Gedagtes vir elke dag
Of lees almal by Gedagtes vir elke dag
Ons wat in hierdie NSA so woedend kan word oor alles wat verkeerd is moet daarteen waak om dit in ons huise in te dra. Wees verdraagsaam teenoor diegene wat jy liefhet: "As julle kwaad word, moenie sondig nie, en moenie 'n dag kwaad afsluit nie." Ef 4:26
BRIEWE UIT DIE HEMEL (3)
Ds Andrè van den Berg
Aan Pergamus
“....Aan hom wat oorwin, sal Ek gee om te eet van die verborge manna, en Ek sal hom gee ’n wit keursteen..... (vers 17).
Nadat die koerier die tweede brief in Smirna afgelewer het, is hy noord na Pergamus waar ʼn Christengemeente was; baie anders as enigeen van die twee voriges. Pergamus was die hoofstad van die Romeinse owerheid in Klein-Asië met drie afgodstempels waarvan die fondament van die grootste een vandag nog besigtig kan word en in Jesus se oë die simboliese aardse blyplek van die Satan was: “Ek ken jou werke en die plek waar jy woon, waar die troon van die Satan is....” (vers 13).
Gelowiges het langsaan hierdie groot tempel ʼn kerk gebou sodat die koerier ʼn ongewone adres gehad het om die brief by af te lewer. Dit het gelees: Die Christenkerk langsaan die troon van die Satan, Pergamus.
Die Romeinse ryk het godsdiensvryheid toegelaat op voorwaarde dat elke burger benewens sy eie godsdiens minstens eenmaal per jaar ook aan keiseraanbidding (staatsgodsdiens) moes deelneem deur in een van die afgodsstempels wierook te brand en uit te roep: “Die keiser is God!”. Wie geweier het, is vervolg.
Vir Christene was dit ʼn reuse probleem omdat God alleen aanbid moes word. Die Tien Gebooie is duidelik daaroor. Toe Christene weier om die keiser te vereer, is dit as opstand beskou en het vervolgings begin.
Die eerste aanduiding hiervan is in vers 13: “.....En jy hou vas aan my Naam en het die geloof in My nie verloën nie, selfs in die dae waarin Ántipas my getroue getuie was, wat gedood is by julle waar die Satan woon”. Van Antipas weet ons niks nie. Die kerkgeskiedenis swyg oor hierdie martelaar; die enigste een wat Jesus by die naam noem.
Dat ʼn gemeente in Pergamus kon ontstaan,is byna ondenkbaar. Dit was alles slegs moontlik omdat gelowiges aan die Naam van Jesus bly vashou en in die geloof volhard het. Wat ʼn voorbeeld is hulle nie vir gelowiges onder ʼn heidenhiel nie! Moenie vir die godvyandige wêreld vlug nie want dis presies wat die Satan wil hê. Staan vas in die geloof en staan op vir jou geloofsbeginsels.
Die geskiedenis van die Christendom begin met die Romeinse keiser as Satan se verteenwoordiger op die aarde. Dit gaan ook so eindig met sy verteenwoordiger, die Antichris. Ten spyte van die vervolging het die Pergamus-gemeente sterk gestaan en weerstand teen die bose gebied. Vandaar die bemoedigende woorde van Jesus: “Ek ken jou werke en die plek waar jy woon....” (:13).
Jesus ken ons omstandighede; die dinge wat skadu’s op ons lewenspad werp en waaroor ons moet heers en nie toelaat dat dit ons oorheers nie. Jesus se teenwoordigheid is oor ons, om ons en by ons. Hy gee ons ʼn belofte: “En kyk, Ek is met julle al die dae tot aan die voleinding van die wêreld” (Mt.28:20). Jesus skort nie sy beloftes op as gelowiges in moeilike omstandighede beland nie.
Dit was vir gelowiges in Efese en Smirna makliker om hul geloof uit te leef want hulle was ʼn redelik veilige afstand van die troon van die Satan af. In Pergamus het gelowiges op die voorstoep daarvan gewoon. Hulle geloof moes in ʼn omgewing deurweek van afgodery, onsedelikheid en ergerlike sonde oorleef.
