Gedagtes vir elke dag
Of lees almal by Gedagtes vir elke dag
Telkens as ons sondig, kies ons die dood bo die lewe. Daarna is ons so lief om die sonde te ontsmet sodat dit darem nie so sleg klink nie.
KEN JY GOD?
Hannes Ollewagen
1 Kronieke 16:7-36
“Want al die gode van die volke is afgode, maar die HERE het die hemele gemaak.” (Vers 16). In hierdie vers ontdek ons ‘n waarheid wat so maklik in die huidige samelewing vergeet word, nl. dat die mensdom talle gode aanbid. Daar is en bly egter net een ware, lewende God en dit is die Skepper van hemel en aarde van wie ons in Génesis tot Openbaring in die Woord van God lees.
Met sinkrintisme (die vermenging van godsdienste) word mense deesdae mislei deur voor te gee dat alle godsdienste (en derhalwe alle gode) gelyk is, maar hierdie leuen bring talle mense tot ‘n val in hul geloofslewe. Hoe gebeur dit dan dat mense dié leuen glo? Hoe kan mense glo dat die Almagtige God wat hemel en aarde gemaak het “gelyk” is aan een of ander afgod? Die antwoord is dat mense God nie waarlik ken nie.
Sou ek u vra of u ‘n bekende persoonlikheid (bv. Riana Nel, Steve Hofmeyer, die koningin van Engeland, ens.) ken, sou u spontane antwoord “ja” wees. Sou ek u dan vrae rondom hierdie persoon vra soos wat sy of haar gunsteling kos of kleur is, of waar hy gebore is, waarvan hy hou of wat hom afstoot, sal u gelukkig wees om een van hierdie vrae met sekerheid te kan antwoord. Die rede daarvoor is natuurlik omdat u eintlik net van die persoon weet maar hom nie ken nie. En sou hy sterf, sou dit nie u wêreld tot stilstand bring soos wanneer u ‘n nabye familielid aan die dood moet afstaan nie. Dit is weereens omdat u van die persoon se bestaan weet, maar hom nie persoonlik ken of van harte lief is vir hom nie. Nou is die vraag vandag: ken u God, of weet u net van Hom?
Doen uself 'n guns en antwoord op die volgende vraag: “Wie is God?”
Dit is vir ons as mense onmoontlik om die wese van God te begryp, derhalwe is dit dus ook onmoontlik om Hom omvattend te beskryf. Hy openbaar Homself egter aan ons deur die natuur en ook in die Skrif. In die Woord van God leer ons meer van Hom. Uit die gelese gedeelte (1 Kronieke 16:7-36) leer ons die volgende:
- Hy is ‘n God van wonders. (Verw. vers 9)
- Sy Naam is heilig. (Verw. vers 10)
- Hy is ‘n sterke God. (Verw. vers 11)
- Hy is ‘n God van oordeel. (Verw. verse 13&14)
- Hy is groot en verhewe bo alle ander gode! (Verw. verse 25&26).
- “Majesteit en heerlikheid is voor sy aangesig, sterkte en blydskap is in sy woonplek.” (Vers 27).
- Hy is goedertieren. (Verw. vers 34)
Ons leer verder uit die Woord ook die volgende oor Hom:
- Hy is die Skepper van hemel en aarde (Verw. Gen. 1) – Uit Hom en deur Hom het alle dinge ontstaan en sonder Hom het geen ding ontstaan wat ontstaan het nie. (Verw. Rom. 11:36).
- Hy is ‘n jaloerse God wat verwag dat ons Hom alleen sal dien en ons kan Hom nie bykomstig tot ons afgode dien, soos wat ons Hom wil dien nie. (Verw. Eksodus 20:5).
- Hy is ‘n barmhartige God. (Verw. Eksodus 20:6).
Genoeg tyd en boeke ontbreek om Hom ten volle te probeer beskryf. Daarom is dit juis so belangrik dat almal wat waarlik in Jesus Christus tot bekering gekom het ‘n persoonlike verhouding met Hom moet hê. Dit is van die uiterste belang om te verseker dat ons nie net van Hom weet nie, maar dat ons Hom ken! Wanneer ons Hom waarlik ken, sal ons nie anders kan as om Hom lief te hê nie, want ons sal tot die diepe besef van sy oneindigende liefde vir ons as sondaarmense kom. Maak dus daarmee erns om voldoende tyd aan Hom af te staan want Hy verwag dit van elkeen van sy kinders. Hy wil hê dat ons Hom van ganser harte soek. Jeremia 29:13: “En julle sal My soek en vind as julle na My vra met julle hele hart.”
Wanneer ons ons volksgeskiedenis bestudeer besef ons dat die woorde van 1 Kronieke 16:18-24 ook op ons van toepassing is en dat ons as volk van God bestem was om tot eer van sy Naam te leef. Maar wanneer ons na die lewenswyse van volksgenote rondom ons kyk besef ons dat ons volk ten gronde gegaan het weens ‘n gebrek aan kennis; nie weens ‘n gebrek aan ekonomiese, politieke of welke ander kennis nie, maar weens ‘n gebrek aan kennis van God! Dit is skandelik om te moet erken, maar die omstandighede en realiteit rondom ons getuig van hierdie waarheid.
Wanneer ons erken dat ons volk weens ‘n gebrek aan kennis geval het, noop dit elke volksgenoot om daadwerklik en dringend selfondersoek te doen met hierdie vraag: KEN EK GOD?