Gedagtes vir elke dag
Of lees almal by Gedagtes vir elke dag
Moed is om dié ding te doen waarvoor jy bang is. Daar kan nie sprake wees van moed sónder vrees nie, maar dis die wete dat iets ánders belangriker is as vrees.
STUDIE VAN DIE OU TESTAMENT (34)
DIE AFRIKAANSE PROTESTANTSE BYBELSKOOL
Studieleier: ds. Andrè van den Berg (Sr)
Lees reeks by Studie van die Ou Testament
LES 5
SAUL EN DAWID
1 Sam 16; 17: 1-11,32-51; 18: 1-20; 22: 6-23; 23: 1-13, 16-25; 24; 26: 1-5,12-25.
1. Dawid word gesalf
Dawid was die man na God se hart waarvan Samuel gepraat het. Hy is lank voor sy troonopvolging in die geheim tot koning gesalf. Dis onder die dekmantel van ʼn offermaaltyd gedoen sodat Saul nie daarvan te hore moes kom nie. God is reg in al sy werke, al is dit ook in die geheim! God het Saul twee maal op die proef gestel en klaaglik misluk. Daarna het God hom laat weet dat Hy sy koningskap sou verloor. God het Samuel na ʼn plaas in Betlehem gestuur waar hy Dawid as Saul se opvolger gesalf het. God het met Saul se salwing sy hart verander sodat die Gees van God by geleenthede oor hom vaardig kon word. Met Dawid was dit baie anders want die Gees het gedurig in hom gewoon!
2. Saul se bose gemoedstoestand
Saul het ná Dawid se salwing nog etlike jare regeer. Dawid het egter geduldig op God gewag. Saul was ʼn dapper krygsman wat sy volk telkens tot ʼn oorwinning gelei het. Desondanks was hy sielsongelukkig. Benewens Samuel se woorde wat hom gehinder het, het Saul nooit sy sonde voor God bely nie. Hierdie gevoel van magteloosheid het hom in sulke onbeheerste woedebuie laat uitbars, dat sy dienaars hom gevrees het. Al wat hom dan kalmeer het, was harpmusiek. Nadat Saul van Dawid se buitengewone harpspel verneem het, is hy as musikant in die paleis aangestel. Wanneer Dawid op sy harp gespeel het, het die bose gees wat Saul geteister het, hom verlaat.
3. Dawid en Goliat
Die Filistyne was gedugte vyande en Jonatan se aanval op hulle het om wraak geroep. Hulle het hul in die dal van die terpentynbome, vyf ure te voet van Betlehem af, gemonster. Alhoewel beide die leërs slaggereed was, wou nie een die eerste skuif maak nie. Goliat, die Filistynse reus, het Israel uitgedaag om iemand te stuur om met hom kragte te meet. Die uitslag sou die wenner bepaal. Saul was bang en het ʼn groot prys aan ʼn oorwinnaar uit eie geledere beloof wat selfs sy eie dogter ingesluit het.
Tydens Dawid se besoek aan sy broers, het hy van Goliat se uitdaging gehoor en dit aanvaar. Dawid het nie op sy eie krag staat gemaak nie, maar geweet dat God met hom was. Nadat hy Goliat met ʼn klip uit sy slingervel neergevel het, het hy hom met sy eie swaard onthoof en die Filistyne op die vlug laat slaan. Saul was baie ingenome met Dawid se oorwinning en het hom oor sy leër aangestel waarna hy en Jonatan boesemvriende geword het.
4. Saul haat Dawid
Die vroue was baie ingenome met Dawid. Dit het Saul baie jaloers gemaak. Nie net was sy eer aangetas nie, maar het hy ook begin vermoed wie die koningskap na hom sou ontvang. Hy het Dawid met veragting begin bejeën en hom ʼn paar keer selfs probeer doodmaak. God het Dawid telkens van leed gevrywaar.
Saul het sy woord verbreek toe hy sy dogter Merab aan ʼn ander man gegee het. Daarna het hy teësinnig sy jongste dogter Migal aan Dawid as vrou gegee. Om alles te bekroon, was Jonatan, sy eie seun en die aangewese troonopvolger, ook aan Dawid se kant. Vrees en agterdog het aan sy siel begin knaag!
Toe die situasie te gevaarlik raak, het Dawid gevlug. Hierdie vlug sou baie jare duur. Hy is eers na Samuel in Rama en daarvandaan verder. Saul het op almal wat Dawid skuiling gebied het wraak geneem en in Nod selfs al 85 priesters laat teregstel. Slegs Abjatar het aan die slagting ontkom en by Dawid skuiling gaan soek.
5. Dawid in Kehila
God het Saul toegelaat om Dawid te vervolg om sy geloof te versterk. Nadat die Filistyne die dorsvloere van Kehila begin plunder het, het Dawid hulle met God se hulp verjaag. Hy was selfs as vlugteling vir sy volk van nut. Toe die burgers van Kehila hom aan Saul wou uitlewer, het God hom gewaarsku sodat hy betyds kon vlug.
- 6. Dawid sien Jonatan vir die laaste keer
Terwyl Dawid in die woestyn Sif was, het Jonatan hom gaan bemoedig. Hy was daarvan oortuig dat Saul se wraak tevergeefs was en dat Dawid die volgende koning sou wees. Jonatan was selfs gewillig om onder Dawid te dien. God het egter anders besluit. Jonatan sou met die eer van ʼn heldedood gekroon word; ʼn eer wat Saul nooit sou toekom nie!
7. Dawid in Maon
Saul was ʼn baie eensame mens. Sy onderdane was bang en teleurgesteld in hom. Saul was van God en mens verlate. In Maon het Dawid ʼn tweede vrou geneem – Abigail, ʼn weduwee. Haar eerste man, Nabal, was ongenaakbaar en het Dawid se gesantskap sleg behandel. Toe hy na ʼn beroerte oorlede is, het Dawid sy weduwee as vrou geneem.
8. Dawid in Engedi
Terwyl Dawid in Engedi was, het hy verneem dat Saul hom tegemoet getrek het. Saul en sy leër het een nag in een van die spelonke geslaap. Hulle was onbewus daarvan dat Dawid en ʼn paar van sy manskappe agter in die grot geskuil het. Die manskappe het dit as ʼn teken gesien dat God vir Saul in Dawid se hand gegee het. Nie Dawid nie. God sou self met Saul afreken. Dawid het geweier om sy hand na die gesalfde van God uit te steek.
Gedurende die nag het Dawid ʼn stuk van Saul se mantel afgesny en dit die volgende oggend op ʼn veilige afstand aan hom gewys. Dit het ʼn ommekeer in Saul se gemoed gebring, waarna hy erken het dat Dawid regverdig was. Daarna het hy by Dawid gepleit om nie sy huis uit te roei as hy koning word nie. Dawid het dit belowe omdat hy geweet het dat God die huis van Saul tot niet sou maak.
9. Dawid sien Saul vir die laaste keer
Saul het Dawid weereens begin haat en teen hom opgetrek. Dawid en Abisai het die nag tot by Saul gekruip en sy spies en waterkruik gevat. Toe Saul dit die volgende oggend sien, was hy baie aangedaan en wou met Dawid vrede maak. Dawid het hom egter nie vertrou nie en by Agis, die koning van die Filistyne, gaan woon. Saul sou Dawid nooit weer pla nie omdat hulle mekaar nooit weer sou sien nie.
Vervolg...