Gedagtes vir elke dag
Of lees almal by Gedagtes vir elke dag
Dis jammer dat die samelewing pyn en lyding as ‘n ergernis beskou. Dis ‘n wanopvatting waarvan ons ontslae sal moet raak. Die Woord van God sê dat ons deur lyding heen geestelik groei.
GOD IS 'N TOEVLUG
Lees reeks by Pitkos vir die siel
Ds AE van den Berg
“Hy wat in die skuilplek van die Allerhoogste sit, sal vernag in die skaduwee van die Almagtige (Ps.91:1).
Ons dink elke jaar op 11 September terug aan die gebeure wat die wêreld in 2001 geskud het toe Islamitiese terroriste twee wolkekrabbers in New York in puin gelê het. Die beeldmateriaal daarvan sal ‘n mens altyd bybly. Terrorisme het ook in Suid-Afrika ‘n huishoudelike woord geword. Dink maar aan die ANC se bomontploffings wat ‘n paar jaar gelede etlike lewens in Pretoria geëis het.
Die woordeboek omskryf terreur as hewige vrees. Terrorisme is die gebruik van mag en/of dreigemente om mense so bang te maak, dat hulle hul aan die verfoeilike doelstellings van die booswigte onderwerp.
Satan is ook ‘n terroris wat mense in vrees laat leef. Daarom val hy mense, gesinne, kerke en gemeenskappe aan. Kyk maar net wat in 1994 met ons land gebeur het toe die Christelike bestel afgebreek en Satan beheer oor die land verkry het - die misdaadsyfer het die hoogte ingeskiet! Suid-Afrika het een van die gevaarlikste lande ter wêreld geword met gemiddeld 60 moorde per dag! Dit gebeur wanneer die grootste terroris van alle tyde, Satan, vrymag ontvang! Jesus sê van hom: “...Hy was ‘n mensemoordenaar van die begin af....” (Joh.8:44).
Wat kan ons teen hierdie terroris doen? Ons kan ‘n beskermingsplan uitneem - die 911 beskermingsplan (Ps.91:1). “Hy wat in die skuilplek van die Allerhoogste sit, sal vernag in die skaduwee van die Almagtige” Die woord vernag beteken beskerm. Gelowiges sal deur die Almagtige beskerm word. Wanneer Satan (geestelike terroris) ons aanval, lees ons Ps.91:1. Dis ons persoonlike 911-polis met drie groot voordele.
(i) ONS KAN NA GOD HARDLOOP. Nood laat ‘n mens òf na òf weg van God beweeg. In vers 1 tree die skrywer reg op deur na God toe te hardloop. Ps.91:1 is nie universeel nie, maar slegs vir diegene wat God ken en by Hom bly. Dis vir kinders van God wat in die Vaderhuis tuis is. Die polis maak nie vir mense wat net af en toe kom kuier voorsiening nie. Dis slegs vir permanente inwoners en nie vir gaste nie.
Dawid praat van hierdie geestelike verblyf : “Een ding het ek van die Here begeer, dit sal ek soek, dat ek al die dae van my lewe mag woon in die huis van die Here...” (Ps.27:4). Paulus sê in Hand.17:28 “Want in Hom lewe ons, beweeg ons en is ons...” en in 2 Kor. 5:8 dat hy eerder by die Here wil inwoon as uitwoon.
Watter voordeel het hierdie vaderhuis vir gelowiges? Vers 1 sê dat dit ‘n skuilplek is - ‘n plek van heilige verkeer met die Vader. “Want U, Here, is my toevlug. Die Allerhoogste het jy jou beskutting gemaak” (:9). Salomo sê: “Die Naam van die Here is ‘n sterk toring; die regverdige hardloop daarin en word beskerm” (Spr.18:10). Die vaderhuis is ook ‘n geestelike fort.
Luther skryf in Ges.265: “ ‘n Vaste burg is onse God, ons skuil in Hom, die sterke...” ‘n Burg is ‘n ondeurdringbare verdedigingsvesting. So is God vir sy kinders. Niemand is teen Hom bestand nie, nie eens Satan nie. Paulus skryf in 2 Thess.2:8 dat God die Antichris op die oordeelsdag met sy asem sal vernietig!
Hoe lyk hierdie sterke God werklik? In die Bybelse tyd het ‘n naam ‘n persoon se karakter beskryf. Ook God s’n. Ps. 91 gebruik vier name vir Hom wat iets belangrik sê waarom gelowiges in nood na Hom hardloop.
Vers 1 en 9 noem Hom die ALLERHOOGSTE (El Eljon); die hoogste in beheer van alles. Gelowiges kan na Hom hardloop omdat Hy bo alles verhewe is. Verder noem vers 1 Hom die ALMAGTIGE (El Shaddai). Die kernbetekenis van hierdie woord kom van ‘n woord wat berg beteken. Dit dui op God se krag en genoegsaamheid. Tydens die verbondsluiting met Abraham (Gen.17) openbaar God Hom so. As Almagtige kan gelowiges na Hom hardloop omdat Hy die hoogste mag is.
