Gedagtes vir elke dag
Of lees almal by Gedagtes vir elke dag
Wat sê die Bybel oor menseregte? Dis uiteraard nie ’n Bybelse begrip nie, maar ’n regsbegrip. In die Bybel is daar geen woord wat regstreeks met regte vertaal kan word nie. Die woord wat die naaste daaraan kom, is regsaak. In Spreuke word koning Lemeul byvoorbeeld aangemoedig om vir die regsaak van ellendiges op te kom: “Maak jou mond oop vir die stomme, vir die regsaak van almal wat wegkwyn” (Spr.32:8).
YWER EK DAN TEVERGEEFS?
Hannes Ollewagen
1 Konings 19:1-21
Vers 10: “En hy antwoord: Ek het baie geywer vir die HERE, die God van die leërskare; want die kinders van Israel het u verbond verlaat, u altare afgebreek en u profete met die swaard gedood, sodat ek alleen oorgebly het, en hulle soek my lewe om dit weg te neem.” Op die vraag van die Here waarom hy moedeloos daar in die woestyn sit, is Elia onmiddellik reg om te antwoord en die Here daarop te wys dat hy baie vir Hom geywer het ten spyte van die feit dat die hele volk van God afvallig geword het. ‘n Paar dae tevore het Elia, ten aanskoue van die volk, ‘n roemryke oorwinning oor die Baälpriesters behaal toe hy man-alleen teenoor 450 afgodspriesters God se naam aangeroep het en Hy uit die hemel geantwoord het. Elia het hier al hierdie priesters gevang en doodgeslaan en tog lyk dit asof die volk op twee gedagtes bly hink.
‘n Mens sou verwag dat Elia ná die oorwinning op die berg Karmel geestelik onbreekbaar sou wees. Tog moet hy net hierna vir sy lewe vlug, want Isèbel is daarop uit om hom te vermoor. Hoee dan nou? Waarom moes hy dan nou daarheen gaan om aan almal God se heerlikheid te openbaar en dan gaan die lewe maar net soos voorheen aan? Inteendeel, hy is selfs slegter daaraan toe, want hy moet vlug vir sy lewe.
In hierdie gedeelte is daar soveel kenmerkende eienskappe van God waarin ons Hom beter kan leer ken. Eerstens leer Hy ons dat Hy nie altyd te werk gaan soos wat ons as mense verwag nie. Hy verwag van ons, sy kinders en diensknegte, om aan Hom gehoorsaam te wees in dit wat Hy van ons vra, maar dit wat ons nie kan verander nie, moet ons in sy Hande oorlaat. Al lyk dit nie altyd vir ons so nie, sy Raadsplan is ALTYD op koers.
God verstaan dat Elia moedeloos is; daarom dat Hy hom in die woestyn gaan opsoek. Hoe navolgingswaardig is Elia se gesindheid nie!! Hy is so moedeloos dat hy letterlik wens om eerder te sterf, maar wanneer God aan Hom ‘n opdrag gee, murmureer hy nie, of weier hy nie om dit uit te voer nie, maar hy draai om om verder te gaan doen wat God hom beveel.
Verder openbaar God Hom ook nie altyd op die manier wat ons verwag nie. Ons sien in verse 11&12 dat daar ‘n sterk wind, aardbewing asook ‘n vuur was, maar God was nie in een van hulle nie. Daarna was daar die gesuis van ‘n sagte koelte en Elia het dadelik geweet dat God daar is. Die feit dat God menigmaal op ander maniere werk as wat ons verwag, beteken nie dat Hy nie welliswaar werk nie. Dit is hartseer dat ons eie geestelike hoogmoed of selfs ons eie verwagtinge van hoe God moet optree, veroorsaak dat ons Hom soms nie erken of raaksien nie.
Dit het vir Elia gevoel of hy alleen in die land oorgebly en die hele volk God verlaat het om agter vreemde gode aan te loop. God wys hom egter daarop dat Hy, deur sy genade, seweduisend sal laat oorbly, wat ook nie van God sal afdwaal nie – en dit nie deur hul eie verdienste of goedheid nie, maar omdat Hy dit so besluit het.
Ons sien ook in die opdrag wat God vir Elia gee in verse 15 – 17 dat Hy ook ‘n regverdige God is, wat wél lankmoedig is, maar die ongeregtigheid nie ongesiens laat verby gaan en ongestraf laat bly nie. Dit is baie duidelik dat die werkers van onheil gestraf gaan word en elkeen sal verseker sy straf ontvang – wanneer hy die eerste swaar vryspring, sal daar ‘n tweede wees, en ‘n derde om te verseker dat die ongeregtigheid nie ongestraf verbygaan nie.
Ons lees in verse 19-&20 hoe Elia vir Elisa opdrag gee om hom te volg en derhalwe God te dien, maar Elisa versoek hom, menslik, om net eers sy ouers te gaan groet. Elia is egter ontsteld hieroor en wil vir Elisa duidelik te kenne gee dat God se werk nie uitgestel moet word nie. Hoeveel van ons dreig nie om vir God diensbaar te wees, maar eers op ‘n latere stadium wanneer dit my pas nie? Ek moet net eers my studies voltooi, of my troue agter die rug kry, my kind deur universiteit sien of uit die huis uit kry?
As ek en u vanoggend die gehoorsaamheid van Elia gehad het, hoeveel anders sou die wêreld om ons gelyk het? God vra nie van almal om sendelinge en profete te word nie, want dit is nie aan elkeen gegee nie. Hy vra wèl van elke kind van Hom geloof, gehoorsaamheid en liefde in ons alledaagse lewe, want daarmee sal elkeen van ons, op ons onderskeie lewensterreine, elke dag baie vir ons God en ons volk ywer.
Hoe lank sal ons uitstel? Wil ek ook dalk die verskoning gebruik dat ek myself al tot in die afgrond in vir hierdie volk vermoei het wat aanhou om hul van God af weg te keer? Laat ek u verseker, u sal nie die eerste en ook nie die laaste wees nie. Elia het vir ons die voorbeeld gestel van volharding in ywer vir en gehoorsaamheid aan God – dit was beslis ‘n navolgingswaardige voorbeeld. Kom ons volg dit na, want dalk is God ook al tussen ons om sy swaard van geregtigheid uit te trek om die ongeregtigheid van die goddelose te vergeld terwyl ons Hom nie raaksien nie!