Gedagtes vir elke dag
Of lees almal by Gedagtes vir elke dag
Sommige mense skep behae daaruit om in onvrede te lewe; twis en wraakgierigheid word deur die Woord van God veroordeel omdat dit op selfvergelding en liefdeloosheid dui. Die vrug van die Gees is onder meer vrede (Gal 5:22). Iemand wat heeltyd onmin soek dra nie die Gees van God in hom nie. En iemand wat die vrede van Jesus Christus ken, sal altyd onvrede en onmin aktief vermy – vlug daarvan weg.
JY LEEF NET EEN KEER!
Ds Andrè van den Berg
“Die vrees van die Here is ʼn fontein van die lewe, om van die strikke van die dood af te wyk” - Spr.14:27 (1 Kon.3:3-15)
Koning Salomo was buitengewoon slim omdat hy sy wysheid direk van God ontvang het. Wysheid het nie net sy eie lewe vergemaklik nie, maar hom ook as koning gehelp om die lewe vir sy onderdane sinvoller te maak.
Uit Spreuke en Prediker wat uit Salomo se pen gevloei het, sien ons dat hy van een ding baie bewus was - dat die lewe ʼn baie kort reis was en derhalwe reg geleef moes word. Salomo het geleer dat die lewe nie ʼn probleem was wat opgelos moes word nie, maar eerder ʼn werklikheid wat beleef moes word. In hierdie proses het sy onderdane kennis geneem van sy vaste geloof in God. Sy geloof en sy lewe was een ding.
Die lewe is ʼn kosbare gawe uit God se hand. Ons gaan egter net eenmaal op die aarde lewe en nooit weer nie. Gevolglik is die lewe soos ʼn valskermsprong; ons moet dit die eerste keer regkry! En hiervoor het ons, soos Salomo ook ervaar het, God se leiding en Woord nodig wat ons leer om die regte dinge te doen en die verkeerde dinge te vermy. “Die vrees van die Here is ʼn fontein van die lewe, om van die strikke van die dood af te wyk” (teksvers). “Dorings en vangnette lê op die pad van die verkeerde; hy wat sy siel wil bewaar, bly ver weg daarvandaan” (Spr.22:5)
Talle belowende jong lewens is al deur verkeerde dinge voortydig beëindig. Stap maar net deur ʼn begraafplaas. Daar word gesê dat die lewe hoogstens 10% is van wat met jou gebeur, maar 90% wat jy daarvan maak. En dis waar - ons kan niks aan die lengte van ons lewe doen nie, maar slegs aan die diepte. Maar dan moet ons reg optree.
God wil hê dat ons hierdie eenmalige lewe voluit moet leef. Ongelukkig lewe baie mense beswaarlik – hulle bestaan eerder. Hulle is so oor veiligheid begaan, dat hulle gulde geleenthede mis. Dit maak mense banger vir die lewe as vir die dood. Daar is in werklikheid geen besondere geheim aan ’n goeie lewe nie. Dit gaan om regte keuses; nie dat dit ʼn lewe volmaak maak nie, maar wel geseënd. En dis wat tel – ʼn lewe wat deur God geseën is. “Hy sal diegene seën wat die Here vrees, die kleintjies saam met die grotes” (Ps.115:13).
Die lewe is baie kort. Moses skryf: “ ... ons bring ons jare deur soos ʼn gedagte” (Ps.90:9). Daarom is die lewe net te kort om aan beuselagtighede aandag te gee en te kosbaar om dit met verkeerde dinge te besmet. Jesaja berispe sy volk omdat hulle hul met verkeerde dinge opgehou het: “Hulle voete hardloop om kwaad te doen... hulle gedagtes is onheilsgedagtes, verwoesting en verbreking is in hul paaie” (Jes.59:7).
Laat ons nooit vergeet dat daar ʼn einde aan ons lewens gaan kom nie. Koning Salomo skryf in Pred.12:5 “... want die mens gaan na sy ewige huis...” Gevolglik is die lewe ʼn huiswaarts reis. God gee aan ons die lewe om ons siele vir die ewigheid voor te berei. En as ons deur die wedergeboorte ’n lewe in die geloof lei, sal ons hierdie tydelike lewe sonder hartseer verlaat omdat ons die wonderlike belofte uit Christus se eie mond het – Hy het vir ons plek in die Vader se huis voorberei (Joh.14).
