Lees reeks by Ons wêreld van kompromieë

Verdedig die waarheid

"Die enigste manier waarop ons die huidige neiging tot dogmatiese kompromieë kan teenstaan, is deur die onaangetaste waarheid met hernude inspanning te beskerm, te verkondig en aan die volgende generasie oor te dra."

Soos in alle lande is leierskap van deurslaggewende belang wanneer daar in Suid-Afrika gekyk word na probleme op feitlik alle terreine.  Swak leiers bring chaos en verval.  En as verkeerde leiers nog doelbewus daarop uit is om te mislei in plaas van 'n volk en 'n nasie tot groot hoogtes te lei, is die materiële en geestesvoorspoed van daardie mense in dae af te tel.

Ons land verval, daar is op geen terrein stabiliteit nie; ons munisipaliteite het feitlik almal ineengestort, op alle regeervlakke is Suid-Afrika gedoem, chaos heers in die parlement as gevolg van wanbestuur en korrupsie. Dissipline ontbreek geheel en al aan owerheidskant, en onvermoë om die land polities te bestuur word al meer oorskadu deur doelbewuste misleiding en leuens wat daagliks aangehoor moet word.

As ons na ons kerke kyk is dit ook nie anders nie. Waar lê die probleem? Ongetwyfeld primêr by die leierskap - die leraars en lekepredikers wie se verantwoordelikheid dit is om God se kinders te leer, rig en beskerm.

Soos Paulus die Efesiese ouderlinge gewaarsku het: "Ek weet dat daar na my vertrek wrede wolwe onder julle sal indring, en hulle sal die kudde nie ontsien nie. Ja, uit julle eie geledere sal daar mense na vore kom wat met leuens die gelowiges agter hulle aan sal probeer verlei" (Hand. 20:29-30). Daar sal altyd vals leraars wees, en dis die leiers se taak om op die uitkyk vir hulle te wees, maar wat 'n kwade dag as 'leiers' self die 'wolwe' word!

Maar in 'n sekere mate het die gewone kerklidmate ook deel aan die skuld oor wat in ons kerke verkeerd is. God se Woord is ook tot hulle beskikking, en hulle kan nie hulle geestelike leiers blindelings volg nie net soos 'n nasie ook nie sy politieke misleiers blindelings durf volg nie. Ongelukkig is dit so dat die meeste nie die onderskeid tussen leuens en die waarheid kan tref nie maar daar is net een resep daarvoor:

Slegs dié wat in God se Woord opgebou en versterk is, kan die waarheid van die leuen onderskei en dit is dus hulle taak om, ter wille van hulle eie geestelike welsyn, seker te maak dat hulle leiers aan die Bybelse standaard voldoen. Al die gelowiges moet as bewaarders van die waarheid dien. Toe Paulus oor Israel se bevoorregte identiteit geskryf het, het hy gesê:  "Het dit dan enige voordeel om 'n Jood te wees, en het die besnydenis enige nut? Ja, baie, in allerlei opsigte. Die belangrikste is dat God sy woorde aan die Jode toevertrou het" (Rom. 3:1-2). God se primêre geskenk aan Israel was sy Woord. Die kerk is in dieselfde posisie, want God het die beskerming en verkondiging van sy waarheid aan ons toevertrou.

Voordat die kerk God se plan vir die wêreld in vervulling kan bring, moet alle gelowiges hulle tot dogmatiese integriteit verbind. Die apostel Paulus verwys hierna wanneer hy skryf dat dit een van die leraar se rolle is "om die gelowiges toe te rus vir die opbou van die liggaam van Christus. So sal ons uiteindelik almal kom tot die werklike eenheid in ons geloof" (Ef. 4:12-13). Met "geloof" verwys Paulus nie na geloof as daad of gehoorsaamheid nie, maar na die inhoud van die Christelike waarheid - na Christelike dogma. Die geloof is die inhoud van die evangelie in sy volledigste vorm.

Daar is die afgelope paar jaar baie oor kerkeenheid in Suid-Afrika gepraat, en gevolglik het ons die insluiting van allerhande soorte godsdienste en kultusse aanskou. Maar dit is nie die eenheid wat God vir sy kerk wil hê nie. Geloofseenheid is onmoontlik tensy dit op die basis van die waarheid rus. Jesus het gebid: "Laat hulle aan U toegewy wees deur die waarheid. U woord is die waarheid. Soos U My na die wêreId toe gestuur het, het Ek hulle ook na die wêreld toe gestuur;  Maar ter wille van hulle wy Ek My aan U toe, sodat hulle ook deur die waarheid aan U toegewy kan wees. Ek bid egter nie net vir hulle nie, maar ook vir dié wat deur hulle woorde tot geloof in My sal kom. Ek bid dat hulle almal een mag wees” (Joh. 17:17-21). Eenheid is slegs moontlik wanneer gelowiges in die waarheid geheilig word.

