Gedagtes vir elke dag
Of lees almal by Gedagtes vir elke dag
In Matthéüs 11:20-24 waarsku die Here Jesus dat mense wat Hom nie as Verlosser aangeneem nadat hulle van Hom gehoor het nie, 'n groter oordeel kan verwag in die hiernamaals as mense wat nooit van Hom gehoor het nie. Het u die voorreg gehad om Hom te leer ken? Gebruik daardie geleentheid om die ewige lewe te verkry.
MOENIE KLEINGELOWIG WEES NIE
Ds AE van den Berg
“En Jesus het dadelik sy hand uitgesteek en hom gegryp en vir hom gesê: Kleingelowige, waarom het jy getwyfel?” (Mat.14:31).
Wat 'n aangrypende verhaal! Een nag terwyl die dissipels vivang, kom Jesus op die water na hulle aangeloop. Hulle het hul boeglam geskrik en gedink dit was 'n spook. Toe Jesus hul gerusstel dat dit Hy was, het Petrus Hom gevra of hy op die water na Hom toe kon kom? “En Hy sê: Kom!...” (:29). Daarop het hy uit die skuit na Jesus geloop; 'n wonderbeskikking!
Mat.14 leer ons hoe ware geloof lyk, iets wat ons almal meer van wil hê om ook die storms van ons eie lewe te trotseer. God help ons en gee in die Bybel die nodige lig om enduit met Hom te wandel. Die besonderhede van die verhaal leer ons dat geloof selfs op water kan loop.
In Petrus se wonder-ervaring is daar 'n paar sleutelelemente wat aandag verdien. (i) Die eerste daarvan is dat Petrus gevra het. Hy vra dat Jesus hom moet roep. Daarna het hy op Jesus se antwoord gewag en gehoorsaam daaraan uit die skuit geklim en op die water na Hom toe gestap.
Waarom het Jesus vir Petrus geroep om na Hom te kom terwyl daar ook ander dissipels in die skuit was, insluitende Johannes, Sy lieflingdissipel? Waarom juis vir Petrus? Omdat hy gevra het. Mat.14 verstrek gee geen ander rede as dat Petrus gevra het nie. Gelowiges moet God vra: “Bid, en vir julle sal gegee word; soek en julle sal vind; klop en vir julle sal oopgemaak word” (Mat.7:7).
In Mat.15 verkry 'n Kanaänitiese vrou antwoord op haar gebede nadat sy aanhoudend gevra het. In Luk.18 het die weduwee se aanhoudende vra die onregverdige regter op haar versoek laat reageer en toegestaan. En dis wat die Bybel ons leer – gelowiges volhard in gebed.
Petrus het gevra; die ander dissipels nie. Daarom het Jesus hulle nie na Hom genooi nie. Dit bring ons by die kern-element van geloof – kinders van God moet vra! Ons moenie bang wees om te vra nie. Hy sal op sy tyd antwoord. Miskien nie met die antwoord wat ons sou wou hê nie, maar Hy antwoord. Geloof wat op water loop, is geloof wat aanhou vra.
Dit bring ons by die tweede kern-element van geloof. (ii) God se wil. Wat vra Petrus? Jesus se woord/wil. “Here, as dit u is...” (:28). Hy soek God se wil voordat hy uit die skuit klim. En dis wat geloof doen; dit soek God se wil. Geloof is nie 'n instrument waarmee 'n agenda bevorder word nie. Geloof wat op water loop, soek God se wil en nie dié van 'n mens nie.
(iii) Die derde kern-element van geloof is om op God te wag. Petrus spring nie onmiddellik uit die skuit nie, maar wag op Jesus. Geloof wat op die water loop, wag op die Here totdat Hy antwoord. Die mens hou van opwinding en om geloofspronge te maak. Die wag-aspek ontbreek dikwels. Petrus klim nie uit die skuit voordat hy van Jesus gehoor het nie. En dis waar baie gelowiges hulle rieme in die geloofslewe vasloop. Hulle spring sonder om op God se antwoord te wag en beland dan in die moeilikheid!
By geleentheid het Satan Jesus probeer versoek om 'n verkeerde geloofsprong te maak. Hy neem Hom bo-op die dak van die tempel en daag Hom uit om te spring omdat Ps.91 sê dat God gelowiges beskerm. Jesus het hom met Deut. 6:16 geantwoord – God mag nie versoek word nie. Jy mag jouself nooit in 'n situasie plaas, dat Hy jou moet kom red net om Homself te bewys nie. Dis wat op Golgota gebeur het toe een van die misdadigers Jesus uitgedaag het om Homself en hulle te verlos.
