Gedagtes vir elke dag
Of lees almal by Gedagtes vir elke dag
Gelowige volksleiers het ‘n sterk sin vir reg en geregtigheid wat nie deur wette bepaal word nie, maar deur die Woord van God en die lewens-insig wat Hy aan gelowiges gee. Gevolglik kan ‘n gelowige volksleier hom nie met ‘n teenstrydige waardesisteem versoen nie. Hy laat hom nie deur onregsdienaars beïnvloed nie en lei eerder self onreg as om volksgenote te veronreg.
DIE GROOT VERVAL (3)
Ds Andrè van den Berg
LEES REEKS BY DIE GROOT VERVAL
GEESTELIKE OORLOGVOERING
7.1 Bose ywer
Valse leraars werk tans harder as ooit tevore. Jesus waarsku: “Maar pas op vir die valse profete wat in skaapsklere na julle kom en van binne roofsugtige wolwe is. Aan hulle vrugte sal julle hulle ken...” (Mt.7:15,16). Skape is die simbool van opregtheid, onskuld en skadeloosheid. Hulle word deur valse leraars op ʼn hoop gejaag en spreekwoordelik soos deur wolwe opgevreet.
Sulke wolwe maak op goddelike begeestering aanspraak en lei baie mense om die bos. Paulus waarsku dat hulle vyande van die geloof is: “Want ek weet dit, dat na my vertrek wrede wolwe onder julle sal inkom en die kudde nie sal spaar nie” (Hand.20:29). Wie nie waak nie, word maklik prooi!
Daar was van die begin van die Christendom af mense wat voorgee het om God te dien en baie mense met hul leuens besmet. Sommige het profeteklere gedra, ʼn mondering waaraan die profete van ouds uitgeken is, net om mense nog verder te mislei.
Vroeë geskrifte maak van Christus-handelaars melding wat destyds die rondte gedoen en baie geld met selfgeorkestreerde opwekkingsdienste gemaak het. Lukas skryf: “Want nie lank gelede nie het Theudas opgestaan en gesê dat hy iets besonders was. By hom het ʼn aantal mense – omtrent vierhonderd – aangesluit. Hy is gedood, en almal wat na hom geluister het, is uitmekaar gejaag en het tot niet geword. En ná hom het Judas, die Galileër, opgestaan, in die dae van die inskrywing, en ʼn aansienlike getal mense afvallig gemaak agter hom aan. Hy het ook omgekom, en almal wat na hom geluister het, is verstrooi” (Hand.5:36,37).
Judas, die Sendbriefskrywer, skryf: “Want sekere mense het ingesluip wat lank tevore al opgeskryf is vir hierdie oordeel, goddelose mense wat die genade van onse God verander in ongebondenheid , en die enigste Heerser, God, en onse Here Jesus Christus verloën” (Judas:4).
Die valse leraars het so subtiel te werk gegaan, dat baie mense nie hul bose planne bemerk het nie. Die woord insluip dui op ʼn misdadiger wat uit ʼn land gesit is en daarna ongemerk daarheen terugkeer. Judas skryf dat hierdie mense lank tevore al opgeskryf is. God het hulle van meet af vir die ewige verderf bestem. Daarom sondig hulle sonder enige skuldgevoel. Hoe hulle die kerk binnegekom het, is nie duidelik nie. Het die wagters hul taak verwaarloos?
7.2. Ontmasker
Kerke word selde van buite af vernietig. Satan gebruik eerder mense om dit van binne af te breek. Hy weet dat een duiwel in die kerk meer werd is as ʼn duisend daarbuite! Die valse profete het geen roeping van God ontvang nie, maar misbruik die formele bediening en voed skares met godsdiens-lekkernye wat geen geestelike kilojoules bevat nie.
Dis gelowiges se plig om valse leraars te ontmasker en aan die kaak te stel. “Geliefdes, glo nie elke gees nie, maar stel die geeste op die proef of hulle uit God is, want baie valse profete het in die wêreld uitgegaan” (1 Joh.4:1). Hulle het geen opdrag van God ontvang nie, maar wel van die Satan.
Leraars is nie toekomsvoorspellers nie, maar geestelike leermeesters wat deeglik in die Woord van God onderleg en in die godsaligheid geoefen is. Die vroeë kerk het juis baie sterk gegroei omdat die eerste leraars apostels as leermeesters gehad het. Ongelukkig is baie mense destyds deur valse leraars met leuens besmet. Daarom het die Heilige Gees die leraars van God met die gawe van die onderskeiding van die geeste geseën (1 Kor.12:10).
