Gedagtes vir elke dag
Of lees almal by Gedagtes vir elke dag
Ons is tog so besorg oor ons kinders, maar ons doen ook soms groot skade daarmee. Ons kinders is nie óns kinders nie; hulle behoort aan God – ons moet hulle ons liefde gee en hulle liggame huisves maar nie hulle siele nie, dit behoort aan God. Ons moet ook nie probeer om hulle te maak soos ons is nie want die lewe beweeg nie agteruit nie. Vertrou hulle net aan God toe terwyl julle hulle in liefde versorg.
DIE SLIM MANNE
BYBELVERHALE VIR JONG KINDERS (5)
Lees almal Bybelverhale vir jong kinders
Jacqueline Sibley
Het jy al een aand laat genoeg wakker gebly om die sterre te sien? Dit is dan baie donker buite maar die sterre skitter helder en blink.
Lank, lank gelede, in 'n land ver hiervandaan, was daar 'n paar baie slim manne. Die Bybel vertel nie vir ons hoeveel hulle was nie alhoewel die mense dink daar was drie. Hulle het daarvan gehou om na die sterre te kyk. Hulle het die name van al die groot sterre geken. Hulle presies geweet waar om te kyk om hierdie sterre te sien. Baie keer het hulle saam na die sterre gekyk.
Een aand, toe die slim manne so na die sterre kyk, sê die een man: "Kyk! Daar is 'n nuwe ster!"
"Dit kan nie wees nie," sê 'n ander een. "Jy maak seker 'n fout."
"Nee, hy is reg," sê nog 'n ander een en hy wys na die hemel.
Die slim manne kyk en kyk, en sowaar... daar is 'n nuwe ster in die hemel. Dit is groot en helder en blink. Hulle is baie opgewonde. Hulle glo vas die nuwe ster is nie sommer verniet daar nie. Dadelik gaan kyk hulle in hulle boeke. Hulle wit weet waarom die ster daar is.
Toe lees hulle dat God belowe het om 'n spesiale Koning na die aarde te stuur.
"Die ster is natuurlik daar omdat die Koning gebore is," sê hulle vir mekaar.
"Hy moet 'n baie belangrike Koning wees as daar 'n spesiale ster vir Hom is. Kom ons volg die ster. Kom ons gaan kyk self na die nuwe Koning."
"Ons moet presente saamneem vir die nuwe Koning," sê die een slim man. "Kom ons neem vir Hom presente saam wat Hy kan gebruik as Hy groot is."
Versigtig kies hulle die presente en pak dit op die rûe van hulle kamele. Toe klim hulle self op en ry; hulle volg die ster.
Kamele kan baie vinnig beweeg maar die slim manne moet baie ver reis. Dae lank ry hulle. Hulle volg die nuwe ster wat in die lug skitter.
Eindelik kom hulle in die land waar Jesus gebore is. "'n Nuwe Koning is in die groot stad gebore. Ons moet soontoe gaan om Hom te vind." Hulle ry reguit na die groot stad.
Oral waar hulle kom sê hulle: "Ons soek na die nuwe Koning wat gebore is. Kan julle vir ons sê waar Hy is? Ons wil Hom graag sien." Maar die mense weet nie waar die nuwe Koning is nie.
Toe hoor koning Herodes van die slim manne. Hy hoor ook dat hulle na 'n nuwe Koning soek. "Hy is nie in mý paleis nie maar ek sal vir my soldate vra. Hulle sal weet waar Hy is."
Herodes laat roep dadelik sy manne. Hy vra vir hulle: "Waar sal die Koning wat God belowe het, gebore wees?"
Die manne sê: "Die Boek van God sêHy sal in Betlehem gebore word."
Koning Herodes stuur toe 'n boodskap na die slim manne. Hy sê: "Kom na my paleis toe maar julle moet vir niemand daarvan vertel nie. Dit moet 'n geheim wees." Die slim manne gaan toe. Hulle vertel vir Koning Herodes van die nuwe ster in die lug.
"Luister nou mooi na my," sê koning Herodes. "Die nuwe Koning is in Betlehem gebore. Ek wil hê julle moet Hom daar soek. As julle Hom kry moet julle terugkom en vir my vertel waar Hy is sodat ek ook soontoe kan gaan."
Toe klim die slim manne weer op hulle kamele en ry na Betlehem. Daardie nag sien hulle weer die nuwe ster in die lug. Hulle is baie bly daaroor. Hulle is nou seker dat die ster vir hulle wys waarheen hulle moet gaan. Die ster skyn helder oor Betlehem.
Uiteindelik kom hulle by die huis waar Maria, Josef en die Baba Jesus woon. Hulle bly nie meer in die stal waar Jesus gebore is nie. Hulle woon nou in 'n klein huisie.
Dit lyk glad nie soos die huis van 'n Koning nie. Maar toe die slim manne binnegaan, weet hulle dat hulle op die regte plek is. Hulle sien die Baba Jesus en weet dat Hy die Een is waarna hulle gesoek het.
Hulle kniel voor Hom en gee vir Hom die presente. Hulle is baie bly dat hulle die ster gevolg het en die nuwe Koning wat God gestuur het, kon sien.
GEBED
Dierbare God, ek weet dat U die slim manne gehelp het om Jesus te sien. Dankie dat U ook vir my help om meer van Hom te weet.
AMEN
Die reis na Egipte... vervolg