Gedagtes vir elke dag
Of lees almal by Gedagtes vir elke dag
Die "Onregverdige Mammon" is 'n term wat Jesus in Lukas 16 self aan geld gegee het omdat mense op oneerlike maniere probeer om meer en meer daarvan te kry. Daarby sê Jesus dat dié mens wat getrou is met klein dingetjies soos geld, ook getrou sal wees in die groot dinge; en Hy voeg daarby: "En hy wat onregverdig is in die minste, is ook in die grote onregverdig". Glo u dat die belangrikste saak vir die Afrikanervolk naamlik sy voortbestaan en lewe, veilig is in die hande van 'n regime wat nie eers met die klein dingetjies getrou is nie?
HOU HOM IN ERKENTENIS!
Hannes Ollewagen
Rom. 1:18-32
“En omdat hulle dit nie die moeite werd geag het om God in erkentenis te hou nie, het God hulle oorgegee aan ’n slegte gesindheid, om te doen wat nie betaam nie: hulle is vervul met allerhande ongeregtigheid, hoerery, boosheid, hebsug, ondeug; vol nydigheid, moord, twis, bedrog, kwaadaardigheid; nuusdraers, kwaadsprekers, haters van God, geweldenaars, trotsaards, grootpraters, uitvinders van slegte dinge, ongehoorsaam aan die ouers; onverstandig, ontrou, sonder natuurlike liefde, onversoenlik, onbarmhartig,...” (:28-31).
Wanneer ons deur die lys van ongeregtighede lees wat hier by die naam genoem word, is dit hartseer om tot die besef te kom dat geeneen van hierdie dinge in ons samelewing raar is nie. Ons kan nie eers meer die verskoning aanvoor dat ons besef dat ons as ’n volk sondig is, maar darem doen ons nog nie hierdie of daardie of die een of die ander nie. Daar is niks, maar niks wat op hierdie lys ontbreek nie. U sou dalk sê: “Nee, wag ’n bietjie. Ons is nog nie haters van God nie – dit is darem één ongeregtigheid waarvan ons nie aangekla kan word nie.” Ek sou selfs hierin met u verskil.
Die aftakeling van die Woord van God en die vertrapping van sy gebooie in soveel van die sogenaamde kerke en in die samelewing as ’n geheel getuig van hierdie oortreding. “Jesus antwoord en sê vir hom: As iemand My liefhet, sal hy my woord bewaar, en my Vader sal hom liefhê, en Ons sal na hom toe kom en by hom woning maak. Hy wat My nie liefhet nie, bewaar my woorde nie;” (Joh. 14:23&24). En waarom word die Woord van God só verander en “aangepas”? Dit is mos om niemand aanstoot te gee nie – niemand behalwe God nie, natuurlik. Dit is om “vriendskap” met almal (behalwe God) te sluit – ook (in besonder) die goddelose. Hierdie verskriklike onreg kan seker nie meer duidelik as in die woorde van Jakobus 4:4 gestel word nie. “Egbrekers en egbreeksters, weet julle nie dat die vriendskap van die wêreld vyandskap teen God is nie? Wie dan 'n vriend van die wêreld wil wees, word 'n vyand van God.” En vyande haat mekaar – dit is gewoon die waarheid. . . U sien waarom ek stel dat de laaste een van die oortredings in ons volkshuis gevind kan word en dat ons volkshuis met die stank van ongeregtigheid gevul is? En hiermee sê ek nie dat daar nie meer Godvresende mense onder ons volk is wat nie ’n heilige lewe voor God probeer lei nie. Maar hiermee word dit vir ons duidelik hoe groot die smet en sonde van ons volk in sy geheel is.
