Gedagtes vir elke dag
Of lees almal by Gedagtes vir elke dag
Ons wonder soms wat van ons in hierdie deurmekaar wêreld gaan word. Maar sodra ons weer onthou dat by ons liefdevolle God niks onmoontlik is nie, word dit maklik om jou in sy Hande te stel. Soos Hy in Jeremia 32:27 vra: "Ek is die Here, die God van al die mense. Is iets vir My onmoontlik?"
DIE GRIMERING VAN BLYDSKAP
Ds Andrè van den Berg
“Wees dan nie bedroef nie, want die blydskap in die Here – dit is julle beskutting” - Neh.8:11
In die Ou Afrikaanse Vertaling lees ons dikwels die woord salig. Al die Saligsprekinge begin met “Salig is die ….” Salig beteken gelukkig; ’n woord wat so alledaags geword het, dat dit min betekenis dra. Dit het meer met ’n sensasie as met diepgewortelde blydskap te doen. Paulus noem God in 1 Tim.1:11 die salige God – die Een wat blydskap in harte bring, een van God se eienskappe wat aandag verdien.
Gelowiges moet blydskap hê: “Verbly en verheug julle omdat julle loon groot is in die hemel…” (Mt.5:12). Daarvoor moet ons in die blydskap in die Here ingaan soos wat ’n mens by ’n deur ingaan. God is nie net die bron van liefde, waarheid en genade nie, maar ook van blydskap. Dit bewaar ons teen die negatiewe dinge van die lewe wat ons swartgallig wil maak. “Wees dan nie bedroef nie, want die blydskap in die Here – dit is julle beskutting” (teks).
Nadat Kores die Pers, die Babiloniërs verslaan en die nuwe wêreld-heerser geword het, het hy Israel en Juda uit ballingskap laat terugkeer. Hulle het die verwoeste mure van Jerusalem geesdriftig begin opbou. Alles het goed gegaan totdat hulle teenstand van die Samaritane en van hul eie mense begin kry het. Dit het hul geesdrif gedemp en swartgallig gemaak.
Dit het die bouwerk so vertraag dat Nehemia (goewerneur) en Esra (priester) die volk tydens die huttefees ernstig moes aanspreek. Hulle het nie vir mense gebou nie, maar vir die Here. Hy wou dat Jerusalem se mure opgebou moes word. Esra en Nehemia eis van die volk om hulle nie deur teenstand van stryk laat bring nie, maar in hul stryd die blydskap van God te ervaar. ” Wees dan nie bedroef nie, want die blydskap in die Here – dit is julle beskutting” (teks).
Wat is die blydskap in die Here? Dis nie gewone menslike blydskap nie, maar iets baie spesiaal - ’n gawe van God. “En die vrede van God, wat alle verstand te bowe gaan, sal julle harte en sinne bewaar in Christus Jesus” (Fil.4:7). Neh.8:11 praat hiervan. Dis ’n gawe van God wat jy in baie moeilike tye ervaar, wanneer niks jou ontstel nie. Die vrygeworde bannelinge het dit ervaar en die muur in ’n rekordtyd herstel. God se blydskap gee krag en bemoediging!
Jesus se volgelinge het die wind sterk van voor gekry. Daarom het God die krag van sy blydskap in hulle gegee: “Dit het Ek vir julle gesê, dat my blydskap in julle kan bly en julle blydskap volkome kan word” (Joh.15:11). In Joh.17 bid Jesus tot God: “... Ek spreek hierdie dinge ... sodat hulle my blydskap volkome in hulle kan hê” (:13). Blydskap is krag!
God se blydskap loop egter oor ’n kruis. Heb.12 sê dat Jesus vir die vreugde wat Hom voorgehou is, die kruis verdra het. Sal jy nie bly wees as iemand sy lewe gewillig vir jou aflê nie? Jy moes sterf, maar hy neem jou plek in. In die boek A Tale of Two Cities is ’n man op pad na die valbyl om in die plek van ’n vriend te sterf. Net voordat hy die skavot bestyg, sê hy: “Dis die beste ding wat ek ooit gedoen het”. Die beste ding wat Jesus ooit gedoen het, was om sy lewe vir ons af te lê, want daardeur het Hy ons van die ewige dood verlos en ons sekerheid van ’n ewige lewe gegee. Kan daar groter blydskap wees?
Op sy sterfbed getuig Dawid dat God hom dikwels van gevaar verlos het omdat God hom liefgehad het: “En Hy het my uitgelei in die ruimte, Hy het my gered, omdat Hy behae in my gehad het” (2 Sam.22:20). Dis net sowaar van ons geestelike redding! “Omdat hy My liefhet, sê God, daarom sal ek hom red; Ek sal hom beskerm, omdat hy my Naam ken” (Ps.91:14).