7.3 Teregwysing
Gelowiges moet God met hul hele lewe behaag: “En beproef wat die Here welbehaaglik is; en hou nie gemeenskap met die onvrugbare werke van die duisternis nie, maar bestraf dit liewer” (Efes.5:10,11). Daarvoor gee God hulle sy Woord as wapen:
“ Eindelik, my broeders, word kragtig in die Here en in die krag van sy sterkte. Trek die volle wapenrusting van God aan, sodat julle staande kan bly teen die liste van die duiwel. Want ons worstelstryd is nie teen vlees en bloed nie, maar teen die owerhede, teen die magte, teen die wêreldheersers van die duisternis van hierdie eeu, teen die bose geeste in die lug. Daarom, neem die volle wapenrusting van God op, sodat julle weerstand kan bied in die dag van onheil en, nadat julle alles volbring het, staande kan bly. Staan dan vas, julle lendene met die waarheid omgord, met die borswapen van die geregtigheid aan, en as skoene aan julle voete die bereidheid vir die evangelie van vrede. Behalwe dit alles neem die skild van die geloof op waarmee julle al die vurige pyle van die Bose sal kan uitblus. En neem aan die helm van verlossing en die swaard van die Gees — dit is die woord van God” (Efes.6:10-17).
Om Satan en sy handlangers die hoof te bied, moet gelowiges die Bybel ken en dienooreenkomstig kan hanteer. “Die hele inhoud van u woord is waarheid, en al u regverdige verordeninge is tot in ewigheid” (Ps.119:160). Dis al waarmee die wortels van dwaalleer uitgespit kan word en ontspoorde mense hul bekeer.
7.4 Volksherstel
Toe valse profete Juda destyds mislei het, het Jesaja dit nie gelate aanvaar nie, maar sy volk tot herstel opgeroep: “Kom, huis van Jakob, en laat ons wandel in die lig van die Here” (Jes.2:5). Gelowiges moet mense wat in die duisternis van leuens vasgevang is aan die lig van die waarheid bekend te stel. Jesus sê: “As julle My liefhet, bewaar my gebooie” (Joh.14:15).
Die skrywer van Hebreërs sê: “Want die woord van God is lewend en kragtig en skerper as enige tweesnydende swaard, en dring deur tot die skeiding van siel en gees en van gewrigte en murg, en is ’n beoordelaar van die oorlegginge en gedagtes van die hart” (Heb.4:12).
Volksherstel geskied nie sonder geestesherstel nie. Gelowiges moet die groot waarhede van die Bybel opnuut onder dwaalgeeste se aandag bring en teenoor hulle getuig dat daar wel ʼn God in die hemel is en dat die Bybel van A tot Z sy onfeilbare Woord aan die mens is: “Die hele Skrif is deur God ingegee en is nuttig tot lering, tot weerlegging, tot teregwysing, tot onderwysing in die geregtigheid” (2 Tim.3:16).
Gelowiges moet egter baie seker maak dat hulle self vas in die waarheid staan. “Maar bly jy in wat jy geleer is en waarvan jy verseker is, omdat jy weet van wie jy dit geleer het en dat jy van kleins af die heilige Skrifte ken wat jou wys kan maak tot saligheid deur die geloof in Christus Jesus” (2 Tim.3:14,15).
7.5 God beskerm
Wie die waarheid verkondig, trek altyd vyandige vuur op hom: “En die draak was vertoornd op die vrou, en hy het weggegaan om oorlog te voer teen haar nakomelinge wat die gebooie van God bewaar en die getuienisse van Jesus hou” (Openb.12:17).
Die kerk van Christus gaan baie klein word, maar desondanks staande bly omdat Christus sy kerk vanuit die hemel regeer. Hy sorg deur die eeue heen dat mense die Bybelse waarhede bewaar en verkondig. En so sal dit wees totdat Hy weer kom. Die waarheid sal nooit deur leuens toegeploeg word nie. Daarvoor hou God gelowiges vas: “My gange het vasgehou aan u spore, my voetstappe het nie gewankel nie” (Ps.17:5).
Slot
Die lot van valse leraars is reeds beslis. Petrus sê dat dit vir hulle beter sou wees indien hulle nooit die weg van die waarheid geken het nie. Misleiding is erger as onkunde. Die pad na die hel is met die skedels van duisende valse profete geplavei. Wat ʼn verskriklike oordeel wag daar nie op hulle nie!
“Maar pas op vir die valse profete wat in skaapsklere na julle kom en van binne roofsugtige wolwe is. Aan hulle vrugte sal julle hulle ken. ’n Mens pluk tog nie druiwe van dorings of vye van distels nie! So dra elke goeie boom goeie vrugte; maar ’n slegte boom dra slegte vrugte. ’n Goeie boom kan geen slegte vrugte dra nie, en ’n slegte boom ook geen goeie vrugte nie. Elke boom wat nie goeie vrugte dra nie, word uitgekap en in die vuur gegooi. So sal julle hulle dan aan hul vrugte ken. Nie elkeen wat vir My sê: Here, Here! sal ingaan in die konin-kryk van die hemele nie, maar hy wat die wil doen van my Vader wat in die hemele is. Baie sal in daardie dag vir My sê: Here, Here, het ons nie in u Naam geprofeteer en in u Naam duiwels uitgedrywe en in u Naam baie kragte gedoen nie? En Ek sal aan hulle sê: Ek het julle nooit geken nie. Gaan weg van My, julle wat die ongeregtigheid werk! (Mt.7:15-22).
Einde