Gedagtes vir elke dag
Of lees almal by Gedagtes vir elke dag
Geld kan medisyne koop maar nie gesondheid nie; dit kan 'n huis koop maar nie 'n tuiste nie; dit kan geselskap koop maar nie vriendskap nie; dit kan vermaak koop maar nie geluk nie; dit kan kos koop maar nie 'n aptyt nie; dit kan 'n bed koop maar nie 'n goeie nagrus nie; dit kan 'n kruis koop maar nie 'n Verlosser nie; dit kan 'n goeie lewe koop maar nie die ewige lewe nie.
STUDIE VAN DIE OU TESTAMENT (73)
DIE AFRIKAANSE PROTESTANTSE BYBELSKOOL
Studieleier: ds. Andrè van den Berg (Sr)
Lees reeks by Studie van die Ou Testament
LES 2
DANIëL BEPROEF
DAN 4-6
1. Nebukadneser se droom van die groot boom
In hierdie geskiedenis is Nebukadneser self aan die woord en vertel watter tekens en wonders God aan hom gedoen het. Hy het ‘n droom gehad van ‘n groot boom vol vrugte wat die mensdom voed en skaduplek vir diere het. Toe het ‘n hemelse bode beveel dat dit afgekap moet word sodat net die penwortel oorbly. Daniël het vir hom die droom verklaar:
Die boom is die koning onder wie se heerskappy almal gestaan het. Die boom wat omgekap word, is die koning wat verwerp sal word en as strafmaatreël van God saam met die diere in die veld wees. Daar is egter een ligpunt: Die penwortel sal bewaar word – die koningshuis sal voortgaan.
Nebukadneser het geen dank teenoor Daniël uitgespreek soos tydens die vorige uitleg nie. Dit was uiteraard nie bemoedigend nie. Nogtans het Daniël iets gesê, ‘n waarskuwing en raadgewing: Nebukadneser moes met sy sondes breek sodat daar uitkoms kon wees. Hier word die suiwere Evangelie van bekering verkondig! Nebukadneser se lewe was vol sonde en onreg, eieroem en glorie sonder om aan die krygsgevangenes genade te bewys. God sou hom besoek!
Nebukdneser het nie na hierdie raad geluister nie en alles het hom getref. God het hom 12 maande lank tyd gegee. Hy was so vol van sy eiewaan dat hy nie wou insien dat God aan hom die koningskap gegee het nie. Hy sou kranksinnig word en dit sou hom ontneem word! In hierdie waansin wat oor hom gekom het, het hy gedink dat hy ‘n bees is en het plante soos die beeste geëet.
Gevolglik het sy mense hom verstoot. Na ‘n ruk het sy verstand weer teruggekeer waarna hy tot bekering gekom en God geloof en geprys het.
2. Beltsasar en Belsasar
Beltsasar is die Babiloniese naam van Daniël. Belsasar het later op die troon van Babel gekom nadat Nebukadneser se seun, Evil-Merodag en daarna sy skoonseun, Nergal-Sareser, en ook sy seun Nabonidus (drie kort na mekaar), nie die mag in Babel kon handhaaf nie. Belsasar was die laaste koning van die ryk. Nebukadneser het meer as 40 jaar regeer. Dit was die glansperiode van Babilon as wêreldheerser.
Intussen het ‘n jong volk in die Ooste mag begin verwerf – die Perse. Hulle voorlopers was die Meders, wat saam met Babel die Assiriese ryk vernietig het. Hulle is egter met die rykswording in die ryk van Kores, die Pers, opgeneem, ‘n ryk wat as die Medo-Persiese ryk bekend gestaan het. Kores wou eerstens Babel verslaan, maar het eers vir Croesus van Lidië verslaan omdat Babel hierdie koning om ‘n bondgenootskap genader het.
