GEBEDEBOEK VIR DIE BOEREVOLK (6)

Lees reeks by GEBEDEBOEK VIR DIE BOEREVOLK

Ds.Andrè van den Berg

Dankie hemelse Vader dat U die sonde haat maar nie die sondaar nie. As sondaar kan ek U alleenlik op grond van Jesus se soenverdienste nader. U Woord leer my dat elkeen wat glo, gered word al is sy sondes ook hoe baie, maar hy wat nie glo nie verdoem sal word, al is sy sondes ook hoe min!

Here, ek kan nie die wêreld vir my sonde blameer nie. Sonde het nie sy oorsprong daarbuite iewers nie, maar eerder binne in my. Die wêreld lê dit slegs bloot. Sonde is net so ‘n wesentlike deel van my lewe as die klop van my hart en asem in my longe. Dis maklik om te erken, maar swaar om te oorwin. Ek bely dat ek dikwels sonder die nodige berou of skuldbelydenis na myself as sondaar verwys. Dit word ‘n blote erkenning en niks meer nie.

My Vader, hoe het sonde nie u Skepping in ‘n dooie wêreld sonder ware vervulling verander nie! O, kon ek maar eerder my liggaam aan ‘n folteraar oorgee om gepynig te word, sou dit draagliker wees as die pyn van die sonde en die vlamme van ‘n brandstapel genadiger!

In my sondebeneweldheid het ek geglo dat sondebelydenis my ongelukkig sou maak. Dankie dat die Heilige Gees my van hierdie dwaasheid bevry het en my geleer het dat sondebelydenis vreugde en bevryding bring. Nou is daar vir my meer vreugde in een traandruppel van berou as in al die wêreld se plesier. Sondebelydenis is salf vir my siel!

Dankie dat daar niks in my lewe so sleg is dat U dit nie kan vergewe nie en, omdat ek U kind is, en Satan niks verder oor my sondes te sê het nie. Wanneer hy my aanval, verwys ek hom na U wat in Christus Jesus al my sondes op U geneem en vir my versoening regverdiging bewerk het.

Daarom werp ek my opnuut in die stroom van u genade omdat dit my in die see van u ewige liefde vir sondaars inspoel.

Help my om nooit weer na sonde te verlang nie. U het my van die liefde vir sonde bevry, van die gewoonte om teenoor U te oortree gered en van die behoefte om aan die Satan gehoorsaam te wees verlos. Laat die bloed van u Seun die oorblywende sondereste in my vernietig en my geloof daagliks versterk!

Amen