Gedagtes vir elke dag
Of lees almal by Gedagtes vir elke dag
Almal wonder een of ander tyd wat beteken die begrip liefde tussen mense werklik. 1 Kor 13 vertel dit vir ons en in alledaagse idioom beteken dit: toe ek waardeloos gevoel het, het jy tyd gehad om na my te luister; toe ek nie kon bid nie, het jy saam met my gebid; toe ek bang was, was jy teer met my; toe ek suksesvol was, het jy jou verheug in my prestasies; omdat jy jou eie beperkinge kon aanvaar, het ek geleer om myne te aanvaar; toe ek 'n klankbord nodig gehad het, was jy objektief; toe ek fouteer het, het jy gewag en gehoop ek kom tot myself; toe ek jou seergemaak het, het jy my vergewe; toe ek eensaam was, het jou geloof my ondersteun.
Slotsom: Vanweë jou teenwoordigheid in my lewe, het ek gegroei in my liefde vir Christus: hierin is jou liefde onsterflik.
LEEF HEILIG
Ds Andrè van den Berg
“Maar soos Hy wat julle geroep het, heilig is, moet julle ook in jul hele lewenswandel heilig wees” - 1 Pet.1:15
Is jy heilig? Die meeste mense sal sê: “O, nee, daarvoor sondig ek te veel!” Nee, heilig beteken nie sondeloos nie, anders sou die oproep in die teksvers baie onbillik gewees het. Heilig beteken om afgesonder of opsy gesit te wees; dit wat God van gelowiges verwag. Ons moet anders as die wêreld wees; vir God afgesonder en opsy gesit. “En word nie aan hierdie wêreld gelykvormig nie, maar word verander deur die vernuwing van julle gemoed...” (Rom.12:2).
God is heilig en wil soos ʼn goeie vader dat sy kinders in sy voetspore volg.
God se heiligheid het nie net Israel se godsdiens, maar ook hul volkslewe oorheers. Hulle het in hul godsdiens daarna gestreef om heilig te wees omdat hulle geweet het dat ʼn onheilige nie voor God kon staan nie en sy onguns te wagte was.
God het Hom dwarsdeur die Bybel as die Heilige laat ken. Hy was nie soos Baäl, Dagon of een van die ander afgode nie, maar heilig en sy heiligheid was vreesaanjaend. In Exodus waarsku Hy die Israeliete om nie op die berg Sinai te klim nie omdat Hy daar teenwoordig was en dit vir Hom afgesonder het. Hulle mag dit nie eens aangeraak het nie. Oortreders het onmiddellik gesterf.
God se heiligheid was ook in die tabernakel en later baie duidelik in die tempel sigbaar. Daar was ʼn heilige en allerheiligste plek. God se heiligheid was so omvangryk dat hy selfs streng voorskrifte vir die destydse verskuiwing van die tabernakel gegee en die Koragiete daarmee belas het. Aäron moes toesien dat die heilige voorwerpe van die tabernakel so sorgvuldig verpak word, dat die verpakkers dit nie aangeraak het nie.
Maar waarom al hierdie sorgvuldigheid? Juis om God se heiligheid mee te beklemtoon. Die Israeliete het gereeld geoffer, maar terselfdertyd ook geweet dat geen offer, hoe genoegsaam dit ook al was, hulle heilig genoeg kon maak om God te sien nie. Hulle kon maar net soos Jesaja voor sy heiligheid bewe!
Heiligheid is nie ʼn eienskap van God soos liefde, lankmoedigheid of goedheid nie. Dit is God self en omvat Hom in sy geheel. Alle ander eienskappe word van sy heiligheid afgelei. God doen niks onheilig nie, selfs nie eens die talle banvloeke waarvan ons in die OT lees nie want daarmee het Hy die spottende heidene gestraf: “U sal hulle verpletter met ʼn ysterstaf, U sal hulle stukkend slaan soos ʼn erdepot” (Ps.2:9).
So anders as wat die Roomse Kerk leer, kan geen mens deur sy eie toedoen heiligheid verwerf nie. Dis ʼn gawe van God. Hy is die Een wat ons heilig maak en ons tot heiligmaking oproep: “Wees heilig want Ek is heilig” (vers 16). Daarmee eis God dat ons aan sy heilige doel vir ons lewe beantwoord. Dit kan ons nie op ons eie, sonder Jesus doen nie – daar is geen eie verdienste nie! Daar moet ʼn verandering (transformasie) plaasvind. ” En terwyl ons almal met onbedekte gesig soos in ʼn spieël die heerlikheid van die Here aanskou, word ons van gedaante verander na dieselfde beeld, van heerlikheid tot heerlikheid, as deur die Here wat die Gees is” (2 Kor.3:18).
Goeie gewoontes soos gereelde kerkbywoning en Bybelstudie sal ons geestelik niks in die sak bring as dit nie bydra om ons vir God en sy kerk af te sonder nie. Waarom kom ons kerk toe en doen ons Bybelstudie? Sodat die Here ons al hoe meer vir Hom en sy saak opsy kan sit. Dis wat heiligmaking beteken – God maak my al hoe meer soos Hy.
Die vraag is: Hoe word ons heilig? Net op een manier - deur gehoorsaamheid. Soos wat ʼn vader verlang dat sy kinders aan hom gehoorsaam moet wees, verlang God dit van ons. Gehoorsaamheid is die pad van heiligheid. Maar wat is gehoorsaamheid? Om die regte dinge te doen. Wie die regte dinge doen, voer ʼn regverdige lewe. God plant iets van sy heiligheid in die gees van elke regverdige. En dis waaraan ons land mank gaan; regverdige mense – mense wat die regte dinge doen!
