Gedagtes vir elke dag
Of lees almal by Gedagtes vir elke dag
In 1 Johannes 5:14 sê hy dat God ons verhoor as ons iets vra volgens God se wil. Calvyn se kommentaar op hierdie vers bring meer duidelikheid wanneer hy sê dat as dit aan elkeen van ons toegestaan wou word om te vra net wat ons begeer, sou daar baie swak na ons omgesien word. Dit sou ook die geval wees as God aan ons wense sou toegee. Want ons weet nie wat vir ons goed is nie. Inteendeel, ons brand van slegte en verderflike begeertes. Dus is die geheim van verhoorde gebede daarin dat ons niks sal vra wat strydig is met God se wil nie. Daarom moet ons sy wil ken en gehoorsaam.
WEES GETUIES
Ds Andrè van den Berg
“Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en Samaria en tot aan die uiterstes van die aarde” - Hand.1:8
Met Pinkster herdenk die kerk die uitstorting van die Heilige Gees wat meer as 2000 jaar gelede in die tempel in Jerusalem plaasgevind het. Maar waarom word die woord uitstorting en nie bekendstelling of 'n ander sinoniem gebruik nie? Die Gees is tog ʼn Persoon, hoe kan Hy uitgestort word? Was Hy dan nie voor Pinksterdag daar nie? Ja, Hy was. Hy het nie op daardie dag vir die eerste keer sy Heilige opwagting gemaak nie, maar was reeds so vroeg as in die skepping werksaam: “.... en die Gees van God het gesweef op die waters” (Gen.1:2). In die tyd van die aartsvaders sê Job: “Die Gees van God het my geskape, en die asem van die Almagtige maak my lewend” (Job.33:4).
Die Heilige Gees was ook by Israel op pad na Kanaän teenwoordig: “Toe het sy volk gedink aan die dae van die ou tyd, van Moses: Waar is Hy wat hulle uit die see laat optrek het saam met die herder van sy kudde? Waar is Hy wat sy Heilige Gees in hulle midde gegee het?” (Jes.63:11).
Die Heilige Gees het ook deur profete gewerk nadat Hy hulle met krag vervul het om te getuig en die Woord onbevrees te verkondig. Dan het die Gees ook iets belangrik gedoen – Hy het deur die eeue die belofte van die komende Messias as’t ware aan gelowiges se harte vasgeknoop. En dis hoe die Jode van ouds gered is – hulle moes die tien gebooie nakom en glo dat die Messias gebore sou word. Laasgenoemde kan ʼn vooruitgesiene geloof genoem word.
Wat het dan op Pinksterdag gebeur? Hoe raak dit ons? Op daardie dag het daar iets geheel nuut gebeur. Die woord uitstort dui op iets wat nog nooit voorheen was nie en toe met wêreldwye effek plaasgevind het. Die Heilige Gees het twee belangrike en unieke dinge kom doen wat gelowiges vandag nog raak – Hy het begin om mense van alle nasies deur die wedergeboorte aan Jesus te bind en getuies van hulle te maak. Dit het nog nooit vantevore gebeur nie.
God het gesorg dat Jesus se dood en opstanding nie in die lug bly hang nie, maar in alle mense se lewens te lande kom, nie net Israel nie, maar regoor die wêreld. Die Heilige Gees het kragtig begin werk om van alle gelowiges in alle nasies getuies vir Jesus te maak. “Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en Samaria en tot aan die uiterstes van die aarde”
Twee duisend jaar voor die uitstorting van die Heilige Gees het God Abraham belowe dat sy nageslag soos die sand van die see sou wees en ʼn heilsame effek op die aarde sou hê: “.... en in jou sal al die geslagte van die aarde geseën word” (Gen.12:3). Met hierdie belofte het God ver vooruit na die effek van die Christendom op die wêreld gekyk. Hierdie belofte was nie vir Abraham se fisiese afstammelinge nie, maar sy geestelike afstammelinge: “En as julle aan Christus behoort, dan is julle die nageslag van Abraham en volgens die belofte erfgename” (Gal.3:29). Dit is die geestelike Israel, ʼn onsigbare, dog heilige volk wat uit alle gelowiges bestaan.
God se belofte aan Abraham kon nie in die fisiese Israel verwerklik nie, maar slegs in die geestelike Israel, iets wat die dwaalgeeste in die Israel Visie rooi laat sien! Dit wat God sedert Pinksterdag geestelik gemaak het, wil hulle vleeslik maak. Paulus maak dan selfs die onderskeid: “Let op Israel na die vlees...” (Rom.10:18). Hy praat ook baie van Jode wat na die vlees roem.