Die teenoorgestelde is egter ook waar - as jy nie reg lewe nie, kan jy ook nie reg sterwe nie. Dit gaan per slot van sake oor hoe jy op die aarde leef. As jy Jesus in jou lewe gevind het, kan jy tevrede op jou lewe terugkyk want jy het dubbeld geleef – geestelik en wesentlik.
Alhoewel die lewe ʼn gawe van God is en alles wat uit sy hand kom goed is, is die lewe nie altyd maneskyn en rose nie. Dit het ook sy beproewinge. Die lewe is soos ʼn ui wat lagie vir lagie afgetrek word met trane tussenin. Ons het ook maar soos in fotografie die negatiewe nodig om te ontwikkel. Daarom geniet ons as gelowiges wat ons kan geniet en verduur ons wat ons moet verduur. Die lewe is ʼn strydperk maar darem nie ʼn oorlogsterrein nie!
Salomo het geleer dat God die lewe gee om daaraan toe te voeg. Daarom het hy wysheid bo rykdom verkies. Ons kan nie net onttrekkings maak nie, maar ook deposito’s. Dink aan JF Kennedy se bekende woorde: “Moenie vra wat die land vir my kan doen nie, maar eerder wat ek vir die land kan doen” .
God wil hê dat ons iets van ons lewens moet maak. Hy leen die lewe aan ons soos ʼn lamp met die doel dat ons dit so helder as moontlik moet laat skyn alvorens ons dit aan ons nageslag oorhandig. Daarvoor moet ons die lewe leef en nie slegs verduur nie. Lewe is beweging. Iets wat nie beweeg nie, is dood!
As ons die Bybel se voorskrifte volg, leef ons goed. “U woord is ʼn lamp vir my voet en ʼn lig vir my pad” (Ps.119:105). God wil hê dat ons die aardse lewe geniet. Daarom het Hy vir ons die Bybel met al die nodige voorskrifte gegee. Want as ons die lewe op aarde geniet, hoe gaan ons nie die lewe in die hiernamaals geniet nie!
Ongelukkig maak die mens die lewe deur ongehoorsaamheid aan die Woord van God vir homself moeilik. Elke mens wat in die lewe struikel, het iewers op sy lewenspad van God se Woord afgedwaal. ʼn Sinvolle lewe het twee reëls. Die eerste is om nooit van God se Woord af te dwaal nie. Die tweede is om nooit die eerste reël te vergeet nie!
Mag ons God vir ʼn lang lewe bid? Beslis, solank as wat ons leef asof elke dag wat Hy ons lewens spaar, ons laaste dag op aarde gaan wees want eendag gaan ons reg wees! ʼn Lang lewe is egter nie altyd die beste lewe nie, maar ʼn lewe wat aan Christus gewy is. So ʼn lewe is ʼn afgeronde lewe ongeag die tydsduur.
Al probleem wat ʼn gelowige met die lewe het, is dat daar soveel mooi dinge is om te doen, maar so min tyd om dit in te vermag. Ek lees onlangs van iemand wat gesê het: “Die lewe het my aan die arm beetgekry en gesê: Ek gaan nie lank met jou wees nie. Laat ons roer!”
Salomo het besef dat die lewe elke dag soos water by hom verby vloei. Dit word weggespoel om vir iets anders plek te maak. “Wat gewees het, dit sal daar weer wees; en wat gebeur het, dit sal weer gebeur, en daar is glad niks nuuts onder die son nie” (Pred.1:9). Daarom is daar vir die mens min dinge so aangenaam soos ʼn vreugdevolle gister en ʼn hoopvolle môre. Ja, daar is niks beter om te doen as om reg te leef nie. En daarvoor moet ons ons lewe aan iets toewy wat langer as ons aardse lewe gaan duur.
God gee aan ons die lewe; dis ons keuse of ons dit goed of sleg gaan lewe. Elke lewe is ʼn kunswerk wat deur die persoon wat dit leef, self gevorm word. Ja, elke mens skryf sy eie lewensverhaal. Hoe lyk joune? Onthou, jou lewe is ʼn boodskap na buite. Watter boodskap dra jy aan die mense in jou huis, by die werk en by jou ontspanning oor? ʼn Goeie voorbeeld kan nie geminag word nie. Is jy ʼn goeie voorbeeld van ʼn gelowige of ʼn tragiese verskoning?
Luister na koning Salomo se aanbeveling vir die lewe: “Die vrees van die Here is ʼn fontein van die lewe, om van die strikke van die dood af te wyk” Laat mense kennis neem van iemand wat na God se hart geleef het!
Amen!