Gelowiges durf nooit op grond van Bybeltekste waaghalsig raak nie. Dit lei altyd tot ontnugtering. Ons moet altyd op die hele raadsbestel van God let en Jesus se voorbeeld volg. Hy het na die hele Skrif gekyk en nooit 'n besluit op grond van een enkele teks gemaak nie. Petrus doen die regte ding; hy wag op Jesus. Geloof wat op water stap, wag op die Here totdat Hy antwoord. 'n Vierde geloofselement in Mat.14 is vertroue. Toe Jesus vir Petrus sê om te kom, het hy dadelik uitgeklim en nie toegelaat dat vrees vir verdrinking hom keer nie.
Ware geloof word altyd aan volle vertroue in God gekenmerk en ongeloof aan wantroue. Petrus het al sy vertroue in Jesus se woord geplaas en nie in sy eie vermoë om te kon oorleef indien iets sou skeefloop nie. Jesus het ook nie van Petrus verwag om iets van sy kant te doen nie. Hy sou sorg dat Petrus by Hom uitkom. Jesus sou alles doen. “.... want sonder My kan julle niks doen nie” (Joh15:5). Petrus se vertroue was geheel en al op Jesus se woord gerig en nie op eie vermoë nie.
Vertroue in God stel ons in staat om enigiets te kan doen wat God van ons vra. Petrus het geen natuurlike aanleg gehad het om op water te loop nie. Nogtans het Hy dit vermag. Ja, God dompel ons soms in situasies buite ons natuurlike vermoë om ons geloof te toets. Al wat Hy vra, is gehoorsaamheid en vertroue. Baie gelowiges het hul al uitgebrand deur hul met dinge besig te hou wat God hul nooit beveel het nie. En dan is hulle teleurgesteld in Hom. Maar Hy het hulle dan geen opdrag daarvoor gegee nie!
Toe Petrus in die skuit was, was daar geen sigbare pad na Jesus toe nie. Die les wat ons hieruit leer, is dat God vir ons die nodige pad maak namate ons na Hom toe beweeg. Toe Petrus uit die skuit klim, het God die water onder sy voete hard gemaak. Hy het op bevel van Jesus uitgeklim en 100% geglo dat hy Hom sou bereik. Geloof wat op water loop, vertrou op God alleen en nie op vermoëns nie.
(v) 'n Vyfde geloofselement is geloofsywer. Toe Jesus Petrus roep, het hy nie getalm nie. Hy het Jesus nie vir waarborge gevra nie. Dit was ook nie vir die ander dissipels nodig om hom oorboord te stoot nie. Hy was gehoorsaam en het uitgeklim. Ja, geloof wat op water kan loop, is 'n ywer-geloof, slaggereed om te doen wat Jesus ook al vra.
Opgesom: Petrus het die vyf kern-elemente van ware geloof gehad (i) Hy het gevra (ii) Hy het God se wil gesoek (iii) Hy het gewag totdat die Here antwoord (iv) Hy het op Jesus vertrou (v) Hy het geloofsywer gehad.
As die verhaal hier geëindig het, sou 'n dawerende applous vanuit die skuit opgeklink het. Bravo, broeder, bravo! Ongelukkig eindig die verhaal nie hier nie. Petrus het goed begin. Toe hy op pad na Jesus die oog van Jesus wegneem en gevaartekens bemerk, het hy begin sink. Toe doen hy die regte ding – hy het na Jesus geroep en is gered: “En Jesus het dadelik sy hand uitgesteek en hom gegryp en vir hom gesê: Kleingelowige, waarom het jy getwyfel?” (teks).
Baie gelowiges het al in die geloof uit die skuit geklim en spoedig begin sink weens 'n gebrek aan geloof of 'n sonde wat begaan is. As hulle dan die hande na Jesus uitsteek, red en versterk Hy hulle geloof.
In Mat.14 het Jesus nie vir Petrus opgetel en na die skuit terug gedra nie. Petrus het sy ongeloof bely waarna die water onder hom weer hard geword het. Om op die geloofswater te kan loop, moet hierdie vyf geloofselemente ook in ons lewe teenwoordig wees – ons moet vra, God se wil soek, wag totdat Hy antwoord, Hom 100% vertrou en geloofsywer aan die dag lê.
Dis die geloof wat vrede in harte bring, 'n vrede wat ons nie net help om die storms van die lewe te kan trotseer nie, maar ook verseker dat Jesus ons sal optel wanneer ons moed ons begewe en ons in die lewe begin sink.