Gedagtes vir elke dag
Of lees almal by Gedagtes vir elke dag
Skoolgaan eindig nie wanneer jy die laaste eksamen geslaag het nie. Jou belangrikste les kom nog: LEER HOE OM TEL LY. Wanneer jy dit bemeester sal die lewe vir jou sin maak.
EK IS JOU GOD
Hannes Ollewagen
Jes. 41:8-20
“Wees nie bevrees nie, want Ek is met jou; kyk nie angstig rond nie, want Ek is jou God. Ek versterk jou, ook help Ek jou, ook ondersteun Ek jou met my reddende regterhand.” (:10)
Hoeveel gerusstelling bring hierdie woorde nie in ’n mens se gemoed nie. Die versekering van die lewende God se nabyheid, hulp en ondersteuning. ’n Mens moet egter met erns hierdie gedeelte bestudeer en verstaan dat die mens nie die sentrale en belangrikste tema van hierdie gedeelte is nie. God behoort die beklemtoning te wees en nie die mens nie. Die mens is maar die werktuig in God se hand waardeur Hy verheerlik word en waardeur sy grote krag openbaar word. “Wees nie bevrees nie, wurmpie Jakob, volkie Israel! Ék help jou, spreek die HERE, en jou Losser is die Heilige van Israel. Kyk, Ek maak jou tot ’n skerp, nuwe dorsslee wat baie tande het: jy sal berge dors en fyn maal, en heuwels maak soos kaf. Jy sal hulle uitwan, en die wind sal hulle wegneem en die storm hulle verstrooi; maar jy sal juig in die HERE, jou beroem op die Heilige van Israel.” (:14-17).
God beklemtoon in hierdie gedeelte van sy Woord ’n boodskap wat Hy op soveel ander plekke en by soveel ander geleenthede by sy volk probeer tuisbring. Hy beklemtoon dit weereens hierin dat Hy van sy volk verwag om Hom te vertrou. Ons behoort aan Hom die eer te bewys deur Hom te vertrou. Hy is nie alleen betroubaar nie, maar ook almagtig. Wanneer ons glo dat Hy almagtig is, maar nie betroubaar nie laat dit ons maar in min-of-meer dieselfde posisie as wat ons sou wees indien ons sou glo dat Hy betroubaar is, maar nie almagtig nie. En daardie posisie is een van ongeloof. En om Hom nie te vertrou nie is ’n belediging, want sou ons daardeur meen dat Hy onbetroubaar is of by onvermoë?
Ons lees in Ex. 14:13-14 waar Moses op ’n mooi wyse die volk van God verseker dat hulle hul vertroue op Hom moet stel en hul verlossing van Hom kan verwag. Dit is uit Moses se woorde duidelik dat daar by hom geen twyfel t.o.v. God se vermoë of betroubaarheid bestaan nie. “Maar Moses het aan die volk gesê: Wees nie bevrees nie, staan vas en aanskou die verlossing van die HERE wat Hy vandag vir julle sal bewerk; want soos julle die Egiptenaars vandag sien, sal julle hulle nie weer sien in ewigheid nie. Die HERE sal vir julle stry, en julle moet stil wees.” Ons lees ook in Núm. 11 waar hierdie selfde man deur God Self herinner word dat niks by Hom onmoontlik is nie. “Toe sê Moses: Seshonderdduisend te voet is die volk onder wie ek verkeer; en U het gesê: Ek sal aan hulle vleis gee, en hulle sal ’n hele maand lank eet! Sal daar vir hulle kleinvee en beeste geslag word, sodat daar vir hulle genoeg sal wees? Of sal al die visse vandie see vir hulle versamel word, sodat daar vir hulle genoeg is? Maar die HERE sê vir Moses: Sou die hand van die HERE te kort wees? Nou sal jy sien of my woord vir jou uitkom of nie.”
Ons lees weer in Deut. 31 waar Moses die leierskap aan Josua oorgee en hom dan daaraan herinner dat hy ter harte moet neem om sy vertroue in God te stel. Hy motiveer Josua nie of verseker hom nie dat hy oor die nodige kundigheid, krygsvernuf, leierskap of dergelike eienskappe beskik om die volk die beloofde land in te lei nie. Hy beklemtoon dit ook aan Josua dat hy op die betroubaarheid en almag van God kan reken, sy vertoue daarin moet stel en sy sekerheid daarin moet vind. “Wees sterk en vol moed; wees nie bevrees en word nie verskrik vir hulle nie; want dit is die HERE jou God wat saam met jou trek; Hy sal jou nie begewe of verlaat nie. En dit is die HERE wat voor jou uit trek; Hy sal met jou wees; Hy sal jou nie begewe of verlaat nie; jy mag nie bevrees of verskrik wees nie.” (Deut. 31:6,8).
Wat ’n wonderlike voorreg word ons nie aangedoen om hierdie betroubare, almagtige en lewende God te ken en te dien nie. Ons wat oor niks beskik om Hom te vergoed vir al hierdie getroue bystand, hulp en ondersteuning in die lewe nie. Maar Hy stel dit tog duidelik in sy Woord wat Hy wél van ons kant verwag – ons eerbied. En laasgenoemde gee ons aan Hom deur optrede van dankbaarheid en gehoorsaamheid. Ek dink byvoorbeeld aan die mooi voorbeeld van Simon wat Jesus se bevel met eerbied gehoorsaam sonder dat daar by hom enige verwagting van ’n beloning in die saak was. “En toe Hy ophou met spreek, sê Hy vir Simon: Vaar uit na die diep water en laat julle nette sak om te vang. En Simon antwoord en sê vir Hom: Meester, ons het die hele nag deur hard gewerk en niks gevang nie; maar op u woord sal ek die net laat sak. En toe hulle dit gedoen het, het hulle ’n groot menigte visse ingesluit; en hulle net wou skeur. Daarop wink hulle vir hul maats in die ander skuit om te kom help. En hulle het gekom en altwee die skuite vol gemaak, sodat hulle amper gesink het. En toe Simon Petrus dit sien, val hy neer aan die knieë van Jesus en sê: Gaan weg van my, Here, want ek is ’n sondige man!” (Luk. 5:4-8). En dan word hierdie vereiste van God se kant teenoor ons in Ps. 50 ook in geen onduidelike taal behandel. “Ek hoef uit jou huis geen stier te neem of bokke uit jou krale nie; want al die wilde diere van die bos is myne, die vee op berge by duisende. Ek ken al die voëls van die berge, en wat roer op die veld, is van My. As Ek honger het, sal Ek jou dit nie sê nie; want die wêreld is myne en sy volheid. Sou Ek vleis van stiere eet of bloed van bokke drink? Offer dank aan God, en betaal jou geloftes aan die Allerhoogste; en roep My aan in die dag van benoudheid: Ek sal jou uithelp, en jy moet My eer. Die een wat dank offer, eer My; en die een wat op sy weg ag gee, hom sal Ek die heil van God laat geniet.” (Ps. 50:9-15, 23).
Mag ek en u ook vandag opnuut herinner word aan die wonderlike aard en wese van die God wat ons aanbid – die almagtige en betroubare, lewende God. En mag hierdie herinnering ons opnuut aanspoor om Hom met ’n lewe van opregte vertroue in Hom asook dankbaarheid en eerbiedige gehoorsaamheid te eer.