Gedagtes vir elke dag
Of lees almal by Gedagtes vir elke dag
Hoe gaan dit met ons volk? Die slegste ooit! Sal jy graag ʼn verandering in hierdie land wil sien? Wat doen jy daaraan? Bid jy vir ons Boerevolk? As jy egter om herstel bid, maar jy sluit jouself by hierdie proses uit, bid jy verkeerd. Dis maklik om te bid en jouself daarna uit die voete te maak.
VOORSPOED- SWENDELAARS
Valse hoop te koop
Ds. A.E van den Berg
Inleiding
"You don't get rich writing science fiction. If you want to get rich, you start a religion." Ron Hubbard
Voorspoedswendelary is ʼn Amerikaanse godsdiensuitvoerproduk waarmee duisende liggelowige mense wêreldwyd uitgebuit word. Dit maak die Christendom baie seer omdat dit vir wanhopige mense valse hoop gee. In ʼn wêreld waar mense toenemend sukkel om kop bo water te hou, geniet die godsdiensswendelaars hul soustreinritte.
Geloof word as ʼn handelsooreenkoms tussen God en mens voorgehou met die belofte dat Hy diegene wat vir hulle geld gee met stoflike welvaart vergoed. Time het met ʼn meningsopname in 2006 bevind dat 17% van die kerkgangers in Amerika hiermee genoeë geneem het. Dit gaan alles oor geldmaak. Hierdie kerke het almal liefdadigheidstatus en is dus nie verplig om fondse aan die staat te verklaar nie.
Suid-Afrika het etlike multi-miljoenêr evangeliste waarvan Angus Buchan (MightyMen), Ray McCauley(Rhema), Theo Wolmarans (Christian Family Church) en Attie Boshoff (Christian Revival Church) die bekendste is. In Afrika het biskop David Oyedepo(Nigerië) na beraming $150 miljoen met die towenaar TB Joshua kort op sy hakke. Minstens ses Nigeriese evangeliste besit hul eie vliegtuig. Die rykste godsdiensswendelaars is Kenneth Copelandvan Amerika met bates van $769 miljoen. Joyce Meyer het $100 miljoen.
1. Swendelaars
Godsdiensswendelaars smous almal met dieselfde produk - valse hoop. Mense sonder hoop betaal jaarliks miljoene daarvoor. Oral Roberts (1918-2009) het hierdie bedrog in 1947 in Amerika stapel getuur deur mense te belowe dat God geld wat vir sy saak gegee word, sewevoudig sou vergoed. Hy het dit saad-geloof genoem omdat gesaaide saad altyd veelvuldige opbrengste het. Mense daag by dienste op om saad (geld) te saai met die verwagting dat hulle baie meer gaan terugkry en word hul begroeting niks anders as ʼn begroting nie!
In 1953 skryf A.A Allen in ThesecrettoScripturalFinancialSuccess dat geloof geldprobleme wonderbaarlik kan oplos. Hy sê dat hy by geleentheid in ‘n geldelike verknorsing was en God sy $1 note in $20 note verander het!
In 1974 het Kenneth Hagin se RHEMA Bybel-opleidingsentrum vlam gevat en meer as 10,000 dwaalleraars binne 20 jaar opgelei. Een van hulle, Bruce Wilkinson, se boek Jabes se Gebed het etlike miljoene kopieë wêreldwyd verkoop.
Die Rhemagroep se materialistiese boodskap ontmasker hulle as ʼn voorspoedkultus en nie ‘n kerk in die ware sin van die woord nie. ‘n Kultiese kerkgroep begin altyd met ʼn leier wat planmatig onder die dekmantel van godsdiens ryk word. Niks daarvan is toevallig nie. Alles is so beplan.
2. Teikengroep
Godsdiensswendelaars buit veral mense met swak gesondheid, min geld en wat werkloos is uit – diegene wat bang is vir die toekoms. Swendelaars laat hulle glo dat hulle met geldelike gawes persoonlike sowel as gemeenskapsvoordele sal ontvang. Dit laat hulle belangrik voel en nie meer soos ʼn mier in ʼn reuse miernes nie.
Daarbenewens val mense wat moeg geword het vir die stereotipe tradisionele godsdiensbeoefening dikwels sulke swendelaars ten prooi. Hulle word deel van die melkkoei-stoeterywat die swendelkerke uit hul nate laat bars en in staat stel om mega-kerkstrukture naby hoofweë op te rig om mense se aandag te trek; veral dit wat in hul beursies is!
3. Piramidale skema
Die voorspoed-evangelie is in werklikheid ‘n piramidale skema met die pastoor aan die spits. Mense wat geld, gesondheid en aansien wil hê, koop daarby in. Daar is na berekening 500 miljoen mense wêreldwyd by een of ander vorm daarvan betrokke.
Liggelowige mense wat die Bybel nie ken nie en gevolglik mense se vertolkings daarvan aanvaar, word maklik ʼn gat in die kop gepraat. Swendelaars verkoop Jesus-aandele met ʼn glimlag op die gesig en ‘n nog groter een op pad bank toe. Die Engelse sê: a fool and his money are easily parted.
Eeue gelede het die Roomse Kerk agente gebruik om op bedrieglike wyse geld vir die bou van die Petruskerk (Rome) van lidmate te bekom. Die teenreaksie het onder andere tot die Protestantse hervorming gelei. Vandag smous skyn-Protestantse pastore ʼn gratis evangelie en bedek hul bedrog met verskeie Bybeltekste.
Baie skryf doktor voor hul naam, woon in ultra-luukse huise, ry duur motors en besit selfs privaat vliegtuie. Waar kry hulle die geld daarvoor? Van mense wat met breinspoelingstegnieke mislei is. Hulle leefstyl verraai absoluut niks van die opofferend leefstyl van Jesus of sy dissipels nie.
