Gedagtes vir elke dag
Of lees almal by Gedagtes vir elke dag
Dikwels kwel ons ons oor die hoeveelheid dae wat ons sal lewe, tog kan dit geen dag vir ons byvoeg of wegneem nie want God het nog voor ons gebore is bepaal presies hoeveel dae elkeen van ons sal lewe. Ook Dawid vertel dit in Ps 139 waar hy sê: "U oë het my ongevormde klomp gesien (toe nog in sy moederskoot); en in u boek is hulle almal opgeskrywe: die dae
wat almal bepaal bepaal was, toe nog geeneen van hulle daar was nie." Waarom kwel ons ons dan?
DIE GROOT VERVAL(3/3)
Ds A.E. van den Berg
“Maar pas op vir die valse profete wat in skaapsklere na julle kom en van binne roofsugtige wolwe is. Aan hulle vrugte sal julle hulle ken....” (Mat.7:15,16).
Valse leraars neem wêreldwyd oorhand toe. Jesus waarsku: “Maar pas op vir die valse profete wat in skaapsklere na julle kom en van binne roofsugtige wolwe is. Aan hulle vrugte sal julle hulle ken....” In die Bybel is skape die simbool van eenvoud en opregtheid. Daarenteen is wolwe die simbool van sluheid en roofsug. Jesus waarsku dat valse leraars skape vaskeer om hulle daarna soos wolwe op te vreet.
Hierdie godsdienswolwe maak op uitsonderlike geestelike begeestering aanspraak en lei baie mense om die bos. Paulus sê dat hulle vyande van die ware geloof is: “Want ek weet dit, dat na my vertrek wrede wolwe onder julle sal inkom en die kudde nie sal spaar nie” (Hand.20:29). Wie nie waak en bid nie, val hulle gereeld ten prooi.
Sedert die begin van die Christendom was daar valse leraars wat voorgee het om God te dien en het baie mense met hul leuens besmet. Sommige het profeteklere gedra, 'n mondering waaraan die profete van ouds uitgeken is, net om mense te mislei.
Vroeë kerklike geskrifte maak ook van Christus-handelaars melding wat die rondte gedoen en geld met self georkestreerde opwekkingsdienste gemaak het. Lukas skryf: “Want nie lank gelede nie het Theudas opgestaan en gesê dat hy iets besonders was. By hom het 'n aantal mense – omtrent vierhonderd – aangesluit. Hy is gedood, en almal wat na hom geluister het, is uitmekaar gejaag .... En na hom het Judas, die Galileër, opgestaan, in die dae van die inskrywing, en 'n aansienlike getal mense afvallig gemaak agter hom aan. Hy het ook omgekom, en almal wat na hom geluister het, is verstrooi” (Hand.5:36,37).
Judas, die Sendbrief-skrywer, was uiters besorg oor die toename in valse leraars en sê: “Want sekere mense het ingesluip wat lank tevore al opgeskryf is vir hierdie oordeel, goddelose mense wat die genade van onse God verander in ongebondenheid en die enigste Heerser, God, en onse Here Jesus Christus verloën” (Judas:4).
Hierdie valse leraars het so subtiel te werk gegaan, dat mense nie hul booshede bemerk het nie. Die woord insluip dui op 'n misdadiger wat uit 'n land gesit is net om kort daarna weer ongemerk terug te keer. Judas skryf dat hierdie misleiers lank tevore al opgeskryf is. God het hulle van die begin af vir die hel bestem. Daarom sondig hulle sonder skuldgevoelens. Hoe hulle die kerk van destyds binnegekom het, is onduidelik. Miskien het die geestelike wagters hul bewakingstaak verwaarloos!
Kerke word selde van buite af geskaad. Satan gebruik eerder mense binne in die kerk om dit te skaad. Een duiwel binne in die kerk is meer werd as 'n duisend daarbuite! Hierdie valse profete het geen roeping van God ontvang nie. Hulle misbruik die formele bediening om hul volgelinge met godsdienslekkernye te voer wat geen geestelike kilojoules bevat nie.
Dis gelowiges se plig om hierdie misleiers te ontmasker: “Geliefdes, glo nie elke gees nie, maar stel die geeste op die proef of hulle uit God is, want baie valse profete het in die wêreld uitgegaan” (1 Joh.4:1). Misleiers het hoegenaamd geen opdrag van God ontvang nie, maar wel van die Satan!
