Gedagtes vir elke dag
Of lees almal by Gedagtes vir elke dag
Daar is wel redes waarom Suid-Afrikaners die afgelope paar jaar met lang gesigte loop, maar daar is rede om ook te glimlag – God is in beheer van alle omstandighede. Daarom kan ons saam met die digter in Psalm 42 sê: Hoop op God, want ek sal Hom nog loof – die verlossing van my aangesig en my God! Dit is moontlik om God se vriendelike aangesig te ontmoet en sy glimlag oor ons te voel skyn, dan sal óns aangesigte ook verhelder!
STUDIE VAN DIE OU TESTAMENT (8)
DIE AFRIKAANSE PROTESTANTSE BYBELSKOOL
Studieleier: ds. Andrè van den Berg (Sr)
Lees reeks by Studie van die Ou Testament
LES 8
DIE VERWOESTING VAN TWEE STEDE
Gen 18-20
1. Sara luister na God se woorde
Pas na die vierde verskyning het God vir ʼn vyfde keer verskyn sodat Sara ook die belofte kon hoor. Abraham het op daardie tydstip in Hebron gewoon. By geleentheid het drie manne eendag by hom opgedaag. Alhoewel al drie met hom gepraat het, word van een van die drie gesê: “Toe sê die Here…” Dus was God self daar! Daarna het Hy weggegaan waarna die oorblywende engele na Sodom is.
Abraham het die vreemdelinge hartlik ontvang waarna Sara hulle afgeluister het. Hulle boodskap was kort en kragtig: Sara sou oor ʼn jaar ʼn seun baar. Daarna het Sara gelag omdat sy aan die moontlikheid getwyfel het. Sy was heeltemal te oud! Toe sy oor haar optrede ingeroep is, het sy bang geword en ontken dat sy gelag het. God het egter die geloof in haar wakker gemaak waarna sy aan die belofte geglo het.
2. Sodom en Gomorra
Toe die engele na Sodom en Gomorra vertrek het, het God sy besluit oor die verwoesting van die twee stede aan Abraham bekend gemaak (Jes.41:8, Amos 3:7). Die inwoners se sonde het ten hemel geskreeu en die oordeel nie verder uitgestel word nie. God weet alles van sy skepping af. Niks ontsnap sy oog nie (Ps.11:4-7).
Abraham het geweet dat God die stede wou straf en dat niks God se voorneme sou stuit nie. Hy het hom egter nie soos ʼn latere Jona oor die moontlike verwoesting van die heidene verheug nie, maar iets daaraan probeer doen. Abraham het vir die behoud van die stede gebid en selfs met God daaroor gekibbel. Hy was oor moontlike regverdiges in die stede besorg. Daarna het God belowe om die stad te spaar indien Hy selfs net tien regverdiges daarin kon vind. Helaas was daar nie eens soveel nie en het God belowe om Lot en sy gesin se lewens te spaar.
Toe die twee engele in Sodom aankom, het Lot in die poort gesit en hulle na sy huis genooi om daar te oornag. Hy was net so gasvry soos sy oom en het geweet wat met hulle sou gebeur indien hulle die nag buite sou vertoef. Homoseksualisme het in hierdie twee stede floreer. Mense sonder herberg kon maklik verkrag word!
Daardie nag het ʼn magdom van wellustige heidene Lot se huis omsingel en van hom geëis om sy besoekers aan hulle uit te lewer om hul onnatuurlike drange te kon bevredig (Rom.1:27). Lot was bitter ontsteld en het selfs sy dogters se maagdelikheid in ruil aangebied (Rigt.19:24). Die heidene het hierdie aanbod van die hand gewys omdat hulle manne wou hê. Lot was ʼn vreemdeling en het volgens die inwoners niks te sê gehad nie. Sy verhouding met die inwoners was van meet af aan sleg (2 Petr.2:6-8). Daarna het die engele ingegryp en die wellustige heidene met blindheid geslaan.
3. Lot vertrek haastig
Lot was slegs van die woede van die inwoners gevrywaar, maar nie van die oordeel wat die stede sou tref nie. Nadat die engele die oordeel herhaal het, het Lot en sy gesin haastig vertrek. Hy en sy gesin sou, soos ʼn Noag van ouds, die enigstes wees wat ʼn oordeel sou oorleef.
Toe Lot en sy gesin talm, het die engele hulle betreklik hardhandig uitgelei. Hulle mag nie omgekyk het nie en moes na Soar vlug. Lot se vrou het omkyk en in ʼn soutpilaar verander (Luk.17:31-33). In die Dooie See omgewing is daar etlike mensagtige soutstrukture. Die geskiedskrywer Flavius Josephus beweer dat hy die vrou van Lot daar gesien het.
Lot was bang om in Soar te gaan woon en hom in ʼn nabygeleë spelonk tuisgemaak. Mense het dikwels in spelonke gewoon (1 Sam.22:1). Vir die dogters van Lot was die toekoms betreklik uitsigloos. Hulle verloofdes het saam met die heidene in die oordeel omgekom. Hulle wou dat hulle vader se geslag voortduur en hom verlei om bloedskande met hul te pleeg. Sodom het dus ʼn bose invloed op hulle gelaat!
4. Abimeleg
Toe Abraham van Hebron af weggetrek het, het hy in Gerar gaan woon. Daar het hy ʼn soortgelyke ervaring as in Egipte gehad. Sara moes weereens sê dat Abraham haar broer was. Isak sou later dieselfde ding doen (Gen.26:7). Koning Abimeleg het Sara gesien en haar vir hom as vrou laat haal. Net God kon Abraham red! God het Abimeleg in ʼn droom met die dood gedreig waarna hy Sara teruggee het. Daarna het God vir Abimeleg en sy huis van onvrugbaarheid genees.
In Gen.20:7 word Abraham ʼn profeet genoem. Dis die eerste keer dat hierdie benaming in die OT gebruik word en ook enigste keer dat dit van Abraham gesê word. Abraham moes weer die vermaning van ʼn aardse vors aanhoor. Abraham het sy optrede verdedig deur te sê dat hy gereken het dat die mense van Gerar heidene was. Hy was baie duidelik verkeerd!
Die optrede van Abimeleg het as sulks van ʼn hoë sedelike bewussyn onder die mense van Gerar getuig. Wat Abimeleg van Abraham se betoog gedink het, word nie vermeld nie. Hy het hom egter nie soos die Farao van weleer onder gewapende begeleiding landuit gestuur nie. Abimeleg het Abraham selfs as gas laat aanbly en aan hom geskenke gegee. Daarna het Abraham as voorbidder vir die koning opgetree.
Hoe het hierdie situasie nie van die een in Egipte verskil nie! Destyds was daar ʼn geldige rede vir hul vertrek na Egipte want daar was hongersnood in die land. Hierdie keer word geen hongersnood vermeld nie. Abraham was net nie meer lus om langer in Hebron te woon nie en God het hom nie verhinder om te trek nie.
Abraham het die groot en wonderlike les geleer dat as God met jou is, niemand teen jou kan wees nie! Andersyds wou God hom as profeet gebruik om die gelowige Abimeleg en sy huis van hul gebrek te genees. God het Abraham se swerflus in ʼn les van gehoorsaamheid en genade omgekeer. Mense se skynbaar sinnelose optredes verkry dikwels op die ou einde enorme heilswaarde!