Wat verhoed ons om heilig voor God te leef en sodoende aan ons goddelike doel op aarde te beantwoord? Sonde; want sonde is ongehoorsaamheid! En dis ʼn lewenslange stryd. Dit versteur nie net ons onderlinge gemeenskap met mekaar nie, maar ook met ons hemelse Vader.
Is dit derhalwe ʼn hopelose stryd? Nee, God het ook daarvoor voorsiening gemaak. Gelowiges ontvang vergifnis van sonde indien dit in ware berou voor God bely word. Die mens wat weens sonde vuil voor God staan, word deur vergifnis skoon.
Dit was die groot beweegrede met elke offer wat in Israel gebring is. Die offersisteem was ʼn poging om van vuil mense skoon mense te maak deur hulle met ʼn heilige God te versoen. Jy kan nie met ʼn heilige God versoen, sonder die begeerte om self heilig te leef nie. Mense wat die huis van God betree sonder hierdie begeerte, ontheilig dit!
Die Skrif sê dat ons liggame ʼn tempel van God is. As ons dit gevolglik vir onheilige doeleindes gebruik, verwoes ons daarmee die tempel van God. Daarom pleit Paulus by die Korintiërs om van sedeloosheid te vlug. Die heidenwêreld het ʼn geweldige houvas op die mensdom. Daar is net een uitweg: “En word nie aan hierdie wêreld gelykvormig nie, maar word verander deur die vernuwing van julle gemoed...” (Rom.12:2).
Die ellende en spanning wat ons in ons land beleef, is die gevolg van onheilige lewens. Haat is aan die orde van die dag en maak mense bitter. Hebsug vreet soos kanker aan ons volksiel. Liefde word vertrap, vertroue word vernietig, rykes onderdruk armes. Die armes begeer weer om rykes te onttroon ens. Hierdie geestelike duisternis weerspieël in werklikheid die geestelike donkerte in ons volk se harte. Die gevaar is dat ons soos grotdiertjies aan die donker gewoond begin raak!
Daar is geen groter duisternis as die duisternis van ʼn verlore siel nie. Dit maak dat mense uit pas met God se heilige plan vir hul lewe raak; ook gelowiges wat daagliks deur die verworde kultuur van ʼn gevalle wêreld gekonfronteer word.
Wat verwag Jesus van ons? Om onder alle omstandighede heilig/afgesonder, ja, anders te leef. Dis wat Henog gedoen het. In sy tyd het die sonde so groot geword, dat God later besluit het om die mensdom, op agt na, almal uit te wis. En wat doen Henog? Hy wandel met God! As ons die geloof in Jesus nie in hierdie dae uitleef nie, glo ons werklik nie in Hom nie! Heilige lewens daarenteen, het groot trefkrag: “...en hou julle lewenswandel onder die heidene skoon....” (1 Pet.2:12). Heilige lewens sorg ook dat orals in die wêreld kragtige geloofsgemeenskappe tot stand kom.
Dis goed om geestelik optimisties te wees en die hele wêreld vir Christus te wil wen. Daarvoor moet ons Jesus uitleef. Ons moet vir die wêreld wys hoe ʼn heilige lewe lyk. Mense moet in ons lewens kan sien hoe ons die voordele van die geloofslewe geniet, en jaloers word – dis wanneer Christus in ons lewens sigbaar word!
Blote Bybel lees en kerk toe gaan, maak nie van mense sondermeer heilige mense nie. Ons moet geestelik werk-effektief raak! Vandag word daar soveel kursusse aangebied om mense meer werk-effektief te maak. Die Evangelie skrywer Lukas het nie toevallig alles wat Jesus gedoen en geleer het beskryf nie. Dit was om sy lesers geestelik werk-effektief te maak. Jesus het nooit iemand gevra om iets te doen alvorens Hy nie self gewys het hoe dit gedoen moet word nie. Wys eers vir ʼn mens hoe dit gedoen moet word alvorens jy van hulle verwag om dit self te doen.
Daar is net een ding wat die ellendevaart in ons land kan stuit en dis nie ʼn kruisie vir die regte kandidaat by ʼn stemlokaal of wat ook al te maak nie, maar om heilig te leef. Ons moet so anders en opsygesit leef, dat ongelowiges na ons sal kyk en hul tot Jesus wil bekeer. Dis die metode wat Jesus gebruik het om die wêreld van sy tyd om te keer. En hoe het Hy nie daarin geslaag nie! Sy leefwyse het krag aan sy boodskap gegee. Daarom het sy dissipels van Hom geleer. Dit wat Hy gesê het, het Hy uitgeleef.
Ons verlang na ʼn ingrypende verandering in ons land. Moenie vir ʼn nuwe regeringsparty of ander leiers wag nie. Ons het die oplossing voor hande; heilige lewens! En daarvoor het God ons ʼn handleiding gegee - die Bybel. Die Bybel is die handleiding hoe om heilig te leef.
Ons moet Jesus deur ons heilige lewens in ʼn verlore wêreld bemark. Dis uiteraard wat mense destyds na Jesus getrek het : Sy heilige lewe! Daarmee het Hy hul vertroue gewen en die pad na die redding van hulle siele oopgemaak. Wat van jou? Maak plan met die onheiligheid in jou lewe; jy lewe net eenmaal op aarde. Leef dit uit dankbaarheid vir Christus!
Amen!