Gedagtes vir elke dag
Of lees almal by Gedagtes vir elke dag
As iemand wat jou te na gekom het en jou vergifnis vra sê die Woord jy moet hom vergewe:
"Pasop vir julleself. En as jou broeder teen jou sondig, bestraf hom; en as hy berou kry, vergewe hom. En as hy sewe maal op 'n dag teen jou sondig en sewe maal op dag na jou terugkom en sê: Ek het berou – moet jy hom vergewe." – Lukas 17:3,4
En as hy nie vergifnis vra of berou toon nie?...
STUDIE VAN DIE OU TESTAMENT (38)
DIE AFRIKAANSE PROTESTANTSE BYBELSKOOL
Studieleier: ds. Andrè van den Berg (Sr)
Lees reeks by Studie van die Ou Testament
LES 9
BATSEBA
2 Sam 11; 12:1-25; 13
1. Dawid bly in Jerusalem
Alhoewel Dawid ʼn man van God was, was daar ook donker tye in sy lewe. By geleentheid was daar oorlog, maar Dawid het nie soos gebruiklik saamgegaan nie. Ná ʼn middagslaap het hy op die paleis se dak koelte gaan soek en vandaar ʼn jongvrou gewaar wat in die nabye omgewing besig was om te bad. Dat sy nie op ʼn meer afgesonderde plek gebad het nie, wys heelwaarskynlik daarop dat sy nie oor preutsheid gepla was nie. Sy was mooi en jonk en die dogter van Eliam, een van Dawid se dapperste helde. Haar oupa, Agitofel, was ook een van Dawid se raadsmanne.
Batseba was in ʼn lewenslustige stemming en besig om haar van haar maandstonde te reinig. Haar man, Uria, was ʼn soldaat en op die oorlogsfront. Hy was ʼn Hetiet en baie dapper. Hierdie inligting moes Dawid van enige verdere optrede weerhou het. In die Ooste kon ʼn man soveel vroue hê as wat hy wou. Hy mag net nie ʼn ander man se vrou vir hom geneem het nie.
In ʼn opwelling van wellus het Dawid van alles wat ontoelaatbaar was vergeet en Batseba laat haal. Die res is geskiedenis! Sy het van Dawid swanger geraak en hom dienooreenkomstig ingelig. Dawid was in die knyp. Hy het geweet wat die wet van God gesê het (Lev.20:10; Deutr.22:22)!
Dawid het ʼn duiwelse plan bedink en Uria laat terugkeer. Hy het gehoop dat hy by sy vrou sou slaap. Uria was egter meer oor die oorlog as sy vrou begaan en het nie eens huis toe gegaan nie. Daarna het Dawid noodgedwonge op moord besluit. Hy sou die man laat doodmaak en sy vrou neem (Gen.12:12). Daarom het hy Uria op so ʼn gevaarlike plek in die geveg laat plaas, dat hy moes sneuwel. Dooie mense vra mos nie lastige vrae nie!
Batseba het nie van Dawid se plan geweet nie en ná Uria se dood oor hom gerouklaag. Daarna het Dawid haar laat haal en as vrou geneem. Sy het ʼn paar maande later ʼn seun gebaar. Dawid het ʼn groot sug van verligting geslaak. Alles het goed uitgewerk soos wat hy beplan het en kon die lewe sy normale gang gaan. God het egter ʼn appeltjie met Dawid te skil gehad!
2. Natan
Dawid het aan die laaste gevegte gaan deelneem en ʼn klinkende oorwinning oor Rabba behaal. Ná sy terugkeer, het God die profeet Natan na die paleis gestuur. Dawid het geen onraad vermoed nie. Natan het ʼn hartseer verhaal vertel van ʼn ryk man wat baie vee gehad het. Daar was ook ʼn arm man met net een skaapooitjie wat soos ʼn troeteldier in sy huis was. Toe die ryk man by geleentheid besoekers kry, het hy sy eie kudde ontsien en die arm man se ooilam geslag om vir sy besoekers voor te sit.
Toe Dawid dit hoor, was hy woedend en die doodstraf oor die ryke uitgespreek omdat hy geen ontferming gehad het nie. Daarbenewens moes hy ook dit wat hy geneem het viervoudig aan die arm man teruggee (Ex.22:1). Dis toe dat Natan vir hom sê: “U is die man!” Daarna het die profeet die oordeel van God oor Dawid aangekondig en hom op al sy voordele uit die hand van God gewys. Dawid was in werklikheid ondankbaar. Die oordeel van God sou nie uit sy huis wyk nie. Dit wat hy in die donker gedoen het, sou aan die lig kom!
3. Vergifnis hef nie God se straf op nie
Natan se woorde het Dawid se siel soos hamerslae verpletter (Ps.51:19). Hy het nie eens probeer om homself te verweer nie en erken dat hy teen God gesondig het. Daarna het Natan hom van God se vergifnis verseker. Hy sou nie die dood sterf wat so ʼn oortreding geregverdig nie. God het selfs sy sielepyniging genees (Ps.32:5).
Dat God vergewe, beteken nie dat Hy die straf ter syde stel nie. Die straf pas by die oortreding; swaard en onreinheid sou die huis van Dawid mettertyd verwoes. Dawid het vier seuns aan die dood afgestaan. Hy het inderdaad viervoudig teruggegee! Dit het met die dood van die pasgebore seuntjie van Batseba begin. Daarna het sy seuns Amnon, Absalom en Adonia ook gesterf.
Dawid se sondebelydenis het sy gees genees (Ps.32:3-5). Dit was vir hom beter om sy leed met God te deel, as om self daarmee te worstel. God het aan hom genade bewys deur Salomo, sy tweede seun by Batseba, baie lief te hê en later op die troon te plaas.
4. Amnon en Tamar
Amnon was Dawid se oudste seun en gevolglik sy natuurlike opvolger. Van die tweede seun Kileab, lees ons basies niks nie. Hy is heelwaarskynlik klein dood. Absalom was die derde seun. Sy moeder was die dogter van die koning van Gesur; ʼn baie klein koninkryk. Dit was eintlik ʼn Aramese stad wat om een of ander rede selfstandigheid behou het. Absolom was dus die enigste seun van Dawid wat van moederskant van koninklike afkoms was.
Absalom het ʼn mooi suster, Tamar, gehad waarop Amnon verlief geraak het. Sy was sy stiefsuster en volgens die wet buite sy bereik. Dit het hom baie weemoedig gemaak. Sy neef Jonadab het egter ʼn plan bedink. Amnon moes siek speel, Tamar versoek om na hom om te sien en so sy wellus bevredig.
Nadat Amnon haar verkrag het, wou hy niks meer met haar te doen hê nie. Amnon het wellus met liefde verwar. Daarna het Tamar by haar broer Absalom gaan woon. Hy het by haar gepleit om die verkragting stil te hou omdat die huis van Dawid nie nog ʼn skandaal kon bekostig nie.
Absalom het egter sy eie agenda gehad. Amnon sou vir sy daad boet. Twee jaar later het hy hom tydens ʼn skaapskeerdersfees vermoor en na sy oupa, die koning van Gesur, gevlug. Die straf van God was swaar op die huis van Dawid!
Vervolg...