Vers 2 en 9 noem Hom HERE (Jahwe). Dit beteken om te wees. God sê aan Moses “EK IS WAT EK IS” (Ex.3:14); ‘n beskrywing van sy onveranderlike karakter. In ‘n wêreld waar waardes, sedes en wette gedurig verander, vind gelowiges die enigste vastigheid en geborgenheid in ‘n God wat nooit verander nie. Daarom hardloop hulle na Hom. Vers 2 praat verder van Hom as God (Elohim). Dit beteken dat Hy bo afgode verhewe is. Hy is die sterk Een, die magtige Leier en die hoogste God. Na so ‘n Een hardloop gelowiges graag.
Jare gelede het ‘n vernietigende veldbrand in die Yellowstone Nasionale Park (VSA) gewoed. Nadat dit geblus is, het ‘n veldwagter by ‘n boomstam ‘n voël gevind wat verbrand het. Toe hy met ‘n stok aan haar krap, het drie kuikens onder haar dooie vlerke uitgedop. Dié liefdevolle moeder het geweet wat kom, haar kuikens uit die nes geneem en op die grond met haar vlerke toegemaak. Sy kon hulle net sowel gelos en na veiligheid gevlieg het. Sy het egter geweier om haar kinders in die steek te laat en gesterf sodat hulle kon lewe. “Hy sal jou dek met sy vlerke, en onder sy vleuels sal jy skuil....” (Ps.91:4).
Mense hardloop in tye van nood, fisies of psigies. Soms beide! Dit maak nie saak nie. Solank as wat die rigting reg is. Moet nooit van God af weghardloop nie, maar eerder na Hom toe. Maak van die beskerming wat Hy voorsien gebruik. Hy is bo die menslike situasie verhewe, het alle mag in die hemel en op die aarde en is buitendien ook onveranderlik. Woorde soos skuilplek, toevlug en bergvesting spreek van behoud. God wil nie sy kinders verdelg nie, maar eerder behou.
Dit bring ons by die tweede voordeel van die 911-polis. Die eerste is dat gelowiges na God in nood kan hardloop. Tweedens bring dit hulle in ‘n PERSOONLIKE VERHOUDING MET GOD. “Ek sal tot die Here sê: My toevlug en my bergvesting, my God op wie ek vertrou (:2). Drie maal hoor ons die woord my. Dit spreek van ‘n persoonlike verhouding; ek ken God en Hy vir my. Baie mense is met God bekend, maar ken Hom nie op persoonlike vlak nie.
Watter voordeel het dié persoonlike verhouding vir gelowiges? Vers 3 gee die antwoord - God red hulle uit die net van die voëlvanger en van die verderflike pes. Die voëlvanger dui op gevaar van buite en verderflike pes op dié van binne. God bewaar sy kinders onder alle omstandighede. “U sluit my in van agter en van voor, en U lê u hand op my” (Ps.139:5).
Ps.91 praat van talle bedreigings - skrik, pyle, peste, boosheid ens. Ja, dit voel soms asof die lewe so buite beheer raak, dat ons die slagoffers van ons omstandighede geword het. Ons antwoord dikwels op ‘n groet deur te sê: “Dit gaan goed onder omstandighede” Waarom onder? Wat doen ons onder ons omstandighede? Die lewe is soos ‘n matras; as ons bo-op is, slaap ons rustig. As ons onder dit beland, versmoor ons! God wil dat ons bo-op ons omstandighede kom en daar bly. Die 911-polis maak juis duidelike voorsiening daarvoor.
Dit bring ons by die derde voordeel van die 911-polis: ONS LEER OM OP GOD SE BELOFTES TE VERTROU. Die eerste is dat ons na God kan hardloop. Tweedens dat ons in ‘n persoonlike verhouding met Hom staan en derdens dat ons op God se beloftes moet vertrou. “Omdat hy My liefhet, sê God, daarom sal Ek hom red; Ek sal hom beskerm, omdat hy my Naam ken. Hy sal My aanroep, en Ek sal hom verhoor; in die nood sal Ek by hom wees; Ek sal hom uitred en eer aan hom gee. Met lente van dae sal Ek hom versadig, en Ek sal hom my heil laat sien” (:14-16).
Wat sê dit vir ons? Dat God in beheer is al gaan dit ook hoe moeilik met ons. In vers 11 sê die Psalmdigter dat God selfs sy engele opdrag gee om ons te beskerm. In Ps.91 sê God sewe maal Ek sal. (i) Ek sal hom red (ii) Ek sal hom beskerm (iii) Ek sal hom verhoor (iv) Ek sal by hom wees (v) Ek sal hom uitred (verlos) (vi) Ek sal hom versadig. (vii) Ek sal hom My heil laat sien. Wat het ons meer as dit nodig?!
Die ramp van 9 September 2001 was ‘n groot tragedie. Die grootste tragedie is en bly egter dat die meeste mense nie die 911-polis van God wil hê nie!