Gedagtes vir elke dag
Of lees almal by Gedagtes vir elke dag
Wanneer siekte, ouderdom, pyn of bekommernis jou konsentrasie wegrokkel, ontspan. God is 'n Vriend wat al hierdie dinge verstaan en jou bystaan.
WÁT, NADAT JY STERF? (5)
Lees reeks by WÁT, NADAT JY STERF?
Weet jy wat ná jou dood gebeur? Is die dood vir jou die einde van jou lewe; of die begin van 'n nuwe?
In hierdie reeks getuig dr Maurice Rawlings, M.D., 'n Amerikaanse kardioloog wie se werk dit is om mense uit die dood te probeer terugbring, van ervaringe waartydens hy resussitasie (dit is die proses van 'terugbring' wanneer die hart ophou klop het) op pasiënte toegepas het.
MENSLIKE HEMELVAART
Ervarings in die hiernamaals word gewoonlik beskryf as hemels, aangenaam, verfrissend of onbeskryflik. Die meeste van hierdie beskrywings kom natuurlik voor in onderhoude wat 'n paar dae ná die resussitasie op 'n ander plek gevoer word. Baie van diegene wat hierdie soort ervarings gehad het, is oortuig daarvan dat hulle bestem is vir 'n heerlike lewe in die hiernamaals. Vir sommiges is dit miskien waar, maar ander kan onder 'n wanindruk verkeer. Diegene wat slegte of onaangename ervarings gehad het, kan gewoonlik nie onthou as hulle weggeneem is van die plek waar die resussitasie plaasgevind het nie. Dit word bewys deur verslae wat tot dusver gepubliseer is. Ons sal later gesels oor die onaangename ervarings – laat ons nou eers na die aangenames kyk.
Waarom moet ons al die verslae publiseer as sommiges miskien nie verteenwoordigend is nie? En wat van gevalle wat nie altyd "Bybels" is nie?
Eerstens moet ons al die verslae rapporteer soos hulle ontvang word totdat ons meer akkurate verslae kan kry deur hulle op een of ander manier op te teken terwyl hulle plaasvind.
Tweedens is ons nie hoofsaaklik daarin geïnteresseerd of hulle ooreenstem of saamval met enige besondere filosofiese of godsdienstige beskouing nie. Dit word aangebied soos hulle gebeur. Ek sal my persoonlike mening en waarnemings gee.
Wisselende ervarings
Aangename ervarings toon dikwels 'n groot verskeidenheid. Hoewel die volgorde van die gebeurtenisse dieselfde mag wees, verskil die besonderhede dikwels van een ervaring tot die volgende. Die volgende verslag is gegee deur 'n jong dame in haar twintigerjare wat haarself sien sterf het. Sy het gesien hoe sy die toneel verlaat maar sy het die reis deur die tonnel nie voltooi nie:
"Ek het baie bloed verloor. Dit was omtrent 'n uur nadat ek geboorte gegee het aan my enigste kind. Toe hulle my van die draagbaar aftel na die bed, kon ek die bloed tussen tussen die draagbaar en die bed sien afstroom. Dit het gelyk asof die bloed uitspuit elke keer as my hart klop. Ek was daarvan oortuig dat my laaste uurgeslaan het.
"Hulle het met my na die teater gehaas. Bloed het die hele tyd op die vloer gespat. Toe ons in die teater aankom was ek skielik nie meer in my liggaam nie. Ek kan nie onthou dat ek dit verlaat het nie. Maar die pyn was minstens weg. Ek het in die linkerskanste hoek teen die plafon gesweef en afgekyk op my dokter. Ek het nie van hom gehou nie. Hy was besig om te vloek en het op die verpleegsters geskree. Ek dink hy was paniekerig as gevolg van my toestand. Ek was seker dat ek sou sterf.
"Hulle was besig om 'n inspuiting vir my gereed te kry om my aan die slaap te maak maar ek was oortuig dat ek sou sterf voordat hulle die bloeding kon keer. Ek het die gesigte van my moeder, my man en my babaseuntjie gesien. Hulle sou treur oor my dood en tog het ek nie terneergedruk gevoel nie. Om die waarheid te sê, vir my het dit nie gelyk asof dit veel verskil maak nie. Ek was nie juis ongelukkig nie en ek kon nie verstaan waarom nie.
"Die volgende oomblik was ek besig om vinnig in hierdie donker tonnel langs te beweeg sonder om aan die wande te raak. Daar was 'n soort suiggeluid. Aan die einde van die tonnel was daar hierdie geel-wit lig. Toe sê ek: 'Dis seker hoe dit voel om dood te gaan. Ek voel hoegenaamd geen pyn nie.' Ek was bly daaroor. Maar voordat ek die lig kon bereik en by die tonnel se opening kon uitbeweeg, was ek terug in die herstelkamer. Daar was vier beddens en ek het op een gelê.
"Ek sal nooit die wonderlike gevoeg van vrede vergeet wat ek ervaar het nie. Om een of ander rede was ek nie bang vir die dood nie maar ek was bly om my baba weer te sien!"