Intussen het Babel ‘n nuwe koning gekry – Nabonidus, wat vanuit ‘n self opgelegde ballingskap in Arabië regeer het. Sy seun Belsasar was met die regering in Babel belas. Nadat Nabonidus in die hande van Kores geval het, het Belsasar nog ‘n tyd lank uitgehou. Hy het selfs feesgevier terwyl die stad aangeval is. Daniël het die skrif aan die muur uitgelê en daardie selfde nag is Belsasar deur die Perse gedood. Dit was die einde van die eens magtige Babiloniese ryk.
Alhoewel Belsasar nie ‘n seun van Nebukadneser was nie, word hy in Dan.5:2 so genoem. Dit beteken dat hy uit die nageslag van Nebukadneser was. Baie konings is byvoorbeeld seun van Dawid genoem, bedoelende uit die nageslag van Dawid. Alhoewel Saul die eerste koning van Israel was, word die troon van Israel altyd met Dawid verbind. So ook die troon van Babel met Nebukadneser.
3. Babel
Toe die Perse die wêreldmag bekom het, het die stad Babel nie dadelik verdwyn nie, al was sy glansperiode verby. Die eerste Persiese konings het dit nog steeds as woonplek gebruik. Dit het een van die sewe wonders van die ou wêreld gehuisves – die hangende tuine. Koning Xexes het Babel egter vernietig. Alexander die Grote wou dit weer as hoofstad van sy ryk opbou, maar dis ná sy vroeë dood gestaak. Dis nooit weer opgebou nie.
Babel het ‘n simboliese betekenis van alles wat teen God is (Openb.18:2). Ná die sondvloed is die bou van die toring van Babel die eerste teken van openlike opstand teen God. Van Genesis tot Openbaring het dit geen gunstige betekenis nie en dui op die ryk van Satan.
4. Daniël en Darius
Darius is ‘n bekende Persiese koningsnaam. Daar was drie met hierdie naam. Die eerste Darius word ook verskeie kere in die boek Esra genoem en het vir 37 jaar regeer. Sy seun Xerxes het hom opgevolg. Hy is ook Ahasveros genoem van wie daar in die boek Ester gelees word. Die eerste Darius word ook die Meder genoem en was die seun van nog ‘n Ahasveros. Hy is deur Kores as koning oor Babilon aangestel (Dan.9:1). Hy het 120 landvoogde oor Babilon aangestel om noukeurig belasting in te vorder en die saak van Kores te dien.
Honder en twining was 'n groot aantal landvoogde vir so ‘n klein grondgebied. Sodoende kon die grondgebied behoorlik gefynkam word. As ‘n wet eenmaal uitgevaardig is, was dit onherroeplik – die wet van Meders en Perse. Die 120 landvoogde het aan drie ministers verantwoording gedoen. Daniël was een van hulle. Darius het heelwaarskynlik van sy verdienste te hore gekom en hom in hierdie verantwoordelike pos aangestel.
Toe hy bo al die ander uitblink, het Darius dit oorweeg om hom bo almal oor die hele koninkryk aan te stel. Dit het afguns teen hom laat ontwaak sodat die ander teen hom ‘n aanklag gesoek het. Met betrekking tot sy ampswerk kon hulle nie ‘n vinger op hom lê nie.
Daarna het hulle ‘n ander plan gemaak en sy godsdiens geteiken deur die koning te verlei om ‘n nuwe gebod uit te vaardig dat elkeen wat gedurende 30 dae ‘n ander god as die koning aanbid in die leeukuil gegooi sou word. Dit het Darius geval en sy ego getreel.
Daniël was gewoond om drie maal per dag openlik tot God te bid. Hierdie gebod was uiteraard bindend. Gevolglik was hy voor ‘n keuse van lewe of dood! Hy het geweier om die gebod te gehoorsaam en is tot Darius se ontsteltenis in die leeukuil gegooi waar hy deur God se genade oorleef en die aanklaers daarna almal doodgemaak is nadat hul listige plan aan die dag gekom het.
Daniël het nooit na Israel teruggekeer nie. Hy was baie voorspoedig aan die Persiese hof en was tot in die derde jaar van Kores profeties werksaam. Gevolglik was hy ongeveer 60 jaar in diens van heidense konings en het heelwaarskynlik in Babel gesterf.