J P Botha

O maaiers van Gods akker,

Die arbeidsveld lê woes;

En waarom staan jul ledig,

Met sekels rooi van roes?

Jul eet en drink so lekker,

Jul lag en juig so bly –

Maar God die Heer gebied dit:

“Die werkdag gaan verby!”

Kom aan van berg en heuwel:

Begin die môre vroeg,

En draal nie tot die middag –

Reeds is dit laat genoeg.

Kom nou tog vasberade:

Ontsien geen son nog sneeu –

Breek af van die wankelinge,

Van Satan, die oue leeu.

Klim op die berg van wysheid:

Doof uit die luie gees!

Verkondig die Evangelie

Aan sondaars, onbevrees.

Wees wakker in jou arbeid,

Ontvang dan Jesus’ loon:

Ons kry ‘n troue Leidsman,

‘n Louerekrans en kroon!