Wanneer ons tot die besef kom dat ons volkshuishouding met al hierdie ongeregtighede besmet is, is die logiese tog dat ons onsself die vraag moet afvra wat die oorsaak hiervan is. En die antwoord hierop word vir ons in baie duidelike en eenvoudige taal gegee. “En omdat hulle dit nie die moeite werd geag het om God in erkentenis te hou nie,...”. Ons volkshuishouding is met al hierdie ongeregtigheid vervul omdat ons dit nie die moeite werd geag het om God in erkentenis te hou nie. Ons het die verkeerde voorbeeld van Israel van ouds gevolg. Daar was tye waar ons die lof en eer van God besing het vir die wonders wat Hy aan ons gedoen het – soos wat Israel ook gedoen het. “En Hy het hulle verlos uit die hand van die hater en hulle bevry uit die hand van die vyand. En die waters het hulle teëstanders oordek: nie een van hulle het oorgebly nie. Toe het hulle aan sy woorde geglo, hulle het sy lof gesing.” (Ps. 106:10-12). Ons het ongelukkig ook gou sy werke vergeet en Hom nie meer in gedagtenis gehou nie – soos wat Israel ook gedoen het. “Maar hulle het gou sy werke vergeet, op sy raadsbesluit nie gewag nie.” (Ps. 106:13). En die gevolg hiervan was dat ons agter ons eie gedagtes en afgode aan verdwaal en ons volkshuishouding met ongeregtigheid gevul het – soos wat Israel ook gedoen het. “Hulle het by Horeb ’n kalf gemaak en gebuig voor ’n gegote beeld. En hulle het hul Heerlikheid verruil vir die afbeelding van ’n bees wat gras eet. Hulle het God vergeet, hulle Verlosser, wat groot dinge gedoen het in Egipte,” (Ps. 106:19-21).
Geliefdes, wat is die uiteinde van só ’n toestand? Is daar vir ons hoop? Kan ons onsself daarop beroem dat God darem by Bloedrivier met ons ’n Gelofte gesluit het en dat Hy ons dus nimmer sal verlaat? God hanteer hierdie saak duidelik in Eség. 33:12-16. “En jy, mensekind, sê aan die kinders van jou volk: Die geregtigheid van die regverdige sal hom nie red op die dag van sy oortreding nie; en aangaande die goddeloosheid van die goddelose, hy sal daardeur nie struikel op die dag as hy hom van sy goddeloosheid bekeer nie; en die regverdige sal deur sy geregtigheid nie kan lewe op die dag as hy sondig nie. As Ek aan die regverdige sê dat hy sekerlik sal lewe, en hy vertrou op sy geregtigheid en doen onreg, dan sal aan al sy geregtighede nie gedink word nie, maar deur sy onreg wat hy doen, daardeur sal hy sterwe. En as Ek aan die goddelose sê: Jy sal sekerlik sterwe — en hy hom van sy sonde bekeer, en reg en geregtigheid doen —gee die goddelose die pand terug, vergoed hy wat geroof is, wandel hy in die insettinge van die lewe, sodat hy geen onreg doen nie — dan sal hy sekerlik lewe, hy sal nie sterwe nie. Al sy sondes wat hy gedoen het, sal hom nie toegereken word nie; hy het reg en geregtigheid gedoen, hy sal sekerlik lewe.” Daar is vir ons maar een, net een, oplossing uit hierdie ellendige toestand wat ongetwyfeld op die dood afstuur – en dit is ’n ware en opregte terugkeer tot God. ’n Terugkeer tot Hom met die bede om ons van ons ongeregtighede te reinig. “Was julle, reinig julle, neem die boosheid van julle handelinge voor my oë weg, hou op om kwaad te doen, leer om goed te doen, soek die reg, beteuel die verdrukker, doen reg aan die wees, verdedig die saak van die weduwee. Kom nou en laat ons die saak uitmaak, sê die Here: al was julle sondes soos skarlaken, dit sal wit word soos sneeu; al was dit rooi soos purper, dit sal word soos wol.” (Jes. 1:16-18).
Mag die woord van God vandag ons harte raak wanneer Hy ons oor hierdie ongeregtighede en besmette volkshuishouding aanspreek. En mag die stank van ongeregtigheid wat ons volkshuishouding tans vul vir ons ’n walglike reuk in ons neuse wees – walglik genoeg dat ons ywerig sal meewerk aan die reiniging daarvan. En mag ons volkshuishouding weer gevul word met die aangename reuk van sy kennis en die aangename geur van Christus. “MAAR God sy dank wat ons altyd laat triomfeer in Christus en wat die reuk van sy kennis deur ons oral versprei. Want ons is ’n aangename geur van Christus tot eer van God onder die wat gered word en onder die wat verlore gaan; vir die laaste ’n reuk van die dood tot die dood, maar vir die eerste ’n reuk van die lewe tot die lewe. ...” (2 Kor. 2:14-16).