Gedagtes vir elke dag
Of lees almal by Gedagtes vir elke dag
HERE, leer my die stilte van nederigheid, die stilte van wysheid, die stilte van konsentrasie, dit stilte wat praat sonder woorde, die stilte van geloof, maar veral om my hart stil te maak sodat ek die influistering van u Gees kan hoor.
WARE KWINKSLAE (17)
Humor in die Anglo-Boereoorlog 1899-1902
Samesteller: Elria Wessels
Lees reeks by Ware kwinkslae
Oom Ben Wasserman, W.H. Ackerman se Opsaal!, p. 169:
Op kommando het dominee Burger van Middelburg altyd 'n pakmuiltjie gehad waarop al sy losgoed vasgebind was, en die muiltjie het oral agter hom aangedraf. Dominee Burger het die kommando's gereeld besoek en dienste gehou. Soms het hy lank by Jack Hindon se korps gebly en dan weer na 'n ander kommando vertrek. Ons was eenmaal weer afgesaal op Nooitgedacht en dominee Burger was by ons. Onderkant ons was 'n groot pan waarheen die muiltjie altyd gedwaal het om water te gaan suip en in die groen gras langs die kant te wei. Maar hierdie muiltjie het die nuk gehad om altyd eenkant te wei as Dominee hom nodig gehad het, tot groot ontsteltenis van sy eienaar. Ek en 'n maat was op kampwag en het bokant die pan in die lang gras gesit toe ons Dominee hoor aankom.
"De stoute muiltje, de stoute muiltje," word al van ver gehoor onderwyl Dominee aangestryk kom in die rigting van die pan waar hy wis die muiltjie sou wees. Ons planne was gou agtermekaar om Dominee so 'n bietjie skrik te maak en net toe hy so 'n paar tree van ons af was, spring ons op en skree gelyktydig: "Hendsop!"
Die ou dominee het vasgesteek, die hande in die lug gesteek en gesê: "Of course I'll hands up."
Niemand hoef te vra of Dominee vir ons kwaad was me, want "de stoute jongens" moes die aand lelik soebat of Jack Hindon het ons laat beesvel ry.
Jan Hendrik Scholtz, 'n Penkop op kommando, p. 36:
'n Dominee was êrens in die laer by geleentheid van 'n diens besig om te bid. Terwyl almal ernstig na die dominee luister, word hulle konsentrasie skielik verbreek deur die geklap van perdepote. Iemand wat duidelik baie haastig was, was besig om die laer te nader. Die volgende oomblik kom oom Hans aangejaag. Hy het êrens 'n rook gesien — miskien 'n veldbrand of so iets — en hom doodgeskrik.
Sy mauser was agter sy rug met vyf patrone in die magasyn. Hy skiet die vyf skote met sy een hand agter sy rug af terwyl hy skree: "Julle bid nog en hier kom die Engelse al met 'n gepantserde trein oor die bult!"
Ewe verbaas antwoord sy medeburgers: "Hans, is jy miskien dronk? Hier is glad nie eers 'n treinspoor in die nabyheid nie. Kan 'n trein dan met 'n wapad oor die bult kom?"
Toe was die gort natuurlik gaar en dit het lank geneem om oom Hans te kalmeer.
Jan H. Meyer, Kommando-jare, p. 329:
Daar is daardie dag feesgevier toe die laaste Britse vesting in Springbok geval het. Die plaaslike hotel se kroeg het veral goed te pas gekom. Dit het uitermate jolig gegaan, totdat die eerbiedwaardige dominee Kriel meteens op die toneel aankom. Toe ek gewaar, staan die gryse ou dominee bo-op die toonbank met sy knoetsige wandelstok en die volgende oomblik sien jy net bottels van die rakke af waai en te pletter val. Terwyl die dominee nog besig is met sy verwoestingswerk, kom oom Hansie Groesbeek, 'n man wat lief was vir sy dop, van buite af ingestap.
Oom Hansie steek viervoet in sy spore vas. Sy oë peul amper uit sy kop uit van verbystering oor die toneel wat hy nou hier voor hom aanskou.
"Wat de donder doen jy nou!" roep hy uit en voeg nog 'n paar fris knope by.
Dominee Kriel tol op sy hakke om om te sien wie dit is wat hom so durf aanspreek. Oom Hansie slaan amper op die vloer neer.
Dog selfs die verbiedende teenwoordigheid van die dominee kon nie verhoed dat oom Hansie met sy "buit" wegkom nie. Voor jy kon sê "mes", het die oubaas 'n bottel onder die arm en trek hy soos 'n pyl uit 'n boog by die deur uit!
R.D. McDonald, 'n Terugblik op my oorlogsjare, p. 57:
Op 'n goeie dag het ons weer gevlug. Een van die burgers het by dominee Marquard verbygeja en aan hom gevra: "Vlug jy ook, Boetie?"
Die aand het die dominee 'n diens vir die burgers gehou en tot teks geneem die vraag van Nehemia: "Sal 'n man soos ek vlug?"
Die vriend was een van die toehoorders en het toe eers ontdek dat die boetie by wie hy verbygeja het, die leraar van Winburg was!
J.S. Malan, Luitenant John Bernard Andrews van die Veldtelegrafie, Renier-versameling:
Terwyl die Pretoriase kommando gewag het vir die mis om op te klaar, het ou dominee Kriel 'n diens gehou. Hy het op 'n klip gestaan en terwyl hy bid, klap 'n skoot van die vyand teen die klip. Die ou dominee het seker nog nooit in sy lewe so vinnig "amen" gesê nie, alhoewel hy niks onbehoorliks uitgeroep het nie.
Dit was Louis Botha... uit OM 5000/149 J.B. Wessels:
Tydens die samesprekings by Val in die distrik van Standerton was generaal Louis Botha besig om kaart te speel saam met sy offisiere — iets waarvoor hy baie lief was — toe hulle hom kom roep vir 'n diens wat dominee A. Burger wou hou. Hy gooi sy kaarte so op die tafel neer en sê: "Kom, die knopgatte wil al weer bid!"
Vervolg...