In die Gelykenis van die Talente sê die heer vir die flukse diensknegte om in die vreugde van hul heer in te gaan. As ons tot bekering kom, gaan ons in God se vreugde in. God is bly oor elke bekering. “Ek sê vir julle dat daar net so blydskap sal wees in die hemel oor een sondaar wat hom bekeer…” (Luk.15:7).
As ons tot bekering kom, lei die Heilige Gees ons met ’n doel in God se blydskap in – om krag te ontvang. ” ...maar julle sal krag ontvang wanneer die Heilige Gees oor julle kom en julle sal my getuies wees” (Hand.1:8). Daar is ongelooflike krag en bonatuurlike beskerming in die blydskap van die Here. Daarom noem die teksvers dit tereg ’n beskutting.
Ons volksgenote is baie negatief. Negatiewe gesindhede tap ’n mens se geestes-energie dat jy later gaan stilstaan en niks meer wil doen nie. God se blydskap daarenteen gee jou ongelooflike krag en bonatuurlike uithouvermoë . Nadat ’n engel van God vir Elia in die woestyn van moedeloosheid versterk het, het hy 40 dae aaneen gestap. Ja, daar is ook fisiese krag in God se blydskap!
God wil aan elke gelowige hierdie gawe van blydskap in die Here skenk. Nie almal aanvaar dit nie. Wie dit aanvaar, ontvang uitsonderlike krag om in beproewing staande te bly. Hierdie blydskap in die Here is nie ’n opsie nie, maar onontbeerlik vir hulle wat die Here opreg wil dien.
Wie die blydskap in die Here nie ervaar nie, sondig baie makliker as hy wat dit wel ervaar. Vlug vir die sonde want dit lei altyd tot ’n verlies aan blydskap. Luister wat sê Dawid: “Laat my vreugde en blydskap hoor ... Verberg u aangesig vir my sondes ... Skep vir my ’n rein hart, o God en gee opnuut in die binneste van my ’n vaste gees” (Ps.51:10-12).
Daar is geen groter vreugde op aarde as om die Here voluit te dien nie. En dis net moontlik as ons God se blydskap het. Hy nooi ons om sy gawe te aanvaar. Die blydskap in die Here is nie per toeval nie, maar per keuse. Jy besluit of jy dit deel van jou lewe maak of nie. Mense kan dit op jou gesig sien!
Gelowiges is onder verpligting om die blydskap van die Here uit te straal. Dit maak hulle anders en is die onmisbare teken van Jesus se teenwoordigheid in hul lewe. In die middel-eeue het ’n spesiale vlag voor die paleis gewapper om te sê: Die koning is tuis. Blydskap is die vlag wat vir mense sê dat Koning Jesus in my lewe tuis is.
Die blydskap in die Here laat gelowiges anders as ongelowiges optree. Tydens die steniging van Stefanus lees ons: “Maar hy was vol van die Heilige Gees en het die oë na die hemel gehou en Jesus wat staan aan die regterhand van God” (Hand.7:55). Hoe was dit moontlik? Alleenlik met die blydskap van God in hom. En hierdie blydskap weerkaats! Dit het hom enduit laat volhard.
Wat leer ons van Stefanus? Dat blydskap nie die afwesigheid van smart is nie, maar die teenwoordigheid van God in ons beproewing. Blydskap is nie ʼn bestemming waarheen ons reis of iets wat ons kan besit nie. Dit kan ook nie gedra of verbruik word nie. Die blydskap in die Here is die heerlike ervaring om elke minuut met die liefde en genade van God omring te wees. Hierdie blydskap is nie ’n bestemming nie maar gelowiges se manier van reis. Dis geloof wat ʼn landingsplek gevind het.
En nou iets spesiaal vir ons susters. Julle hou mos van grimering nie waar nie? Die blydskap van die Here is die beste grimering. As blydskap op jou gesig ontbreek, is jou gesig geskend. Grimeer jou maar swaar daarmee!
Die resep vir blydskap staan nie op geld geskryf nie. As jy vanoggend geen blydskap in jou lewe ervaar nie, soek jy heel waarskynlik op verkeerde plekke daarna. God se blydskap lê nie iewers in kluise opgesluit nie. Dit word in die skatkamers gevind van die siel wat Jesus as Verlosser vind!
Blydskap lê in ’n onophoudelike hunkering na Jesus. Daarom is daar geen ware blydskap buite Hom nie. Die blydskap van die Here is nie iets wat toevallig op gelowiges se pad kon nie, maar die resultaat van regte besluite en gelowige optredes. Wat sien mense in ons? Wat verhinder jou om van kop tot tone een groot Halleluja te wees?
Amen.