Met Pinksterdag het alle roem in die vlees verval toe ook nie-Jode tot die wonderlike ontdekking gekom het dat hulle nie buite God staan soos wat die Jode hulle laat voel het nie, maar deur die bekering wonderlike geloofsekerheid verkry het dat God hulle volledig by die geestelike Israel insluit. Jesus het ook vir Grieke, Egiptenare, Siriërs (of watter nader nasie ook al) gesterf! “... God neem die persoon van die mens nie aan nie ...” (Gal.2:6).
Die Jode was baie eksklusief – hulle wou alleen in die hemel wees en die hek na die hemel as’t ware vir nie-Jode gesluit. Dis waarom Jona vir God kwaad was toe Hy hom na Nineve (Assiriërs) stuur. Heidene het mos nie in God se genade gedeel nie! Hierdie verkeerde gesindheid was ʼn baie groot struikelblok wat gebreek moes word ten einde die Evangelie van verlossing in Jesus Christus verder te kon voer.
En dis wat op Pinksterdag in Jerusalem gebeur het. Die Heilige Gees het kragtig in apostels gewerk en hulle in 14 tale laat getuig dat die hek na die hemel vir elke sondaar wat hom bekeer, oop is. Jesus se lyding, dood, opstanding en hemelvaart het ʼn nuwe bedeling gebring; ʼn uitstorting van seën op die mensdom; Abraham se geestelike nageslag het gestalte verkry.
Op Pinksterdag het God hierdie hekke soos deur ʼn ontploffing laat oopgaan; hekke wat tot vandag toe nog oop is en oop sal bly totdat Jesus weer kom. Die Gees het mense se lewens kom verander. Waar is daar ʼn beter voorbeeld as Petrus? Voor Pinkster berispe hy Jesus: ”.... mag God dit verhoed, Here, dit sal U nooit oorkom nie!” (Mt.16:22). Ná Pinkster praat hy ʼn ander taal!
Wat het die ommeswaai in Petrus se lewe gebring? Die Heilige Gees wat die krag en die betekenis van Jesus se dood en opstanding aan Petrus se siel vasgeknoop en van hom ʼn kragtige getuie gemaak het. So ook die ander apostels. Dit was nie ʼn eenmalige getuienis nie, maar kenmerk die werking van die Heilige Gees deur die eeue tot vandag toe. Ons leef immers in die Pinksterbedeling. Watter praktiese effek het dit op die mensdom? Wanneer die Heilige Gees ʼn sondaar tot die geloof roep, laat Hy die skille van hul oë afval om te sien dat hulle nie sonder ʼn persoonlike verhouding met Jesus Christus in die hemel kan kom nie. Jy kan dit net met geestelike oë sien!
Omdat mense dit dringend moet weet, gebruik die Heilige Gees getuies om mense te vermaan. Petrus vermaan die tempelgangers op Pinksterdag: “... Laat julle red uit hierdie verkeerde geslag” (Hand.2:40). Hierdie boodskap moes na buite geneem word: “Maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judea en Samaria en tot aan die uiterstes van die aarde” Die ganse mensdom moet weet dat redding slegs deur Jesus Christus is.
Die boek Handelinge draai om die as van 1:8. Dis ʼn aangrypende verhaal hoe hierdie boodskap al hoe verder versprei is en baie nie-Jode tot bekering gekom het waarvan Cornelius (Romein) en die tronkbewaarder van Filippi (Griek) aangrypend is. Let op die voorgeskrewe verspreidingsgebiede - Jerusalem (tuis), Judea (nabye omgewing), Samaria (verdere omgewing) tot by die eindes van die aarde. Nie die een of die ander nie, maar almal gelyktydig.
God het selfs vervolging gebruik om die gemeente in Jerusalem wakker te skud en uit hul gemaksone te boender. Duisende mense het uit vrees vir hulle lewe Jerusalem verlaat. Oral waar hulle gegaan het, het hulle deur die werking van die Heilige Gees kragtige getuienis gelewer en gemeentes tot stand laat kom.
Wat beteken Pinkster vir ons? Presies dieselfde as wat dit vir die eerste gelowiges beteken het – die ontvang van krag van die Heilige Gees om lewende getuies in ʼn geestelik dooie wêreld te wees. Ons wêreld is inderdaad aan die sterwe. Elke skuif van die mensdom is ʼn skuif agteruit. Daar is groot werk om te doen!
Amen!