Gedagtes vir elke dag
Of lees almal by Gedagtes vir elke dag
Woorde is magtig en kan ander baie gelukkig of baie seer maak. Woorde is ook openbarend oor wie jy werklik is. Jou karakter skyn sommer gou deur jou woorde. Wees versigtig wat jy sê – jy het 'n veranderwoordelikheid teenoor ander sowel as teenoor jouself. Dink vóór jy praat, en wees daarmee anders as die meeste mense wat onnadenkend leef.
BLOMVROUE
Lees reeks by BLOMVROUE
Aletta Lübbe
Poinsettia
(Euphorbia pulcherrima)
'n Amerikaanse staatsman wat bekend was vir sy diplomasie in Latyns-Amerika, het tydens sy ministerskap in Meksiko in 1828 'n plant na die VSA gebring. Hierdie man was Joël Roberts Poinsett (1779-1851) van Charleston. Met vele intellektuele belangstellings soos die kunste, asook landbou en plantkunde, was hy een van die veelsydigste Amerikaners van sy tyd.
Die tropiese struik wat hy na die VSA geneem het, sou na hom vernoem word: poinsettia, oftewel Euphorbia pulcherrima. Pulcherrima beteken "die mooiste" en laat reg geskied aan die interessante blom wat die tradisionele Kersfeesblom van die Noorde word. Die werklike blom is 'n onopvallende geel trossie tussen die vlamrooi, wit of pienk skutblare wat eintlik die aantrekkingskrag is. Die rare dubbele poinsettia is selfs nog meer skouspelagtig. Die gewilde blomstruik groei oral waar die klimaat aan die tropiese grens. Dit groei van steggies, wil baie water hê wanneer dit blom en is gevoelig vir koue en ryp.
Die langbenige struik groei vinnig tot sowat drie meter hoog en is nogal droogtebestand. Soos ander plante wat melk afskei, kan die blomstele in kookwater geweek of geskroei word om die geplukte blomme langer te laat hou - ook binnenshuis.
Die poinsettiamens is sterk en seker van haarself. Sy het 'n groot impak op haar omgewing en kan nie misgekyk word nie. Sy is temperamenteel en verkies 'n standplaas of staning waar sy warm en beskut kan woon. Sy kan nie ander mense se wisselende emosies hanteer nie en verdra nie om afgejak te word nie.
Die poinsettia is gewoonlik lank en lenig en grasieus. Haar kortbeensuster beny haar haar slanke hoogskopbene. In haar bakvissiejare skuil sy by fotosessies agter haar korter maats, maar op die atletiekveld is sy so tuis soos 'n vis in die water. Sterk manne kry trane in hul oë wanneer sy ritmies en glad tydens 'n wedloop oor die hekkies seil en eerste oor die wenstreep hardloop. Vanselfsprekend haal sy loshande die eindrondte in 'n mejuffrou So-en-so-kompetisie.
Maar jy moenie aan haar krap of torring nie. Haar humeur is kort en jy kan seerkry - veral wanneer jou vel dun en sensitief is. Agterna kan sy hangblaar treur en jammer wees oor gedane sake waaraan daar geen keer meer is nie. Daarom leer mens om haar versigtig te hanteer - en liewer op 'n afstand te bewonder. Het jy egter die regte aanslag om haar te benader, kan jy oorweldig word deur haar wonderlike kameraadskap. Koue mense laat haar verskrompel inmekaar hang. Sy het geen weerstand teen koue en kritiek nie.
Teen Kersfees floreer sy. Dis koekiesbak en huis versier en klere maak en klaarmaak vir elke somerse Kersfees. Dis Kersboom tooi met sterretjies en blinkers en pakkies opmaak met lintjies en strikkies. Om te gee is vir haar veel belangriker en lekkerder as om te ontvang.
En op 'n groot aand in haar lewe swaai die helderrooi rok en sing sy vrolik saam met die Wicombs:
Dans met die rooi rok, die rooi rok van my
Dis die rooi rok, die rooi rok, die rooi rok wat swaai...
Hoewel sy 'n liefde vir klassieke musiek het, waardeer sy ook ballades en volksmusiek, het sy ook vreugde in Nancy Aimes en Audrey Landers.
Sy lewe voluit vir die oomblik en straal bo-oor die vaalheid en naarheid van elke dag se afbrekende en sensasionele nuus. "Pluk die dag!" lag sy die druipende depressiewe mens toe. "Dis nog nie die einde van jou lewe nie. Lig jou kop op - die lewe gaan aan!" Vir haar is 'n dag sonder lag 'n verlore dag. Immers, sy weet hoe dit voel om lukraak gepluk te word en deur onkundige hantering slap en vormloos oor die rand van 'n blompot te hang.
Die poinsettiavrou weet: baie vroue verloor hulle mans na hartaanvalle wanneer die land, gemeenskap en gesin hulle die nodigste het. Daarom spring sy uit en probeer sy spanning en stres verlig. Sy hou die kroon op sy hoof en neem ongemerk die sleurtakies van sy skouers af, help selfs verdien wanneer die ekonomie knyp. En verloor sy hom tog eendag, weet sy hoe om 'n motor te onderhou, hoe 'n kragprop aangesit word, hoe 'n deurslot en 'n waterkraan werk en hoe die inkomstebelasting en die huishoudelike begroting en administrasie werk. Sy werk en studeer deeltyds en siedaar, eindelik is sy 'n professionele vrou in 'n manswêreld.
Mense word meegesleur deur haar vurigheid, haar ambisie en idealisme. Die sterk lyne in haar persoonlikheid en voorkoms en die grasie waarmee sy lewe, vir vandag lewe, lig jonk en oud uit die put, uit die groef van elke-dag-is-eners.