Gedagtes vir elke dag
Of lees almal by Gedagtes vir elke dag
Omdat julle valsheid spreek...omdat hulle my volk vertel het deur te sê: Vrede! terwyl daar geen vrede is nie; en as die volk 'n muur bou, kyk, dan bepleister hulle dit met los kalk... Ek sal die muur afbreek wat jul met los kalk gepleister het, en dit op die grond gooi sodat sy fondament blootgelê sal word; dan sal die stad val en julle sal daarin omkom; en julle sal weet dat Ek die HERE is - Eségiël 13.
DIE GELYKENISSE VAN JESUS (5)
U kan hierdie reeks geskryf deur ds Andrè van den Berg lees by Jesus se gelykenisse
Die waarde van die koninkryk van God
Mt.13:44-46
Hierdie twee kort gelykenisse is net in Mattheus opgeteken en ontbreek by die ander Evangelie skrywers. Hiermee het Jesus sy volgelinge die belangrikheid van die koninkryk van God geleer; iets so belangrik dat alle ander dinge minder waarde het. Gevolglik moet daarna gesoek word. Vandaar die refrein wat herhaal word: “...gaan hy weg en verkoop alles wat hy het ...” Dit gaan in beide gelykenisse om die prys wat iemand bereid is om te betaal ten einde hierdie kosbaarheid te bekom.
Alhoewel daar verskille tussen die twee gelykenisse is, is die ooreenkomste groter. Beide beskryf die koninkryk van God as iets van onberekenbare waarde, iets wat onverwags gevind word en ʼn waagstuk om dit te bekom. Nogtans moet ons nooit dink dat die koninkryk van God iets is waarvoor ʼn mens kan werk nie. Dit sou op die dwaling van werkheiligheid neerkom wat dikwels by sektes gevind word.
Die koninkryk van God is iets heel anders en kan nie op dieselfde vlak gestel word as dinge wat deur mense waardevol geag word nie. Hierdie koninkryk sal nooit deur eie inspanning verkry kan word nie. Meer as ʼn eeu gelede loop ʼn Britse sendeling in Indië verby ʼn baie ou man wat pad langs kruip. Daar was nie meer velle aan sy knieë nie. “Waarom martel jy jouself so?” vra die sendeling. “Om in die hemel te kom” antwoord hy. Hierdie ou man het geglo dat hy die hemel deur eie inspanning kon bereik.
Ges.69: 2 “En ekself – wat kan ek doen om my sonde te versoen? Sou my hart met ywer gloei, sou my trane ewig vloei – nog gebede, nog geween kan my red Heer, U alleen”.
Die hoë waarde van die koninkryk kan deur geen mens verwerf word nie. Dit word deur Christus aan sekere mense geskenk. As dit iets aards was, kon mense daarvoor werk en dit bekom. Met dinge uit die hemel is dit baie anders – om dit te bekom, moet dit deur God geskenk word. Gelukkig is elkeen wat hierdie hemelse dinge raaksien wanneer hy dit in die verloop van die lewe teëkom.
Dis moeilik om die koninkryk van God na reg te beskryf. Om bloot te glo dat dit iets hemels op aarde is, doen nie reg daaraan nie. Alhoewel die Skrif baie van die koninkryk van God praat, is daar nêrens ʼn duidelike omskrywing daarvan nie. Ons aanvaar uit al die beskikbare gegewens daaroor dat dit die nuwe bedeling (Christendom) beteken. Hierdie koninkryk van God het al gekom, maar dit is ook nog komende. Dis soos om op ʼn spoorwegstasie te staan. Die lokomotief kom verby, gevolg deur ʼn klomp rytuie en laastens ʼn kondukteurswa. Alhoewel die lokomotief alreeds verby is, is hierdie trein, totdat die kondukteurswa verby is, steeds komende. Jesus se geboorte (lokomotief) is verby, maar nog nie die wederkoms (kondukteurswa) nie.
In beide die gelykenisse sê Christus dat daar ʼn verborge skat in die lewe is. Alhoewel dit versteek is, maak God op sy tyd mense se oë daarvoor oop. En hierdie skat is burgerskap van die koninkryk van God. Wie hierdie burgerskap ontvang, verkry die grootste geskenk wat ʼn mens op aarde kan ontvang. Daar is niks kosbaarder as dit nie - dis die toegangskaartjie na die hemel.
Hoor wat sê die hemelse Heer vir een van sy burgers: “En sy heer sê vir hom: Mooi so, goeie en getroue dienskneg... Gaan in in die vreugde van jou heer” (Mt.25:21). Wie hierdie kaartjie/burgerskap nie het nie, sal in der ewigheid nooit in die hemel kom nie, maar eerder in die vlamme van die hel versink.
