Gedagtes vir elke dag
Of lees almal by Gedagtes vir elke dag
Die verloop van elkeen van ons se geskiedenis berus by die keuses wat ons maak. Ons kan ook kies om NIE ons eie vyand te wees nie – 'n keuse wat ongelukkig deur baie min mense gemaak word.
GOEIE RAAD VIR 2016
Ds Andrè van den Berg
“Pas dan op dat julle nougeset wandel; nie as onwyse nie, maar as wyse; en koop die tyd uit, omdat die dae boos is. Daarom moet julle nie onverstandig wees nie, maar verstaan wat die wil van die Here is” - Efes.5:15-17
Kyk na die wêreld van 2016 – dis ontsettend boos. Wêreldekonomieë stuur op krisisse af. Mense verloor hul werk of beleggings. Alles getuig van ʼn verlies aan lewensgehalte onsekerheid. Mense vra: “As dit vandag so gaan, wat gaan nie alles môre met ons gebeur nie.
In Efes.5:15-17 gee God vir ons raad hoe om onder moeilike omstandighede reg op te tree. Gevolglik is dit goeie raad vir ʼn Nuwejaar: “Pas dan op dat julle nougeset wandel; nie as onwyse nie, maar as wyse; en koop die tyd uit, omdat die dae boos is. Daarom moet julle nie onverstandig wees nie, maar verstaan wat die wil van die Here is”. Die Bybel waarsku dat mense, veral gelowiges, net voor die wederkoms van Christus, baie moeilik gaan leef.
Satan besef dat sy dae min is en probeer sy laaste hou op die mens inkry. Ongelukkig gaan sommige gelowiges ook in sy spervuur beland soos wat destyds met kinders van die Here in Efese gebeur het. Satan se spervuur kom selfs uit oorde waar gelowiges dit die minste verwag soos die kerk. Christus se grootste teenstand het juis uit die kerkgeledere van sy tyd gekom. En as ek my Bybel reg lees, gaan die geskiedenis hom herhaal.
In Efes.5:15-17 leer God ons hoe om reguit treë in krom tye te gee. En dis raadsaam om na sy Woord te luister omdat die tye al boser word soos wat die wederkoms van Christus nader beweeg. Dit wat ons beleef, is egter niks nuuts nie. God het dikwels in die verlede in mense se lewens ingegryp en dinge vir hulle deurmekaar gekrap net om die legkaartstukke op hul lewensbord te herrangskik. Gevolglik voel ons soms soos ʼn sweefstokswaaier wat die een stok los en deur die lug na die volgende stok trek sonder enige sekerheid dat daar ʼn veiligheidsnet onder ons is.
Hoe moet gelowiges in moeilike omstandighede leef? Wat verwag God van ons in 2016? Hy gee drie rigtingwysers in Efes.5:15-17.
(i) “Pas dan op dat julle nougeset wandel; nie as onwyse nie, maar as wyse”. Die woorde nougeset wandel, het ʼn interessante betekenis in die Grieks. Iemand wat hoog teen ʼn berg op ʼn nou paadjie loop, moet sy oë wawyd oophou. As hy een verkeerde tree gee, val hy hom dood. En dis wat nougeset wandel beteken; hou jou oë oop sodat jy berekende geloofstreë kan gee.
Berekende geloofstreë vra van gelowiges geduld; die geduld om stadiger te leef. Ons leef heeltemal te vinnig. Alles is ʼn gejaag. Ons jaag met ons besluite, maak te vinnig afleidings, praat te vinnig, reageer te vinnig en wil te vinnig regstellings maak en trap gevolglik die versneller van die lewe al hoe dieper in. Ons het net te veel op ons lewensbord; ons kan nie meer spoed verminder nie. Dis dan dat ons nie behoorlik sien waarheen ons gaan nie en val. Satan vang ons vir spoed!
In Ps.46:11 sê God dat gelowiges tot rus moet kom: “... Laat staan en weet dat Ek God is...” Jesus sê: “Kom na My toe almal wat vermoeid en belas is en Ek sal julle rus gee” (Mt.11:28). Ons moet die lewe stadiger vat. Daar is vir Jesus min plek in ʼn gejaagde lewe. En in baie gevalle geen plek nie.