’n Gemeenskap waarin die noodsaaklike leerstellings van die geloof verwaarloos of afgekraak word, is nie Christelike eenheid nie, dit is 'n goddelose kompromie. God se waarheid is nie gefragmenteer of onderling verdeeld nie. Maar wanneer daar verdeeldheid onder sy kinders is, lewe hulle sonder sy waarheid en sonder die geloof wat in kennis en insig geanker is. Geloofseenheid is slegs moontlik binne 'n Bybelsgebaseerde, dienende en geestelik volwasse kerk. Enige ander eenheid sal slegs op 'n menslike vlak bestaan. Dit sal losstaande van, en in konstante konflik met, ware geloofseenheid wees. Eenheid kan nie sonder dogmatiese integriteit in die kerk bestaan nie.

Die kerk bestaan vandag in 'n wêreld wat deur die apostel Paulus voorspel is toe hy vir Timoteus gesê het: "Daar sal 'n tyd kom wanneer die mense die gesonde leer nie meer sal verdra nie" (2 Tim. 4:3). Deur die eeue heen het die ware kerk te midde van vervolging van buite en vals leerstellings van binne aan die waarheid getrou gebly. Ons het daardie nalatenskap van ons voorgangers ontvang. Die enigste manier waarop ons die huidige neiging tot dogmatiese kompromieë kan teenstaan, is deur die onaangetaste waarheid met hernude inspanning te beskerm, te verkondig en aan die volgende generasie oor te dra.

Nes vandag het die gelowiges in die eerste-eeuse Efese ook in die versoeking gekom om toegewings rondom God se Woord te maak. Efese was 'n heidense stad, die tuiste van die tempel van die godin Diana (Artemis), een van die sewe wonders van die antieke wêreld. Paulus, wat drie jaar daar gewerk het, was deeglik bewus van die druk en versoekings om die waarheid te vertroebel. Sy briewe aan Timoteus, die leraar van die kerk in Efese, is vol aansporings om die waarheid uit te leef, te verkondig en te beskerm.

In een van hierdie aansporende gedeeltes verduidelik Paulus die kerk se taak aan die hand van die volgende beeld: Die kerk is "die draer en beskermer van die waarheid" (1 Tim. 3:15). In die 1953-vertaling word die woord "pilaar" in die plek van "draer" gebruik. Paulus verwys indirek na die pilare in die tempel van Diana - al 127 van hulle. Nes die pilare waarop die massiewe tempeldak rus, is die kerk die fondament en pilaar waardeur die waarheid gedra word. Nes die fondament en pilare van die Diana- tempel 'n getuienis van die dwaling van heidense en vals godsdiens is, moet die kerk 'n getuienis van God se waarheid wees. Dit is die kerk se taak in die wêreld.

Elke kerk het die ernstige verantwoordelikheid om die waarheid van God se Woord te verdedig. Die kerk het die waarheid nie uitgedink nie, en God se oordeel rus op enigeen wat daaraan wil verander. God het die kerk met die rentmeesterskap van die Woord toevertrou, en dit is ons plig om die Woord as die kosbaarste besitting op aarde te verdedig en beskerm. Kerke wat met die Bybelse waarheid peuter, dit verdraai, gering ag of daarvan afwyk, vernietig die enigste rede vir hulle bestaan. Uiteindelik is hulle kragteloos en kom hulle onder God se oordeel.

Hoe om die waarheid te beskerm

Alhoewel dit die kollektiewe verantwoordelikheid van elke plaaslike kerk is om die Woord te onderskryf en te ondersteun, kan dit nie gebeur tensy elke individuele gelowige hom of haar tot hierdie taak verbind nie. Daar is verskeie maniere waarop ons dit kan doen.

