Gedagtes vir elke dag
Of lees almal by Gedagtes vir elke dag
Moenie dink dat jou lewe ten einde loop wanneer jy terugslae kry nie – dis deur swaarkry wat ons leer verstaan wat genade is en word die lewe naderhand een wonder van genade te midde van gebeure rondom ons. Dis dan wanneer dinge vir ander soos rampe lyk maar jy sal weet dit is die genade van God.
DOEN WAT REG IS TOT HEERLIKHEID VAN GOD
Hannes Ollewagen
Dan. 6:1-29
“Toe het koning Daríus aan al die volke, nasies en tale wat op die hele aarde woon, geskrywe: Mag julle vrede groot wees! Deur my word bevel gegee dat hulle in die hele magsgebied van my koninkryk moet bewe en sidder voor die God van Daniël, want Hy is die lewende God en Hy bestaan in ewigheid en sy koninkryk is een wat nie vernietig kan word nie en sy heerskappy duur tot die einde toe. Hy verlos en red en doen tekens en wonders in die hemel en op aarde, Hy wat Daniël uit die mag van die leeus verlos het.” (:26-28).
Mense dink maklik dat ’n situasie net deur ’n groot menigte verander kan word. En hierdie verkeerde persepsie maak dat mense in slegte omstandighede dan eerder die meerderheid volg as om te doen wat reg is. Dink maar aan die drie vriende van Daniël.
Hierdie drie manne was die enkelinge wat nie die absurde bevel van die koning gehoorsaam het nie terwyl die menigte rondom hulle maar net slaafs hieraan gehoor gegee het, want wat sou hulle nou aan die situasie kan doen? “Daarom het, op die oomblik toe al die volke die geluid van horing, fluit, siter, luit, harp en van allerhande musiekinstrumente hoor, al die volke, nasies en tale neergeval en die goue beeld aanbid wat koning Nebukadnésar opgerig het.” (Dan. 3:7). En wat het die optrede van die meerderheid verander – absoluut niks! Dit teenoor die geweldige impak wat die regte optrede van die drie enkelinge tot gevolg gehad het. “Daarop het Nebukadnésar gespreek en gesê: Geloofd sy die God van Sadrag, Mesag en Abednégo, wat sy engel gestuur en sy knegte verlos het wat hulle op Hom verlaat het en die bevel van die koning oortree het, en wat hulle liggame oorgegee het om geen ander god te dien of te aanbid nie, behalwe hulle God. Daarom word deur my bevel gegee dat enige volk, nasie of taal wat oneerbiedig spreek oor die God van Sadrag, Mesag en Abednégo, stukkend gekap en van sy huis ’n mishoop gemaak sal word, omdat daar geen ander god is wat so kan verlos nie.” (Dan. 3:28&29).
Wanneer ons na die geskiedenis kyk, besef ons watter groot impak die optrede van enkelinge op die verloop van die lewe gehad het. Dink maar aan die geweldige gevolg van Adam en Eva se optrede. En het God deur die hande van ’n menigte sy volk uit Egipte verlos? Nee, deur die hand van een man bewerk God hierdie verlossing uit Egipte. Die reus Góliat is nie deur die menigte van Israel se leër verslaan nie, maar deur ’n enekeling, Dawid, wat nie eers op daardie stadium deel van Israel se leërmag was nie. En so kan ons hierdie lys aanvul met mense wat ’n ingrypende impak op die samelewing gehad het doodeenvoudig omdat hulle ingesteldheid in die lewe reg was. Hierdie mense was daarop ingestel om God te gehoorsaam en te verheerlik. En daarom is hul optrede nie deur die omstandighede rondom hulle dikteer nie, maar deur die beginsel van dit wat reg sou wees om in hul onderskeie situasies te doen.