'n Leraar van God is nie 'n toekomsvoorspeller nie, maar 'n geestelike leermeester wat deeglik in die Woord van God onderleg en in die godsaligheid geoefen is. Die vroeë kerk het juis gegroei omdat die eerste leraars die apostels as leermeesters gehad het. God het hulle almal met die goddelike gawe van die onderskeiding van die geeste geseën (1 Kor.12:10). Ongelukkig het baie mense wat aanvanklik na hulle geluister het hul ore aan vreemde leer uitgeleen en gevolglik hulself met dwaalleer besmet.
Gelowiges moet God met hul hele lewe eer: “En beproef wat die Here welbehaaglik is; en hou nie gemeenskap met die onvrugbare werke van die duisternis nie, maar bestraf dit liewer” (Efes.5:10,11). Daarvoor gee God hulle sy Woord as wapen:
“ Eindelik, my broeders, word kragtig in die Here en in die krag van sy sterkte. Trek die volle wapenrusting van God aan, sodat julle staande kan bly teen die liste van die duiwel. Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug. Daarom, neem die volle wapenrusting van God op, sodat julle weerstand kan bied in die dag van onheil en, nadat julle alles volbring het, staande kan bly. Staan dan vas, julle lendene met die waarheid omgord, met die borswapen van die geregtigheid aan, en as skoene aan julle voete die bereidheid vir die evangelie van vrede. Behalwe dit alles neem die skild van die geloof op waarmee julle al die vurige pyle van die Bose sal kan uitblus. En neem aan die helm van verlossing en die swaard van die Gees — dit is die woord van God” (Efes.6:10-17).
Om Satan en sy handlangers die hoof te bied, moet gelowiges die Bybel goed leer ken: “Die hele inhoud van u woord is waarheid, en al u regverdige verordeninge is tot in ewigheid” (Ps.119:160). Die Bybel is die enigste gereedskap waarmee die wortels van dwaalleer uitgespit en die kerk van Jesus suiwer gehou kan word.
Toe valse profete Juda destyds mislei het, het Jesaja dit nie gelate aanvaar nie, maar sy volk tot besinning opgeroep: “Kom, huis van Jakob, en laat ons wandel in die lig van die Here” (Jes.2:5). Gelowiges moet mense wat in die duisternis verkeer na die lig van die waarheid bring. Jesus sê: “As julle My liefhet, bewaar my gebooie” (Joh.14:15). 'n Liefde vir die waarheid is die beste bewys van die bekering.
Die skrywer van Hebreërs sê: “Want die woord van God is lewend en kragtig en skerper as enige tweesnydende swaard, en dring deur tot die skeiding van siel en gees en van gewrigte en murg, en is ’n beoordelaar van die oorlegginge en gedagtes van die hart” (Heb.4:12).
'n Volk se herstel vind nie sonder geestelike herstel plaas nie. Gelowiges moet die groot waarhede van die Bybel opnuut onder afvallige volksgenote se aandag bring en getuig dat die Bybel van A tot Z die enigste ware kenbron is: “Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid” (2 Tim.3:16).
Gelowiges moet egter ook seker maak dat hulle self in die waarheid vas staan. “Maar bly jy in wat jy geleer is en waarvan jy verseker is, omdat jy weet van wie jy dit geleer het en dat jy van kleins af die heilige Skrifte ken wat jou wys kan maak tot saligheid deur die geloof in Christus Jesus” (2 Tim.3:14,15).
Wie die waarheid verkondig, sal altyd die Satan se vyandige vuur op hom trek: “En die draak was vertoornd .... en hy het weggegaan om oorlog te voer teen hulle wat die gebooie van God bewaar en die getuienisse van Jesus hou” (Open.12:17).
Die ware kerk gaan voor die wederkoms van Jesus baie klein word, maar steeds staande bly omdat Jesus dit vanuit die hemel regeer. Hy sorg deur die eeue heen dat daar leraars is wat die Bybelse waarhede verkondig totdat Hy kom. Die waarheid sal nooit deur leuens toe-geploeg word nie. Daarvoor hou God gelowiges vas: “My gange het vasgehou aan u spore, my voetstappe het nie gewankel nie” (Ps.17:5).
Valse leraars sal nie die ewige straf van God ontduik nie. Petrus skryf dat dit vir hulle beter sou wees indien hulle nooit die weg van die waarheid geken en dit daarna verlaat het nie. Misleiding is altyd veel erger as onkunde. Gevolglik is die pad na die hel spreekwoordelik met die skedels van duisende valse profete geplavei. Wat 'n verskriklike oordeel wag daar nie op hulle nie!