Gedagtes vir elke dag
Of lees almal by Gedagtes vir elke dag
Op die lughawe van Bangkok staan daar in groot letters geskryf: “Welkom in Thailand, die land waar elke mens ‘n glimlag dra!” Dis wat ‘n gelukkige mens moet doen – ‘n glimlag dra. Sonder ‘n glimlag is jy nooit volledig geklee nie.
STUDIE VAN DIE OU TESTAMENT (28)
DIE AFRIKAANSE PROTESTANTSE BYBELSKOOL
Studieleier: ds. Andrè van den Berg (Sr)
Lees reeks by Studie van die Ou Testament
LES 4
SIMSON
Rigt 13-16
1. Simson word gebore
Soos Jefta sy volk van Ammon verlos het, het Simson die Israeliete van die Filistyne verlos. Jefta en Simson was tydgenote en het aan weerskante van die Jordaan gewoon. Jefta was in die Oosland en Simson in die Wes-Jordaanland. Wat Simson se optrede so uitsonderlik maak, is dat hy nie deur volksgenote gehelp is nie. God het hom met uitsonderlike liggaamskrag toegerus om man alleen die vyand die loef af te steek. Simson was egter ʼn man wie se lewe deur lig en donker, krag en swakheid, goddelike roepingsbewustheid en vleeslike optredes gekenmerk is.
ʼn Engel het sy moeder meegedeel dat sy ʼn besonderse seun in die wêreld sou bring. Dit was die tweede keer dat so ʼn iets gebeur het. ʼn Engel het ook Isak se koms aangekondig. Met die geboorte van Isak het God sy volk begin vorm. Met Simson se geboorte het Hy hul begin verlos. Simson moes ʼn nasireër wees; iemand wat op vir God afgesonder is.
Toe Manoag van die verskyning verneem, het hy God versoek om die engel weer te stuur. Dit het gebeur waar Manoag teenwoordig was. Toe Simson gebore is, het sy moeder hom Simson genoem. Dis ʼn Hebreeuse woord wat met die son verband hou. Miskien het sy aan Debora se woorde in Rigt.5:31 gedink.
2. Simson trou
Simson het in ʼn dorpie naby die Filistynse grens grootgeword en van jongs af in die gevegskuns belang gestel. Alhoewel die Filistyne oor Israel geheers het, was die situasie geensins gespanne nie. Die Israeliete het selfs vrye toegang tot die Filistynse stede gehad. So het dit dan gebeur dat Simson op ʼn Filistynse meisie verlief geraak het. Israel se onderworpenheid aan ʼn heidenvolk het Simson egter gehinder en het hy met hulle begin skoor soek. Toe sy ouers van sy voorneme hoor om met die vreemde meisie te trou, was hulle sielsongelukkig. God het verbastering nie goedgekeur nie (Ex.34:15,16). God het egter ʼn plan met hierdie volksvreemde huwelik gehad.
Op een van sy reise na Timna het Simson ʼn leeu doodgemaak. Dit was sy eerste bonatuurlike kragvertoon. Hy was deeglik van sy goddelike roeping bewus. Sy lang hare moes iets daarvan verraai het. God het die voorval met die leeu egter gebruik om hom te laat besef dat hy iemand besonders was. Hy was heilig en derhalwe vir God afgesonder. Hy moes egter die geheim van sy krag en roeping bewaar. Toe hy later van tyd by die verdroogde karkas van die leeu verbygaan, het hy heuning daarin gevind en daarvan saamgeneem.
Ná die huwelik het Simson ʼn ete voorgesit en die gebruiklike raaisel opgegee. Dit was destyds die gebruik en baie gewild. Wenners het ʼn prys gekry en verloorders is beboet. Simson se raaisel was eintlik ʼn stelling. Die gaste moes sê waarop dit betrekking gehad het. Simson was daarop uit om die Filistyne in ʼn minderwaardige lig te stel.