Ons kon ook in die lewe van Daniël sien hoedat hierdie man se optrede nie dikteer is deur die omstandighede rondom hom nie. Daniël het ’n goeie posisie onder koning Darius beklee. En toe die ander ministers en landvoogde met listigheid die koning oorhaal om ’n wet uit te vaardig wat daarop gemik was om Daniël te verstrik, bly Daniël se ingesteldheid om te doen wat reg is. Daniël haas hom nie na die koning om hierdie manne van agterbaksheid en allerhande dinge (met reg) te beskuldig nie. Hy haas hom nie na die koning met ’n pleitrede dat die koning hom tog moet red nie. En ewe min gehoorsaam Daniël hierdie wet om sodoende sy lewe, goeie posisie in die paleis en aansien te probeer red. Ja, nie eers vir net dertig dae weerhou Danël homself van gebed om sodoende sy goeie posisie en lewe te probeer beskerm nie. Daniël doen doodeenvoudig steeds wat reg is voor God en stel sy vertroue volkome in God. En dan gebruik God hierdie optrede van ’n enkeling wat doen wat reg is om sy grote Naam te verheerlik. “En toe hy nader kom na die kuil, het hy met ’n droewige stem na Daniël geroep; die koning het gespreek en aan Daniël gesê: Daniël, kneg van die lewende God, was jou God wat jy gedurigdeur vereer, in staat om jou van die leeus te verlos? Toe het Daniël met die koning gespreek: Mag die koning vir ewig lewe! My God het sy engel gestuur en die bek van die leeus toegesluit, sodat hulle my geen leed aangedoen het nie, omdat ek voor Hom onskuldig bevind is en ek ook teen u, o koning, geen onreg gedoen het nie. Toe het die koning baie bly geword en bevel gegee om Daniël uit die kuil op te trek. So is Daniël dan uit die kuil opgetrek sonder dat daar ’n letsel aan hom gevind is, omdat hy op sy God vertrou het. Toe het koning Daríus aan al die volke, nasies en tale wat op die hele aarde woon, geskrywe: Mag julle vrede groot wees! Deur my word bevel gegee dat hulle in die hele magsgebied van my koninkryk moet bewe en sidder voor die God van Daniël, want Hy is die lewende God en Hy bestaan in ewigheid en sy koninkryk is een wat nie vernietig kan word nie en sy heerskappy duur tot die einde toe. Hy verlos en red en doen tekens en wonders in die hemel en op aarde, Hy wat Daniël uit die mag van die leeus verlos het.” (Dan. 6:21-24, 26-28).
In hierdie saak het onse Here Jesus Christus ook aan ons ’n duidelike voorbeeld gestel toe Hy self deur die duiwel versoek is. Sy antwoorde het telkens daarop gedui dat sy ingesteldheid was om te doen wat reg is voor die Vader. Dit was sy hoogste strewe – hoër as enige rykdom, heerskappy of roem wat verkry kan word. “Weer neem die duiwel Hom saam na ’n baie hoë berg en wys Hom al die koninkryke van die wêreld en hulle heerlikheid, en sê vir Hom: Al hierdie dinge sal ek aan U gee as U neerval en my aanbid. Toe sê Jesus vir hom: Gaan weg, Satan! Want daar is geskrywe: Die Here jou God moet jy aanbid en Hom alleen dien.” (Matt. 4:8-10).
Wanneer ons voel soos enkelinge in ’n verdwaalde, ontaarde en goddelose samelewing moet ons dink aan al hierdie voorbeelde uit die Woord van God. En dit moet ons daaraan herinner dat ons altyd, altyd daarna moet streef om te doen wat reg is tot heerlikheid van God. Dit moet altyd ons hoogste strewe wees om tot heerlikheid van God te leef, want met hierdie strewe voor oë sal ons voor Hom doen wat reg is tot verheerliking van sy grote Naam.
“Want julle is duur gekoop. Verheerlik God dan in julle liggaam en in julle gees wat aan God behoort.” (1 Kor. 6:20).