Gedagtes vir elke dag
Of lees almal by Gedagtes vir elke dag
Ons kan vir God niks wegsteek nie; nie ons swaarkry, ons sonde of ons liefde vir Hom nie. Kyk net hoe goed ken Hy ons: in Ps 139 sê Dawid: "U ken my sit en my opstaan; U verstaan van ver my gedagte. U deurvors my gaan en my lê, en U is met al my weë goed bekend. Want daar is nog geen woord op my tong nie – of U, HERE, U ken dit geheel en al". Natuurlik, want Hy het ons gemaak!
STUDIE VAN DIE OU TESTAMENT (77)
DIE AFRIKAANSE PROTESTANTSE BYBELSKOOL
Studieleier: ds. Andrè van den Berg (Sr)
Lees reeks by Studie van die Ou Testament
LES 2
ESTER RED HAAR VOLK
ESTER 4-8; 9:1-5, 10:1-3
1. Ester moet praat
Die Jode was hewig ontsteld en het rouklede (saq) aangetrek. Daarna het hulle in sak en as gaan sit. Saq was ʼn growwe materiaal waarvan rouklede gemaak is. Mordegai het ook een aangehad en het met as op sy kop deur die stad geloop en hardop geweeklaag. Toe hy by die haremhuis kom, het hy boodskappers na Ester laat stuur om vir haar volk by die koning in te tree.
Ester was aanvanklik onwillig omdat sy 30 dae laas ʼn bed met die koning gedeel het. Sy het dit as ʼn baie ongunstige teken beskou. Indien sy hom ongevraagd sou nader, kon dit haar dood beteken mits hy sy septer na haar uitsteek. Toe het Mordegai weer ʼn boodskap na Ester gestuur en haar laat weet dat sy dit buitendien nie sou oorleef nie. Al was sy koningin was sy Joods. Al uitweg was om met Ahasveros te praat!
Ester het toe ingestem om met die koning te praat al sou dit haar lewe kos. Net God kon haar red! Daarom het sy Mordegai gevra om al die Jode in Susan drie dae lank te laat vas ten einde genade van God vir haar volk te verkry. Daarna het sy na Ahasveros met die bekende woorde “As ek omkom, dan kom ek om” ingegaan. Sy het haar lewe vir haar volk op die spel geplaas.
Toe die koning haar in die voorhof sien, het hy sy septer na haar uitgesteek en met die gebruiklike oordrywing bemoedig (Mark 6:23). Ester het haar versoek nie onmiddellik aan hom gerig nie, maar gewag dat Haman teenwoordig was. Sy wou hom met haar beskuldiging oorrompel sodat hy nie met mooipratery kon wegkom nie. Daarom het sy hom en Ahasveros vir ete genooi. Tydens hierdie ete het Ahasveros haar na haar versugting gevra. Hy het geweet dat daar meer agter die uitnodiging as ʼn blote ete gesit het. Ester het egter gehuiwer en Ahasveros gevra om die volgende dag weer by haar te kom eet en Haman weer saam te bring waarna sy haar versoek aan hom bekend sou maak.
Haman was in sy skik om weer uitgenooi te word. Dit het sy eersug gestreel. Hy was ook baie nuuskierig om te weet wat op Ester op die hart gehad het. Alles het in sy guns verloop. Al wat hom gehinder het, was die oneerbiedige Jood wat in die poort van die koning gesit en nie vir hom opgestaan het nie. Hy moes iets met Mordegai doen! Sy vrou het ʼn plan gehad; Haman moes ʼn galg laat maak en die koning toestemming vra om Mordegai daaraan op te hang. Die galg is toe gemaak.
