Gedagtes vir elke dag
Of lees almal by Gedagtes vir elke dag
Woorde is magtig en kan ander baie gelukkig of baie seer maak. Woorde is ook openbarend oor wie jy werklik is. Jou karakter skyn sommer gou deur jou woorde. Wees versigtig wat jy sê – jy het 'n veranderwoordelikheid teenoor ander sowel as teenoor jouself. Dink vóór jy praat, en wees daarmee anders as die meeste mense wat onnadenkend leef.
DIE WEDERKOMS (3)
Ds A.E. van den Berg
” Maar laat hierdie een ding julle nie ontgaan nie, geliefdes, dat een dag by die Here soos duisend jaar is en duisend jaar soos een dag” (2 Pet.3:8)
Niemand weet op watter dag en datum Jesus weer aarde toe kom nie. Jesus sê in sy profetiese Rede dat selfs die engele in die hemel nie eens weet wanneer Hy weer kom nie. Al wat gelowiges moet doen, is om Jesus se belofte vas te hou en nooit te twyfel dat Hy vir seker weer sal kom nie.
Kort voor sy kruisiging sê Hy vir sy dissipels: “ Laat julle hart nie ontsteld word nie; glo in God, glo ook in My. In die huis van my Vader is daar baie wonings; as dit nie so was nie, sou Ek dit vir julle gesê het. Ek gaan om vir julle plek te berei. En as Ek gegaan en vir julle plek berei het, kom Ek weer en sal julle na My toe neem, sodat julle ook kan wees waar Ek is” (Joh14:1-3).
Petrus vat in die gelese gedeelte alles wat gelowiges oor die eindtyd moet weet in 'n neutedop saam. Eerstens dat ons reeds in die eindtyd is; iets wat met Jesus se eerste koms na die aarde begin het. Ons jaartelling getuig immers daarvan. Die geskiedenis word in 'n voor Christus - en 'n na Christus-era verdeel en sodoende word van Jesus die snypunt van die geskiedenis gemaak. Die Hebreër-briefskrywer skryf: “Nadat God baie keer en op baie maniere in die ou tyd gespreek het… het Hy in hierdie laaste dae tot ons gepreek deur die Seun”(1:1).
Die eerste gelowiges het die wederkoms baie gou verwag. Toe jare verloop en niks daarvan gebeur het nie, het sommige ernstig begin twyfel of Jesus werklik weer sou kom en of hulle sy uitsprake oor sy wederkoms nie miskien anders moes verstaan nie. Daar was destyds ook spotters, miskien ook in eie kerk-geledere, wat gesê het: “Waar is die belofte van sy wederkoms?” Daar gebeur dan niks nie!
Petrus geageer op hulle spot-vraag deur na die verlede terug te kyk; en baie ver ook; terug tot by die dae van Noag wat gedurig onder spotters deurgeloop het toe hy jare lank aan 'n reuse boot ongeveer 700 km van die naaste see af onverpoosd gebou het.
In 2 Pet.3:7 raai Petrus sy lesers aan om altyd terug te kyk na wat God in die verlede gedoen het. Die spotters het hul nie aan Noag se waarskuwings gesteur nie totdat dit op 'n bepaalde dag onophoudelik begin reën en die ganse mensdom, op agt na, almal in die vloed omgekom het.
Dat Jesus nog nie weer teruggekeer het nie, beteken nie dat Hy sy belofte verbreek het nie. As God almagtig, hou Hy altyd sy woord. Vir sy wederkoms het Hy, net soos destyds met die sondvloed, 'n bepaalde dag bepaal waarvan net Hy weet. Gevolglik roep die Bybel gelowiges telkens op om met volgehou afwagting Jesus se tweede koms te verwag. Daardie dag is vandag baie nader is as toe Hy die uitsprake gemaak het. Daar sal weer spotters wees en weereens lelik tweede kom!
In 2 Pet.3:8 sê Petrus iets belangrik wat gelowiges altyd in gedagte moet hou. God beskou tyd baie anders as die mens. So is 1000 jaar vir Hom soos een enkele dag. Gelowiges moet hul horlosies as te ware met dié van God sinchroniseer om die dinge van die eindtyd te kan verstaan. Ons moet by Hom aanpas en nie Hy by ons nie.
Moet dus nie spekuleer oor wanneer Hy weer kom nie. Ons moet eerder soos Noag by mense aandring om hulle vir daardie dag gereed te kry.
