Gedagtes vir elke dag
Of lees almal by Gedagtes vir elke dag
As Ek die swaard oor 'n land bring, en die mense van die land neem 'n man uit hulle kring en stel hom as wag vir hulle aan, en hy sien die swaard aankom oor die land en waarsku die mense – as iemand hom nie laat waarsku nie en die swaard neem hom weg, dan is sy bloed op sy eie hoof. As daarenteen die wag die swaard sien kom en die basuin nie blaas nie sodat die mense nie gewaarsku is nie, en die swaard neem 'n siel uit hulle weg – sy bloed sal Ek van die hand van die wag eis – Eségiël 33
AARDBEWINGS...
... EN ANDER NATUURRAMPE
Ds A.E. van den Berg
“Want die een nasie sal teen die ander opstaan en die een koninkryk teen die ander; en daar sal hongersnode wees en pessiektes en aardbewings op verskillende plekke” (Mt.24:7).
Die eiland van Tonga is ongeveer ʼn 1000 seemyl van Nieu Seeland se noord-eiland af geleë en was op 14 Januarie vanjaar in die nuus toe ʼn vulkaan na ʼn aardbewing in die nabygeleë see uitgebars het. Die uitbarsting het langer as 12 ure geduur en tot 30 km hoog in die lug op. Niemand het dit verwag nie. Daar was nie eens ʼn waarskuwing nie. Alles het net skielik gebeur wat Tonga vir agt dae van die buitewêreld afgesny het.
Wanneer sal die wederkoms plaasvind? Niemand weet nie; net God. In Mt.24:3 vra die dissipels vir Jesus:
“Vertel ons, wanneer sal hierdie dinge wees, en wat is die teken van u koms en van die voleinding van die wêreld” .
Jesus gee vir hulle vyf van tekens wat dit vooraf sal gaan:
- Daar sal eerstens valse profete wees wat hulle as gestuurdes van Christus sal voordoen.
- Tweedens sal daar oorloë skerp toeneem.
- Derdens sal droogtes, hongersnood en aardbewings toeneem.
- Vierdens sal mense die waarheid verlaat en vyfdens sal mense wêreldwyd die dag van more vrees.
Die wêreld het nog altyd sulke probleme gehad, iets waarvan Jesus deeglik bewus was. Daar kan egter uit sy woorde afgelei word dat dinge in die laaste dae drasties gaan verander en mense sal dink dat die aarde vernietig gaan word.
Kyk ʼn mens na hierdie vyf eindtyd-tekens, bestaan daar geen twyfel dat ons in die peilvlak van Jesus se wederkoms leef nie. Gevoelsgodsdienste mislei miljoene mense wêreldwyd, ook van ons eie volksgenote! Daarbenewens neem oorlog en geweld oorhand toe. Van 1900-1945 was daar bv. 19 groot oorloë in die wêreld. Van 1945-1975 was daar nie minder as 119 nie!
Ons verneem al hoe meer van aardbewings in verskeie wêrelddele. Statistiek toon dat natuurlike rampe ernstig toeneem. Seismoloë bevind dat aardbewings sedert 1990 aansienlik toeneem. In 1990 is daar bv. 2,268 aardbewings wêreldwyd aangeteken. In 1999 het hierdie getal tot 3003 gestyg en in 2010 tot 8,390. Dis ʼn styging van 370% in 30 jaar!
Die Bybel leerdat aardbewings van God kom. Niks gebeur toevallig nie.
“Nogtans is Hy ook wys, en Hy laat die onheil kom...” (Jes.31:2).
God het ʼn doel daarmee.
Wanneer natuurrampe gebeur, sê mense maklik dat dit God se oordeel oor booshede is. Dis nie altyd waar nie. Toe Adam en Eva gesondig het, is die hele skepping met sonde besmet.
“Want ons weet dat die hele skepping tesame sug en tesame in barensnood is tot nou toe” (Rom.8:22).
In ʼn gevalle wêreld moet rampe verwag word. Daarom word sulke rampe natuurrampe genoem omdat dit heel natuurlik op enige plek in die wêreld kan gebeur.
Daar is wel gevalle in die OT waar God sy oordeel met natuurrampe uitgevoer het. Dit was egter nooit die norm nie. Jesus leer dat rampe nie noodwendig die gevolg van sonde is nie. As dit so was, sou ons almal nou dood gewees het! Gelowiges moet rampe eerder as ʼn waarskuwing beskou. God waarsku ongelowiges dat as hulle hul nie bekeer nie, die grootste ramp hulle gaan tref; ʼn ewigheid in die hel!