Paulus het die volgende getuienis teenoor Feliks, die Romeinse goewerneur in Judea, gelewer: "Ek dien die God van my voorvaders volgens die leer van Christus wat hulle 'n dwaalrigting noem. Ek glo nog steeds alles wat in die wet en die profete geskrywe staan" (Hand. 24:14). Sy geloof in God se Woord het die Nuwe Testament ingesluit. Hy het aan die Korintiërs geskryf: "Ons glo, daarom praat ons ook" (2 Kor. 4:13). Die baie aansporings om na die Woord te luister, behels ook dat daar met geloof geluister moet word. Jesus het gesê: "Wie luister na wat Ek sê, en in Hom glo wat My gestuur het, het die ewige lewe. Hy word nie veroordeel nie... maar het reeds uit die dood na die lewe oorgegaan" (Joh. 5:24). Jy kan nie die Woord verdedig as jy dit nie hoor en dit glo nie.

Die psalmis het geskryf: "Ek het u woord in my hart gebêre, dat ek teen U nie sal sondig nie" (Ps. 119:11, 1953- vertaling). Dit is nie genoeg om die Woord te hoor nie - ons moet dit ook in ons geheue vasmaak. Dan eers sal jy "altyd gereed wees om " ...'n antwoord te gee aan elkeen wat van julle 'n verduideliking vra oor die hoop wat in julle lewe" (1 Pet. 3:15).

In Josua 1:8 (1953-vertaling) staan daar: "Hierdie wetboek mag nie uit jou mond wyk nie; maar bepeins dit dag en nag, sodat jy nougeset kan handel volgens alles wat daarin geskrywe staan; want dan sal jy in jou weë voorspoedig wees, en dan sal jy met goeie gevolg handel." Dink net waar Suid-Afrika vandag sou staan indien ons 'n Christenowerheid gehad het wat werklik die Wetboek van God dag en nag bepeins het!

In 2 Timoteus 2:15 skryf Paulus vir Timoteus: "Lê jou daarop toe om jou tot beskikking van God te stel as 'n arbeider wat die goedkeuring van God wegdra, 'n arbeider wat hom vir sy werk nie hoef te skaam nie, wat die woord van die waarheid suiwer verkondig."

Jesus het gesê: "Nog meer bevoorreg is hulle wat die woord van God hoor en dit onderhou" (Luk. 11:28), en "as julle aan my woorde getrou bly, is julle waarlik my dissipels" (Joh. 8:31). Dit help veel om die Woord te hoor, te memoriseer, daaroor te mediteer en te bestudeer as jy nie daaraan gehoorsaam is nie.

Paulus het vir die Filippense geskryf dat dit sy taak is "om die evangelie te verdedig" (Fil. 1:16). Die waarheid sal altyd aangeval word, en ons moet slaggereed wees om dit met groot ywer te verdedig. Daarom moedig Judas die gelowiges aan "om kragtig te stry vir die geloof wat eenmaal aan die heiliges oorgelewer is" (v. 3,1953-vertaling). Die Griekse woord wat met "kragtig te stry" vertaal is, is epagdnizd. Dit bevat die Griekse woord agon waarvan die Engelse woord agony afgelei is. Agon het oorspronklik na 'n stadion verwys. Wanneer ons die stadion betree om geestelike oorlog te voer, moet ons vir die suiwerheid van die geloof stry.

Paulus wys Titus daarop dat gelowiges "in alles wat hulle doen, die aansien van die leer van God ons Verlosser moet verhoog" (Tit. 2:10). Gedagtes wat aan die Woord van God onderwerp word, sal tot godvresende dade lei (Kol. 3:16).

Jesus het ons die volgende opdrag gegee: "Gaan en maak die mense my dissipels: doop hulle in die Naam van die Vader en die Seun en die Heilige Gees, en leer hulle om alles te onderhou wat ek julle beveel het" (Matt. 28:19-20). Paulus skryf aan Timoteus: "Verkondig die woord, hou daarmee vol, tydig en ontydig; weerlê, bestraf, bemoedig, deur met alle geduld onderrig te gee" (2 Tim. 4:2). "Prediking", die Afrikaanse woord vir kerugma, verwys na die boodskap wat iemand namens 'n heerser of owerheid aankondig. In die Nuwe Testament word hierdie term altyd gebruik vir die openbare verkondiging van God se Woord waardeur mense tot 'n verlossende geloof kom, in die waarheid opgebou word en versterk om 'n om 'n godvresende lewe te lei.

Wat 'n voorreg is dit nie om die waarheid wat ons van God ontvang het, te beskerm en verdedig nie. Mag elkeen van ons daagliks getrou wees in die uitvoer daarvan, en mag ons eie integriteit in die proses gevestig word wanneer ons dit in ons kerke en ons land op alle terreine verdedig!