God weet egter wie om in moeilike omstandighede te plaas en wie nie. Vir sommige gelowiges gee Hy ʼn Efese-lewe, vir ander ʼn Smirna-lewe en vir ander ʼn Pergamus-lewe. Is jy miskien een van laasgenoemde? Moenie kla nie. Jy is eintlik bevoorreg want as jy Een wil volg wat deur die wêreld gekruisig is, moet jy self verwag om gekruisig te word!
Die gemeente in Pergamus het ook onder dwaalleer deurgeloop. Vers 14: “Maar Ek het enkele dinge teen jou: dat jy daar mense het wat vashou aan die leer van Bíleam wat Balak geleer het om ’n struikelblok voor die kinders van Israel te werp, naamlik om afgodsoffers te eet en te hoereer”.
Dit blyk dat die plaaslike kerk t.w.v. openbare aanvaarbaarheid sekere heidengebruike toegelaat het. Dis doodsake vir ʼn kerk. As ʼn kerk die pinkie vir die Satan gee, vat hy die hand. Die Nikolaïete het weer met ʼn hiërargiese kerkstruktuur gedwaal; ʼn mensgerigte kerkbeleid wat twee eeue later die fondament van die Roomse Kerk sou vorm.
In die teksvers belowe Jesus twee dinge aan die gemeente. “Aan hom wat oorwin, sal Ek gee om te eet van die verborge manna, en Ek sal hom gee ’n wit keursteen, en op dié steen ’n nuwe naam geskrywe wat niemand ken nie, behalwe hy wat dit ontvang” (:17).
Die wit keursteen verwys moontlik na ʼn gebruik van die Griekse regters in kriminele sake as hulle ʼn moeilike beslissing moes maak. Dan het hulle ʼn wit en swart klippie in ʼn kruik gegooi, geskud en een uitgehaal. Die witte het onskuld en die swarte skuldig aangedui. En dit het niks met rassisme te doen gehad nie!
Nog ʼn moontlike verklaring vir die wit klippie was ʼn gebruik onder die inwoners van Tracië om vir elke dag van hul lewe ʼn klippie in ʼn kruik te gooi. As dit ʼn goeie dag was, is ʼn witte ingegooi en vir ʼn slegte een ʼn swarte. Na so ʼn persoon se dood het die naasbestaandes die kruik gebreek en die klippies getel. As die wittes die meerderheid was, het die persoon ʼn gelukkige lewe gehad en anders om. Watter kleur steentjies maak die meeste in jou lewenskruik uit?
Jesus sê vir Pergamus dat hy vir hulle die wit steentjie sal gooi en van ʼn nuwe naam voorsien wat slegs die draer daarvan sal ken. En wat meer is, dat hy met die wederkoms van Christus by die groot feesmaal sal aansit en van die verborge manna eet sonder om ooit weer honger of dors te kry.
Die nuwe naam op die wit steentjie is sodanig dat net die besitter dit sal weet. Dis soos die verborge manna dinge wat tot die ewigheid behoort. Paulus skryf: “...maar soos geskrywe is: Wat die oog nie gesien en die oor nie gehoor en in die hart van ’n mens nie opgekom het nie, wat God berei het vir die wat Hom liefhet” (1 Kor.2:9).
Wil jy graag ʼn nuwe naam hê en van die verborge manna eet? Maak dan baie seker dat jy Jesus as Verlosser leer ken terwyl jy lewe. Jy kan nie na die dood terugkeer om dinge reg te maak wat nagelaat is nie.
Vergeet jou moeilike lewensomstandighede, gesondheidskwale of wat ook al ʼn demper op jou lewe plaas. Dis van minder belang. Hou jou oog op Hom wat vir sy kinders ʼn feesmaal voorberei en ʼn wit keursteen sal gee - gered deur die bloed van Christus. Dis die enigste toegangskaartjie na die hemel. Moenie die lewe daarsonder verlaat nie!