Dink aan Jesus se waarskuwing in die Gelykenis van die Tien Maagde:“ Later kom toe die ander maagde en sê: Meneer, Meneer, maak vir ons oop! Maar hy antwoord en sê: Voorwaar ek sê vir julle, ek ken julle nie. Waak dan, omdat julle die dag en die uur nie weet waarop die Seun van die mens kom nie” (Mat 25:11-13).
Petrus gee in vers 9 'n belangrike rede waarom die wederkoms nog nie plaasgevind het nie. Jesus talm omdat daar nog te veel leë sitplekke aan die feesmaal-tafel is. Aan die einde van die tyd wag daar op gelowiges 'n hemelse feesmaal. Al die plekke aan die feesmaal-tafel moet eers gevul word alvorens Jesus kom. Een ding moet ons weet: God het nie mense vir die hel bestem nie, maar vir 'n hemelse feesmaal. Alvorens hierdie getal nie vol is nie, kom Jesus nie.
Petrus noem in vers 12 iets belangrik nl. dat die wederkomsdatum nie vas en onveranderlik is nie. Gelowiges kan dit derhalwe deur hul getuienis verhaas of vertraag. Getuienis bring die dag van die wederkoms as’t ware nader. Hoe meer mense tot bekering kom, hoe gouer word die sitplekke vol en kan die fees begin.
Hierdie waarheid roep gelowiges tot volgehoue, ernstige getuienis op. Ons kan die feesmaal vol en die tyd korter praat. Gevolglik rus die eindtyd op twee pilare – die eerste is Jesus se hemelvaart en die tweede sy wederkoms. Deur getuienislewering en bekerings skuif hierdie twee pilare nader aan mekaar. Hoe meer laks ons is, hoe verder skuif hul van mekaar af weg.
In vers 13 sê Petrus dat gelowiges op pad na hul ewige adres is; dié van die fees-saal in die hoofstraat van die nuwe Jerusalem. Dis die Vaderhuis waarvan Jesus in Joh.14 praat. Hierdie heerlike vooruitsig moet gelowiges so opgewonde maak dat hulle amper nie dag kan afwag nie! Gelukkig is die uurglas van die lewe besig om vinnig te sak en die tyd vir die feesmaal al hoe nader te bring.
Ons het gehoor wat mense oor Jesus se wederkoms sê, maar wat sê Hy self daaroor?
In Mat 24 vra die dissipels van Hom 'n aanduiding oor hoe ver die wederkoms nog is. Jesus noem geen datum nie, maar sê slegs dat die tydperk net voor die wederkoms deur onaangename gebeure met 'n geweldige impak op die mensdom gaan hê. Dis ook nie net tot een geslag beperk nie, maar sal herhaaldelik oor die hele wêreld voorkom tot op die dag dat Jesus op die wolke kom. Gelowiges sal in hierdie tyd opnuut besef dat hulle slegs pelgrims op die aarde is.
Jesus waarsku dat daar booswigte na vore sal kom wat daarop aanspraak sal maak dat hulle die beloofde Messias is, mense mislei en duisende volgelinge sal hê. Verder sê Jesus dat sy koms so omvangryk sal wees, dat dit wêreldwyd waargeneem sal word.
'n Paar jaar gelede lees ek van 'n teoloog wat hierdie belofte van Jesus betwyfel en sê omdat die aarde nie plat nie maar rond is, dit vir Jesus onmoontlik sou wees om deur almal om op een tydstip wêreldwyd gesien te word. Hierdie man het duidelik met God se skeppingskrag 'n probleem. Het God dan nie die aarde uit niks geskep nie?
Wat kan wonderliker as dit wees? Indien dit vir Hom moontlik was om die aarde uit niks te skep, waarom sal dit nie vir Hom moontlik wees om sy Seun so te laat verskyn dat elke mens dit op die selfde tydstip sien nie?
Wat moet gelowiges wat werklik na Jesus se wederkoms uitsien in tussentyd doen? Maar sommetjies maak en oor die dag en datum daarvan spekuleer? Nee, ons moet op ons pos wees en geduldig op ons hemelse bruidegom wag. Ons mag nie soos die vyf dwase maagde wat ook op die bruidegom se koms gewag het, maar nie gereed was nie, onkant betrap word nie. Ons moet soos die vyf verstandige maagde aktief op Jesus wag om aan die einde te hoor: “Mooi so, goeie en getroue dienskneg, oor weinig was jy getrou, oor veel sal Ek jou aanstel. Gaan in in die vreugde van jou heer” (Mat.25:21).