Tydens kerkdienste wieg mense met betraande oë en arms in die lug in ʼn beswyming heen en weer. Daarna maak hulle hul sakke leeg met die verwagting om veelvoudig daarvoor geseën te word. Sulke dienste ontaard maklik in ʼn skare-histerie soos tydens ʼn rugbywedstryd as ʼn speler op die doellyn afpyl en die skare mal van opgewondenheid raak. Mense doen dit wat die pastoor sê. ‘n Tyd gelede het n swart pastoor mense aangesê om tydens ‘n diens gras te eet. ‘n Ander een het weer lede met vlieëgif bespuit.
4. Geen verantwoording nie
Godsdiensswendelaars werk hoofsaaklik op hul eie en gee voor om buite-kerklik te wees. Dis onwaar. Hul charismatiese onderrok steek al te duidelik onder hul gewaad uit. Hulle verwerp die Presbiteriale kerkregeringstelsel wat ouderlinge-toesig oor die leer en lewe van ʼn leraar laat hou en glo dat hul slegs aan God verantwoordelik is. En so regverdig hulle hul buitensporige inkomste.
5. Korrupsie
Godsdienskorrupsie neem oorhand toe. Amerikaanse TV godsdiensstasies is daarmee besmet. Benny Hinn se This is Your Day word in meer as 130 lande gebeeldsaai, die meeste ter wêreld. Dit wemel egter van dwaalleer.
Talle godsdiensswendelaars beroem hul op gawes van genesing en beeldsaai dit selfs. ʼn Amerikaanse radiostasie het Benny Hinn in 2002 en daarna weer in 2005 vir mediese bewyse van sy genesing gevra. Hy het nie daarop gereageer nie. Desondanks gaan die bedrog voort.
6. Die Christendom
Die Christendom is in armoede gebore. Dis iets wat gelowiges nie vreemd mag vind nie. Jesus is arm gebore en so gesterf. Ook sy apostels. Paulus skryf oor sy ontberings:
“Tot op hierdie uur ly ons honger en dors, is ons naak en word geslaan, en swerwe ons rond, en swoeg ons deur met ons eie hande te werk. Word ons uitgeskel, ons seën; word ons vervolg, ons verdra dit; word ons belaster, ons troos; soos uitvaagsels van die wêreld het ons geword, die afskraapsel van almal tot nou toe” (1 Kor.4:11-13).
Gevolglik verwerp gelowiges alle leer wat geld verafgod. Jesus sê:
“Moenie vir julle skatte bymekaarmaak op die aarde, waar mot en roes verniel en waar diewe inbreek en steel nie; maar maak vir julle skatte bymekaar in die hemel, waar geen mot of roes verniel nie en waar diewe nie inbreek en steel nie.
“Want wat baat dit ’n mens as hy die hele wêreld win, maar aan sy siel skade ly? Of wat sal ’n mens gee as losprys vir sy siel?” (Mt.6:19,20; 16:26).
“ ... As jy volmaak wil wees, gaan verkoop jou goed en gee dit aan die armes, en jy sal ’n skat in die hemel hê; en kom hier, volg My. Maar toe die jongman dié woord hoor, het hy bedroef weggegaan; want hy het baie besittings gehad. En Jesus sê vir sy dissipels: Voorwaar Ek sê vir julle dat ’n ryk man beswaarlik in die koninkryk van die hemele sal ingaan. En verder sê Ek vir julle, dit is makliker vir ’n kameel om deur die oog van ’n naald te gaan as vir ’n ryk man om in die koninkryk van God in te gaan” (Mt.19:21-24).
Geen kerk hoef egter ʼn bedelaarsbestaan te voer nie. Maar om valse hoop aan weerlose mense te verkoop, is skaamtelose bedrog wat nie by die geloofslewe pas nie. Desondanks laat hulle mense glo dat hulle geestelike punte verdien; mense wat nie besef dat hulle ingeloop word nie. Hoe anders kan hulle hul luukse leefstyl volhou? Geld word nie gebruik om in die lewe van die kudde maar eerder in dié van die herder te belê. ‘Pastor’ beteken om vir ʼn kudde te sorg. Ironies genoeg sorg hulle eerder vir hulself!
Die meeste swendelaarskerke is eintlik niks anders as kultusse nie. In kultusse spits mense hul toewyding hoofsaaklik op die herder toe. Al wat so ‘n leier moet doen, is om sy volgelinge in toom te hou en in sy woord te laat glo.
Gelowiges mag wel vir stoflike voorspoed bid indien dit om die eer van God gaan. Let op Dawid se gebed in Ps.51. Hy bid dit vir een rede – om God daarmee te eer; so anders as pastore wat net vir eie gewin bid!
Slot
Hoofstroomkerke doen feitlik niks om hierdie swendelary hok te slaan nie omdat hulle self met ernstige dwaalleer in eie geledere te kampe het. Daarbenewens veroorsaak die verslapping van hul eie kerkreëls toenemend gemeenskapsveral en kan die pot die ketel dus nie verwyt nie.
Godsdiens het in talle kerke ʼn vermaaklikheidskaskenade gewordwat dit vir dwaalleraars makliker maak om mense te mislei. Mense soek nie meer na die waarheid nie en het dus geen behoefte om die Bybel te leer ken of God om daaglikse leiding te vra nie. Hulle vertrou eerder godsdienstiges met hul sieleheil. Daarbenewens soek wanhopige mense altyd na wonderoplossings en is hulle verleentheid misleiers se geleentheid om hulle in hul strik te vang!