Omdat ʼn mens se lewe en geluksaligheid van hierdie skat afhang, sal jy alles doen om dit te bekom. Om die kosbaarheid te verduidelik het Jesus die voorbeeld van ʼn pêrel gebruik. In die OT word daar net in Hoogl.1:10 van pêrels gepraat. Miskien het die ou Jode nie veel waarde daaraan geheg nie. In die NT is dit anders – pêrels het groot waarde gehad. Vandaar Jesus se vermaning om nie pêrels voor varke te gooi nie.
God beskik dit so dat die skat en die pêrel gevind word; en boonop onverwags. Hy wil hê dat mense in die hemel kom: “Bid, en vir julle sal gegee word; soek, en julle sal vind; klop en vir julle sal oopgemaak word” (Mt.7:7). By ʼn ander geleentheid sê Jesus vir sy dissipels: “... Omdat dit aan julle gegee is om die verborgenhede van die koninkryk van die hemele te ken...” (Mt.13:11).
In die eerste geval ontdek die man die skat terwyl hy met sy gewone dagtaak besig was. Hy was moontlik ʼn dagloner wat iewers vir ʼn boer op ʼn saailand hande-arbeid verrig het. Daar was by hom hoegenaamd geen gedagte van ʼn verborge skat iewers op die land nie. Die Skrif sê dat hy onverwags daarop afgekom het. Hy het dit versteek en tuis alles wat hy het, verkoop om die saailand te koop. Hierdie man het besef dat hy iets gevind het wat dit die moeitewerd gemaak het om alles wat hy het te verkoop.
Ja, die aanbod om redding in Jesus het al dikwels onverwags tot mense afgekom. Dink maar aan Levi die tollenaar of Saggeus die hooftollenaar. Was hulle nie maar ook met hulle gewone dagtaak besig toe Jesus by hulle verby gekom het nie? Hulle het alles verlaat en Jesus gevolg. Paulus se lewe getuig ook van ʼn soortgelyke ervaring.
Daarnaas vertel die tweede gelykenis van ʼn koopman wat voltyds pêrels soek. Sonder dat hy doelbewus na ʼn baie kosbare een gesoek het, kom hy onverwags daarop af. Hierdie pêrel het hom voor ʼn onmiddellike lewensbeslissing gestel. Indien hy dit wou besit, moes hy van alles wat hy tot op hede bymekaar gemaak het, afstand doen. Hy besef egter dat die prys nie te hoog is nie en waag dit.
Hierdie man is die voorbeeld van so baie mense – hulle soek in die regte rigting maar sien klein dinge as belangrik aan en besef nie dat daar ʼn baie groot skat op hul weg lê nie. Mense soek, maar soek verkeerd. Daarom sê Jesus: “Soek eers die koninkryk van God en sy geregtigheid, en al hierdie dinge sal vir julle bygevoeg word” (Mt.6:33).
Ons moet een ding egter deeglik besef: die koninkryk van God word nie deur menslike inspanning verwerf nie. Jy kan nie jou toegangskaartjie na die hemel verdien nie. Hy laat jou slegs in die regte rigting soek. Die ontdekking bly ʼn gawe van God. Hy lei die man op die saailand na die skat en die soeker na pêrels na die uitsonderlike waardevolle een. In albei gevalle vind die ontdekking in die daaglikse lewensgang plaas. Die lewensgang word nie ontwrig nie. Die ongekende skat is net eensklaps voor hulle oë en bring ongekende vreugde in hul lewe.
ʼn Punt om te onthou, is dat die vinders bereid is om alles te betaal ten einde die skat hul eiendom te maak. Die oomblik toe hulle dit ontdek, moes hulle ʼn besluit neem – ʼn lotsbeslissing. Hulle lewe sou nooit weer dieselfde gewees het nie. So word die geloof die vaste grond vir die verstand en die handelinge wat daarop volg.
In beide gevalle verkoop die manne alles. Hulle word in dieselfde situasie as die ryk jongman geplaas: “Gaan verkoop jou besittings en gee dit vir die armes, en jy sal ʼn skat in die hemel hê” (Mt.19:21). Dit was ʼn waagstuk soos met die manne in die gelykenisse. Hulle waag in die geloof en is nie teleurgesteld nie.
Dit gaan nie bloot om die voorstelling van iets waardevol nie, maar ook oor die eis wat dit aan die vinders tel om alles te verkoop. Dis ʼn geloofsuitdaging! “Elkeen wat sy lewe wil red, sal dit verloor; maar elkeen wat sy lewe om My ontwil verloor, sal dit vind” (Mt.16:25). Hoe kosbaar is die geloof in Christus nie. Dis die toegangskaartjie na die hemel. Het jy dit? Laat niks vir jou kosbaarder as dit wees nie!