Wie egter spoed verminder en Jesus in sy lewe inlaat, staan dikwels verbaas oor hoeveel meer Jesus vir hom doen as wat hy op sy eie kon regkry. Jesus maak ʼn belofte: “Maar soek eers die koninkryk van God en sy geregtigheid, en al hierdie dinge sal vir julle bygevoeg word” (Mt.6:33). Die eerste rigtingwyser sê: Maak jou oë oop; leef rustiger.
(ii) Die tweede rigtingwyser in Efes.5 is in vers 16: “...en koop die tyd uit, omdat die dae boos is”. Die woorde “en koop die tyd uit” beteken in die Grieks om iets wat kosbaar is vir eiegebruik aan te koop. Tyd is kosbaar. God gee dit. Gebruik dit derhalwe omsigtig.
Paulus volg dit op met die woorde: “ ... omdat die dae boos is”. Toe hy die brief aan die Efesiërs geskryf het, was hy in Rome in ʼn tronk.
Efese was een van die hoofsetels van Romeinse bewind in Klein Asië (vandag Turkye). Die inwoners van Efese het die godin Artemis, wat ook Diana genoem is, aanbid. Sy was die simbool van seksuele losbandigheid wat hoogty in die plaaslike afgodsdiens gevier het. Satan het Efese in ʼn dodelike greep gehad!
In tye van onophoudelike boosheid voel ʼn mens soms om in sak en as te gaan sit. Satan geniet dit! In sulke tye word mense se harte koud en hits die Satan mense aan om die saak van God op aarde te vernietig. Gevolglik ervaar gelowiges teenstand uit alle oorde. God gebruik egter ook hierdie beproewing om gelowiges te suiwer. Die boek Openbaring is vol daarvan. Beproewinge is soms vermomde seëning wat gelowiges die gulde geleenthede vir getuienislewering bied. Wanneer die wêreld om ons die kluts kwytraak, is dit juis die tyd om die lewensveranderende krag van Jesus ten toon te stel. Hoe donkerder die nag, hoe helderder brand die gelowige se lig! Die eerste aanwyser sê: Maak jou oë oop; leef rustiger. Die tweede sê: Spandeer jou tyd reg (koop die tyd uit).
(iii) Die derde aanwyser is in vers 17: “Daarom moet julle nie onverstandig wees nie, maar verstaan wat die wil van die Here is”. In bose tye verloor mense maklik kop. Hulle neem soos ʼn Petrus van ouds die oë van Jesus af weg. Dit gebeur wanneer jy joú wil laat geskied en nie dié van God nie. En sy wil staan duidelik in die Bybel. Mense moet dit net bestudeer. Bitter min doen dit!
Bybelstudie is soos ʼn drilsessie op ʼn skip. Sodra ʼn passasierskip begin vaar, word almal aan boord gewys hoe om die reddingstoerusting vir ʼn noodgeval te gebruik. Wie nie gehoor gee nie, kan sy lewe in ʼn noodgeval verloor. Met God se Woord is dit presies dieselfde!
Vir sommige van ons gaan 2016 ʼn opwindende jaar wees en vir ander miskien teleurstellend. As dit hierdie jaar nie met jou goed gaan nie en dit voel asof alle boosheid op jou afkom, hou Jesus se woorde in gedagte: “Laat julle harte nie ontsteld word nie; glo in God, glo ook in My” (Joh.14:1).
Kom ons som die drie rigtingwysers van Efes.5:15-17 op:
Laat ons (i) nougeset wandel (:15). Ons is inderdaad op ʼn baie nou paadjie hoog teen die berg van die lewe. Baie van ons volksgenote het al skeef getrap en geval. Baie het seer gekry. Sommige is selfs dood. Bid God dat Hy jou oë sal oopmaak dat jy nie ʼn verkeerde tree sal gee nie.
Laat ons (ii) die tyd wat God ons nog op aarde gun, sinvol gebruik. Kom ons los die gejaag na rykdom en eer. Dit is ydelheid. Laat die saak van die Here en die geluk van jou gesin voorkeur geniet.
Laat ons (iii) nie kop verloor nie, maar die wil van God in hierdie nuwe jaar soek.