van die RK wat godsdiens met godsdiens wil vernietig. Daarvoor gebruik die RK ekumene; die strewe na strukturele kerkeenheid en verbloem dit as ʼn interkerklike broederskap. Die RK slaag meesterlik daarin om met hierdie skynbroederskap Protestantse kerke in die hok van ʼn georkestreerde gesamentlikheid in te jaag.
Na die 16de eeuse Hervorming het Rome gesweer dat alle Protestantse kerke eendag na haar toe sal terugkruip. Dit gebeur sienderoë! Dis kommerwekkend dat Protestantse kerke met ’n instansie soos die RK, wie se bose doelstellings ’n ope boek is, gemene sake het! Ongelukkig verrig mense geen boosheid so gelate as wanneer dit uit godsdienstige oortuiging geneem word nie.
Dit waarmee die RK tans mee besig is, het Romeinse keisers eeue gelede al toegepas – beheer mense met godsdiens. John Knox het eeue gelede die RK se houvas op die mensdom tereg as ʼn tirannie beskryf.
Rome wil alle afsonderlike gemeenskapstrukture afbreek en met gesamentlike strukture vervang. Ten einde Protestante se samewerking te verkry, het sy die ideaal van ʼn strukturele kerkeenheid by kerke aangewakker wat onmin in talle Protestantse kringe veroorsaak het. Kyk maar net na die Belhar-belydenis!
Die laaste drie pouse het ekumeniese betrekkinge selfs so hoog aangeslaan, dat hulle, in hul strewe na een wêreldgodsdiens, Moslems, Jode en Ortodokse kerke begin betrek het. Niks is vir die Christendom gevaarliker as heidense verbroedering nie!
Om heidene te betrek, moes daar van die verlossingsleer dat Jesus die enigste Verlosser is, afgesien word. Die Dallas Morning News (20/3/1999) berig dat kard. Francis Arinzeen latere pous dat Christus nie die enigste weg na die hemel is nie. Wat sê die Bybel? “Want daar is een God en een Middelaar tussen God en die mense, die mens Christus Jesus” (1 Tim.2:5).
Die RK doen haar as ʼn Christelike kerk voor wat met kerke wil saamwerk. Nee, al wat sy wil doen, is om Protestantse kerke aan haar leiband te kry, ʼn leiband wat met die verskyning van die Antichris ʼn wurgketting gaan word!
Die RK het as valse profeet (tweede dier van Openbaring) net een doel voor oë nl. om die wêreld onder beheer van die Antichris te bring. En daarvoor is godsdiens ʼn handige werktuig. Haar sg. universele liefdesevangelie van versoening en vergifnis is ʼn slenter waarmee Protestantse kerke gevang word.
Om Skrifwaarhede ter wille van interkerklike samewerking opsy te skuif, is verraderlik. Rome se vingerafdrukke word plaaslik duidelik op die NG Kerk se inkleding van eredienste gesien. Haar Roomsgeorkestreerde Bybelvertaling, kindernagmaal en die gebruik van kerse verraai die sleeptou waarmee sy gesleep word – Made in Rome.
Ongelukkig sien Protestantse kerke die RK se planmatige vernietiging van hul Hervorming-erfenis nie raak nie! Dr. Coenie Burger, eertydse moderator van die NG-Kerk, skryf in 2004: “Om die Bybel op jou eie te lees en self afleidings te maak oor wat jy glo van God en die lewe en van reg en verkeerd, is baie gevaarlik. Ons geskiedenis met apartheid sou dalk anders verloop het as ons op een of ander manier deel kon gebly het van die ekumeniese kerk” (Godsdiens Aktueel – 19 Oktober 2004). Dis in geen onduidelike taal Rooms!
Hierdie gebrek aan profetiese visie sorg dat die ekumeniese net al hoe stywer om Protestantse kerke trek. Dit gaan vir die RK nie om samewerking nie maar om mense-beheer. Al lyk die RK vir leke na Christendom, is dit is in werklikheid niks anders as ʼn vermenging van oud Babiloniese en Romeinse afgodery nie.
Die RK erken dat baie van haar leer vreemd aan die Skrif is. ʼn Geleerde het bevind dat 82% van haar leer nie met die Bybel ooreenstem nie. Die Bybel was vir lidmate vir baie lank ʼn dooie boek wat slegs aan die hand van priesters gehoor en verklaar kon word. Dis in 1229 selfs op die lys van verbode boeke geplaas en oortreders is vervolg. In Desember 1866 het pous Pius IX alle Bybelgenootskappe as peste beskryf!
Rome haat in der waarheid die Bybel omdat dit haar ontmasker. “Want die woord van God is lewend en kragtig en skerper as enige tweesnydende swaard, en dring deur tot skeiding van siel en gees en van gewrigte en murg, en is ʼn beoordelaar van die oorlegginge en gedagtes van die hart” (Heb.4:12).
Die RK is die valse profeet waarvan die Bybel praat. Sy lok mense van die Bybelse waarhede en derhalwe die hemel af weg. “Want baie verleiers het in die wêreld ingekom: die wat nie bely dat Jesus Christus in die vlees gekom het nie. Dit is die verleier en die Antichris” (2 Joh.7).
Roomse Katolisisme is bloot ʼn herlewing van die ou Babiloniese afgodery. . In Openb.17:5 skryf Johannes: “... Verborgenheid, die groot Babilon, die moeder van die hoere en van die gruwels van die aarde”.
Omdat baie landshoofde met haar gemene sake gaan hê, word sy in Openbaring as ʼn bordeelhoudster met onsedelike dogters uitgebeeld met kliënte wat na haar stroom. Wie dus met haar gemene sake het, maak hul aan geestelike prostitusie skuldig. Vandaar God se oproep aan gelowiges: “...Gaan uit haar uit, my volk, sodat julle nie gemeenskap met haar sondes mag hê en van haar plae ontvang nie” (Openb.18:5).