2. ‘n Eer word omgekeer
Daardie nag kon die koning nie slaap nie waarna hy vir hom uit die kronieke (dagverslae) laat voorlees het. Daarin het hy van die sameswering van Bigtan en Teres wat deur Mordegai oopgevlek is, te hore gekom en besluit om Mordegai te vereer. Toe Haman die volgende dag by kom, het Ahasveros hom gevra wat hy met ʼn man moes doen wat die koning groot guns bewys het? Haman het gedink dat hý die man was aan wie Ahasveros hierdie guns wou bewys en alles opgenoem wat hy vir wat hy vir homself wou hê - ʼn koninklike kleed, ʼn perd met 'n kroon op en ʼn uitroeper wat sy goeie daad besing. Eintlik het Haman na die eer van die koning self gestreef!
Toe die koning hom aansê om Mordegai so te laat vereer, was Haman bitter ontsteld. Maar omdat dit ʼn bevel van die koning was, kon hy dit nie weier nie en moes hy ook sy bose voornemens laat vaar. So is Haman bekaf na die ete waar Ahasveros op Ester se versoek gewag het. Ester het met eerbied en volle oorgawe vir haar en haar volk se lewe gepleit sonder dat Ahasveros geweet het watter volk ter sprake was. Ester het hom laat verstaan dat dit ʼn ramp sou afgee indien hy hierdie volk sou uitdelg. Ahasveros het na haar geluister en besef het dat iemand agter dié bose plan gesit het – Haman. Daarna het ʼn hofdienaar hom ingelig oor die galg wat Haman vir Mordegai laat maak het en is Haman veroordeel om aan dieselfde galg te sterf!
3. Ester en Mordegai se teenmaatreëls
Die besittings van ʼn tereggestelde het outomaties aan die koning behoort. Daarom kon Ahasveros Haman se huis aan Ester gee wat die beheer daarvan aan Mordegai oorgedra het. Nadat sy Ahasveros vertel het dat Mordegai haar oom was, het Ahasveros die seëlring wat hy van Haman weggeneem het aan Mordegai gegee en hom in sy hofhouding aangestel.
Desondanks het die gevaar nie verdwyn nie. Toe Ahasveros gevra is om die verdelgingsbevel tersyde te stel, kon hy nie doen nie omdat dit ʼn wet van Meders en Perse was. Hy het dit aan Ester en Mordegai oorgelaat om ʼn oplossing te vind. Die eerste bevel kon nie herroep word nie, maar met die magtiging wat Mordegai ontvang het, het Ahasveros ʼn tweede bevel uitgevaardig waarin die Jode toegelaat is om hulle teen die aanvallers te verweer. Dit sou laasgenoemdes tweemaal laat dink omdat hulle self ook kon omkom! Desondanks het 500 vyande in Susan en 75,000 landswyd omgekom waarna die Jode in Persië met rus gelaat is.
4. Die betekenis van Ester
Ester is die laaste boek in die OT wat oor die geskiedenis van die Jode in ballingskap handel. Esra en Nehemia handel oor die terugkeer. Alhoewel die Jode ʼn vernederde volk was, vertel die boek Ester ʼn wonderlike verhaal van hoe God oor sy volk in ʼn vreemde land gewaak het. Hy het hulle selfs gehelp om hul haters te oorweldig. Dat ʼn Joodse meisie uit die stam van Benjamin koningin van Persië geword het en haar oom tweede in rang onder die koning, is en bly ʼn wonder van God! En met hierdie glanspunt eindig die geskiedenis van die Jode in Persië.
Alhoewel die Naam van God nie in Ester voorkom nie, is dit vol van sy almagtige beskikking. Hy beskik alles, selfs die slapelose nag waarin Ahasveros die kronieke laat voorlees het. So ook die dwarsboming van die bose plan van Haman, ʼn werktuig in die hand van Satan. God het sy volk gestraf, maar hulle nie laat vernietig nie! Dat Mordegai op die stoel van Haman gaan sit het, verkondig die oorwinning van God oor Satan. Ester beteken ster. En hoe het hierdie jong vrou nie in haar volk se donkerste uur geskitter nie!