Het God dan enigsins ʼn doel met aardbewings? Ja, Hy het met alles op die aarde ʼn doel. Baie van die onverklaarbare dinge wat met die mensdom gebeur, sal egter totdat Jesus komverborge bly.
“O, diepte van die rykdom en wysheid en kennis van God! Hoe ondeurgrondelik is sy oordele en onnaspeurlik sy wee! Want wie het die gedagtes van die Here geken, of wie was sy raadsman gewees?” (Rom.11:33,34).
Moses sê:
“Die verborge dinge is vir die Here onse God; maar die geopen-baarde dinge is vir ons en ons kinders.” (Deut.29:29).
In Jes.55:8 sê God:
“Want my gedagtes is nie julle gedagtes nie, en julle wee is nie my wee nie...”
Aardbewings speel ʼn rol in Bybelse profesie. Openbaring praat in vier hoofstukke daarvan, Jesaja in drie, Esegiël in een, Joël in twee en Sagaria in een. Wat leer God ons daardeur? Dis sy geduldige oproep tot bekering:
“Die Here vertraag nie die belofte soos sommige dit vertraging ag nie, maar Hy is lankmoedig oor ons en wil nie hê dat sommige moet vergaan nie, maar dat almal tot bekering moet kom” (2 Pet.3:9).
Die aardbewings van die eindtyd moet ongelowiges wakker skud!
Soos wat die uurglas van die wêreld uitloop, sal daar al hoe meer opstand, geweld en aardbewings voorkom sodat die mensdom kan weet dat Jesus se wederkoms baie naby is.
Nog ʼn les wat natuurrampe ons leer, is dat die lewe uit meer as besittings bestaan. Die lewe behoort aan God. Hy leen dit aan ons. In die Gelykenis van die Ryk Man sê God aan hom:
“... Jou dwaas, in hierdie nag sal hulle jou siel van jou afeis; en wat jy gereed gemaak het, wie s’n sal dit wees?” (Luk.12:20).
God gee en neem lewens soos wat Hy goed dink. Wie dit minag, sal sy fout te laat agterkom!
Die krag van ʼn aardbewing wys vir ons die ontsettende mag waaroor God beskik. Elke mens behoort ontsag daarvoor te hê. Dis immers die vertrekpunt van wysheid:
“Maar aan die mens het Hy gesê: Kyk, die vrees van die Here is wysheid; en om van die kwaad af te wyk, is verstand” (Job.28:28).
Alvorens jy nie die almag van God besef nie, sal jy Hom nooit as jou hemelse Vader leer ken nie. Natuurrampe trek gelowiges nader aan God maar stoot ongelowiges verder van Hom af weg.
Aardbewings is ʼn waarskuwing sowel as ʼn voorsmaak van die ewige straf wat op ongelowiges wag. God wil vir hulle sê:
“As dit so op die aarde gaan, dink net hoeveel erger sal dit in die hel met julle gaan?!”
Wanneer die aarde onder ons voete bewe, besef ons opnuut dat daar geen ander veilige plek is om na te vlug as na God toe nie.
“God is vir ons ʼn toevlug en sterkte; as hulp in benoudhede is Hy in hoë mate beproef. Daarom sal ons nie vrees nie, al waggel die aarde en al wankel die berge....” (Ps.46:2,3)
God hou die natuur in stand:
“want in Hom is alle dinge geskape wat in die hemele en op die aarde is, wat sienlik en onsienlik is, trone sowel as heer-skappye en owerhede en magte – alle dinge is deur Hom en tot Hom geskape. En Hy is voor alle dinge, en in Hom hou alle dinge stand” (Kol.1:16,17).
Laat God natuurrampe voorkom? Ja. Beïnvloed Hy soms die weer? Ja. Let op Elia wat tot God gebid het en daar drie jaar lank geen reën in Israel geval het nie. Elke natuurramp is egter nie ʼn direkte straf van God nie.
Soos wat God toelaat dat mense bose dade verrig, laat Hy ook die aarde toe om die gevolge van die sonde by wyse van natuurrampe te dra. Onthou dat die sondeval alles aangeraak het, ook die wêreld as sulks. So gesien, is sonde die kern-oorsaak van natuurrampe net soos wat dit die kern-oorsaak oorsaak van siekte, lyding en die dood is. Natuurrampe skud mense se vertroue in hulself en waarsku hulle om hulle te bekeer. Dit wil vir hulle sê:
“Soek die HERE terwyl Hy nog te vinde is; roep Hom aan terwyl Hy naby is: (Jes.55:6).