(Die hele pastei by: Korsies van Pastei)

SLAAN HOM, PHIL!

Phil Mostert, beroemde Springbokvoorryman, was so sterk soos 'n os, maar hy kon, gelukkig vir sy teenstanders, altyd sy humeur beteuel. Daardie dae, so vertel dok Craven, was rugby 'n baie harder en ruwer spel as vandag.
Phil het gereeld onder die vuiste van sy teenstanders deurgeloop omdat hy so hard en meedoënloos gespeel het. In Nieu-Seeland het hy op 'n dag weer erg deurgeloop. Danie Craven kon dit nie begryp dat ou Phil so baie kan ontvang en niks self uitdeel nie.
"Ou Phil," vra hy hom toe, "hoekom foeter jy nie daardie man wat jou so slaan nie, man?"
"Ou Danie, ek gaan hom nie slaan nie, maar ek wag my kans af; ek gaan hom met hierdie groot hande van my vermorsel. Sy nek sal soos my ma se beskuitdeeg tussen my vingers uitpeul!"
Nodeloos om te sê dat Phil nie sy kans benut het nie...