In die meeste gevalle kom daar 'onbeskryflike' ervarings voor waar die pasiënt sê: "Ek kan eenvoudig nie die woorde vind om te sê wat ek wil nie". Hy mag besonder aangename gevoelens ervaar saam met onaangenames wat veroorsaak word deur kopbeserings, beserings veroorsaak deur die feit dat hy vergruis is, of skietwonde. Die oomblik as die besering toegedien word is daar geweldige pyn en kan dit ook gebeur dat alle pyn eensklaps verdwyn.:
"Die pyn was weg nadat die eerste koeël in my vasgeslaan het. Ek het die tweede en derde nie gevoel nie. Ek het hierdie snaakse gevoel gehad dat ek in 'n donker ruimte rondsweef. Ondanks die duisternis het ek warmte gevoel en was ek heeltemal gemaklik hoewel my vel yskoud was. Ek het gedink ek was seker maar dood."
Soms kom die pasiënt tot verbasende insigte, en nuwe lewensbeskouings mag opduik soos in die volgende geval. Mev S. is deur die weerlig raakgeslaan terwyl hulle uitgekamp het:
"Die oomblik toe ek getref is, het ek presies geweet wat met my gebeur het. My gedagtes was glashelder. Ek was nog nooit so absoluut vol lewe as op daardie oomblik toe ek gesterf het nie."
Berou oor dié dinge wat sy nog altyd wou doen, maar tog nooit aangepak het nie, het in haar gedagtes opgekom:
"In hierdie stdium het ek skielik die antwoord gevind op 'n vraag wat ek nog nooit in woorde saamgevat het vir enige iemand nie, of om selfs deeglik te bedink nie: Is daar werklik 'n God? Ek kan dit nie beskryf nie maar die totaliteit en die werklikheid van die Lewende God het skielik in my wese ontplof en Hy het elke sel van my liggaam gevul met sy Glorie. Die volgende oomblik het ek tot my ontsteltenis gevind dat ek nie na God toe beweeg nie maar weg van Hom af. Dit was asof ek gesien het wat kon wees maar tog daarvan wegbeweeg het. In hierdie oomblik van paniek het ek probeer kommunikeer met die God wat ek geweet het daar moet wees."
Sy het gesmeek dat haar lewe gespaar moet word en beloof om dat aan God te wy as Hy dit spaar. Drie maande later het sy volkome herstel.
'Swewing' is skynbaar 'n algemene verskynsel nadat die liggaam verlaat is en in 'n nuwe dimensie oorgaan. 'n Voorbeeld hiervan is mev. C:
"Ek het longontsteking gehad en al sieker geword. My koors was geweldig hoog. Hulle het my later vertel dat ek 'n hele paar dae in 'n koma was en dat hulle nie verwag het dat ek sal leef nie. Ek is met ys toegepak en met 'n alkoholmengsel afgespons. Daar is aan my familie vertel dat daar niks meer vir my te doen is nie en dat ek waarskynlik ernstige breinskade sal oorhou as ek hoegenaamd bly leef.
"Terwyl ek in die koma was, het ek in 'n vallei gesweef. Daar was 'n helder lig in die verte op 'n berg en terwyl ek die berg genader het, het ek gesien dat daar pragtige orgideë en ander blomme teen die hange daarvan groei. Ek het my oupa tussen die rotse sien staan. Hy is jare tevore oorlede. Ek het nie met hom gepraat nie, maar ek het geweet dat ek daar wil bly en dat ek nie wil terugkeer nie.
"Teen die hang van die berg was daar 'n kruis en 'n figuur het aan die kruis gehang. Die Man was nog lewend. Dit was Jesus. Ek het die gevoel gekry dat dit beide die begin en die einde van die wêreld was. Toe was ek skielik weer terug in my liggaam.
"Sowat drie jaar gelede het ek 'n soortgelyke ervaring gehad terwyl op my geopereer is vir 'n probleem in my heup. My toestand is blykbaar vererger deur die kortisoonbehandeling wat ek vooraf daarvoor gekry het. Ek is gereed gemaak vir die narkose toe die dokters besef het is besig om te sterf. Ek het nie juis gevoel dat my gees die liggaam verlaat nie en ek het ook geen tonnel gesien nie, Ek het skielik net weer deur die vallei gesweef waar ek vroeër was. Dog hierdie keer was beide my oupa en ouma daar teen die rotsagtige hang van die berg. My ouma het gesê ek kan nie saam met hulle gaan nie, ek moet teruggaan. Sy het gehuil omdat ek nie kon bly nie. Ek weet nie of dit 'n plek van oordeel was of wat dit hoegenaamd was nie. Ek weet net dat dit my hele lewe verander het. Ek geniet die lewe nou meer omdat ek nie meer bang is vir die toekoms nie."
Ons kyk volgende keer na nog skeidings tussen gees en liggaam soos dit in verskeie stadiums plaasvind.
Vervolg...