Na baie kopkrap het hulle die bruid geïntimideer. Sy het absoluut niks van Simson se wedervaring met die leeu geweet nie. Sy moes vir hulle die antwoord kry, anders sou hulle haar pa se huis afbrand! Daarom het sy by hom vir die oplossing begin aandring. Vrees het haar liefde oorheers waarna Simson voor vrouetrane geswig het. Nadat die gaste die uitleg gegee het, het Simson besef dat hulle dit nie self ontrafel het nie. Hy het die boete betaal deur 30 Filistyne dood te slaan en hulle klere aan die wenners te gee. Dit was sy eerste onderonsie met die Filistyne.
Alhoewel Simson ontstoke daar weg is, het hy gemeen dat hy ten minste sy vrou behou het. Sy skoonpa het anders gedink en haar aan sy strooijonker as vrou gegee. Daarna het Simson hulle oes aan die brand gesteek. Die Filistyne het weerwraak geneem en die huis van sy gewese vrou met al haar mense daarin aan die brand te steek. Daarna het Simson weer ʼn klomp Filistyne laat doodmaak. Dit was ʼn hele kettingreaksie van wraak en weerwraak!
3. Die slag by Legi en Roepersfontein
Toe Simson die vyand wou uitlos, het hulle na hom kom soek waarna die vonke weer gespat het. Nadat Juda vir Simson van skoorsoekery verwyt het, het Simson hom vrywillig laat bind waarna Juda hom aan die Filistyne uitgelewer en vrede verwag het. Simson het egter die toue gebreek en m.b.v. ʼn eselskakebeen (legi) ʼn duisend Filistyne doodgeslaan. Daarna is die plek Legi genoem.
By geleentheid was Simson so dors dat hy wou sterf. Toe hy God aanroep, het hy gesê dat hy sy kneg is en Hom gevra of hy van dors moes omkom en so in die hande van heidene val? Die gedagte van selfbehoud was aan sy roepingsbesef verbonde. Daarna het God water uit die grond laat kom waarna die plek Roepersfontein genoem is. Simson het daar na God geroep.
4. Simson en Delila
Simson kon Filistynse meisies nie weerstaan nie en het selfs onverantwoordelike dinge aangevang om hulle met sy krag te beïndruk. Hy het een nag selfs die stadspoort van Gasa verwoes en dit bo op ʼn berg neergesit! Sy ontmoeting met ʼn sekere Delila het egter ʼn nuwe episode in sy stryd teen die Filistyne ingelei. Almal wou weet waar hy aan sy buitengewone liggaamskrag gekom het.
Delila is omgekoop om dit vas te stel. Simson het aanvanklik nie sy geheim nie verklap nie, maar hom telkens losgeruk as die Filistyne hom vasgebind het. Na baie geneul het hy sy geheim aan haar verklap. Toe sy hare afgeskeer is, het die Gees van God van hom gewyk en het hy swak geword. Daarna is sy oë uitgesteek en moes hy slawearbeid in die tronk verrig.
5. Simson sterf jonk
Die Filistyne was oortuig dat hul afgod Dagon Simson aan hulle uitgelewer het. Daarom het hulle ʼn groot fees tot sy eer gereël. Dagon is teen God afgespeel, iets wat God nie geduld het nie. Intussen het Simson se hare weer gegroei en is hy vir die fees na ʼn tempel gebring om die feesgangers te vermaak. Daar het hy ʼn versoek tot God gerig om hom vir oulaas genadig te wees en die heidene op hulle plek te sit. Simson het sy arms om die tempelpilare geslaan en die hele gebou omgetrek sodat hy saam het duisende heidene omgekom het. Hy het op daardie dag meer vyande gedood as tydens sy ganse lewe as rigter. Simson het nie aan sy goddelike roeping en heilige lewensverwagting voldoen nie en in skande gesterf.
Vervolg...