ELIA EN ELISA (15)

ELISA NEEM AFSKEID

Dr JP Botha

Die opdrag wat die Here by die berg Horeb aan Elia gegee het om vir my, Elisa, as sy opvolger te salf, het hy gedoen, maar voordat hy vir Jehu as koning oor Israel kon salf en vir Hasael as koning oor Aram, het my wonderlike voorganger na die hemel vertrek. Daarom het ek later vir Jehu as koning laat salf deur die profeet wat ek na hom gestuur het.

Na Damaskus

Die uitvoering van die derde deel van die Here se opdrag aan Elia, het ook op my skouers geval. Die Here het vir my gesê om na Damaskus te gaan en vir Hasael, die hoof-generaal van die Aramese leër tot koning te gaan salf in die plek van sy koning, Benhadad III, die man wat vir Israel soveel ellende besorg het met sy aanvalle en strooptogte in die oostelike gebiede van die land.

Ek het die meer as 200 kilometer na die Siriese hoofstad rus-rus aangepak en na 'n paar dae in Damaskus aangekom en by 'n herberg tuisgegaan.

Koning Benhadad het van my aankoms in sy stad te hore gekom. Hy was baie siek. Toe beveel hy vir Hasael, sy leërowerste, om met 'n klomp geskenke van allerhande pragtige Damaskusware, 'n vrag wat 40 kamele moes dra, my te gaan opsoek, net om vir my te vra of hy van sy ernstige siekte sou herstel.

Toe ek dit alles sien, het ek weer aan Naäman gedink wie se koning - hierdie een se voorganger - ook gedink het dat hy die Here, die almagtige God van hemel en aarde kon betaal met geskenkies vir sy guns en gawes wat Hy in sy genade aan hom betoon.

Ek het vir Hasael gesê: "Gaan sê vir jou koning hy sal nie gesond word nie, want die Here het aan my openbaar dat hy sal sterwe."

Ek het vir Hasael met 'n strak gesig aangekyk en na hom bly staar tot hy naderhand heeltemal verleë geword het. Toe bars ek self in trane uit. Hy wou ontsteld weet waarom ek dan huil.

"Hasael, dis omdat ek weet watter kwaad jy die Israeliete gaan aandoen. Jy sal hul vestings in vlamme laat opgaan, hulle jongmanne doodmaak, hulle kindertjies verpletter en hulle swanger vroue oopsny."

"Maar profeet, ek het nie enige mag nie. Hoe sou ek ooit so iets kon doen?"

"Die Here het aan my openbaar dat jy koning oor Aram sal word."

Benhadad sterf

Hy het van my af weggegaan en by sy koning gekom. Toe Benhadad vir hom vra wat ek gesê het, vertel hy vir hom 'n leuen: "Hy het gesê u sal sekerlik gesond word."

Die volgende môre, nog voor my vertrek uit Damaskus, het hierdie Hasael na sy koning se siekekamer gegaan, 'n bedsprei geneem en dit in water klam gemaak. Hy het dit oor Benhadad se kop getrek en hom versmoor. Toe het die leërowerste, Hasael, die vors wat hy vermoor het, as koning opgevolg. Daarna was die drieledige opdrag wat die Here oorspronklik aan Elia gegee het, afgehandel.

Hasael se oorloë

Al die kwaad wat die Here aan my openbaar het, wat Hasael die volk van Israel - en selfs van Juda - sou aandoen, het pas begin nadat hy koning van Aram geword het. Israel was reeds baie verswak deur die groot aantal moorde wat Jehu laat pleeg het en veel binnelandse onrus veroorsaak het.

In sy tyd het Hasael daarin geslaag om die gebied oos van die Jordaan, die hele Gilead waar die stamme van Gad, Ruben en Manasse gewoon het, te verower.

Hasael het ook na Gat toe opgeruk, dit aangeval en ingeneem. Daarna het hy koers gekies na Jerusalem, om die hoofstad van die tweestammeryk te gaan aanval. Die jong koning Joas, wat op sewejarige ouderdom koning van Juda geword het, het al die skatte en gewyde gawes en goud wat hy in die hande kon kry, aan Hasael betaal om hom van Jerusalem af weg te hou, wat hy toe darem gedoen het.

Jehu se seun en opvolger, Joahas, het die ergste onder Hasael se aanslae gely. Die Siriër het Joahas se leër feitlik vernietig en soos stof vertrap, sodat hy net 50 ruiters, 10 strydwaens en 10 000 voetsoldate oorgehad het.

Jehu se opvolgers

Dit was dus nie net Jehu alleen wat feitlik voortdurend moes stryd voer teen die Arameërs nie, maar ook sy opvolgers, sy seun Joahas en sy kleinseun Joas (nie Juda se Joas nie) wat almal onder Hasael se aanslae deurgeloop het.

Alhoewel die Here sy volk liefgehad het, het Hy maar toegelaat dat die Arameërs hulle kasty, want Jehu, Joahas en Joas het al drie - net soos Jerobeam - die volk laat sondig en steeds die kalwerbeelde by Bet-El en Dan aanbid en by die heiligdomme op die hoogtes geoffer.

My siekte

Ten spyte van die konings se ontrouheid, het die Here sy volk nooit in die steek gelaat nie. Koning Joas, Jehu se kleinseun, het baie goed geweet waar ons hulp vandaan kom en hoe die Here menigvuldige kere deur my met hulle en met die volk gepraat het.

My aardse taak was feitlik volbring. Ek het in my huisie in Samaria siek gelê toe ek besoek ontvang van koning Joas. Toe hy my sien, roep hy uit: "My vader, my vader, u was vir Israel sy oorwinnende strydwa, met al sy ruiters!"

Ek het opgemerk dat die koning bewoë was toe hy my op die bed sien lê en besef dat my veelbewoë aardse lewe haas verby is.

Ek het vir hom gesê: "Vat jou pyl en boog."

Toe hy dit doen, sê ek: "Sit jou hand op die boog."

Nadat hy dit gedoen het, plaas ek ook my eie hande op syne en sê: "Maak die venster aan die oostekant oop."

Toe dit oop was, het ek beveel: "Skiet!"

Nadat hy die pyl deur die venster afgeskiet het, sê ek: "Dit was 'n pyl van oorwinning oor Aram. Jy sal Aram verpletterend verslaan in Afek."

Toe beveel ek die koning verder: "Vat nou die pyle."

Toe hy dit het, beveel ek hom om daarmee teen die grond te slaan. Hy het drie maal geslaan en toe opgehou. Dit het my baie kwaad gemaak en ek het vir hom gesê: "Jy moes vyf of ses keer geslaan het, dan sou jy Aram heeltemal verslaan het, maar nou sal jy hulle net drie keer verslaan."

Koning Joas het verslae van my af weggegaan, want hy het geweet hy kan my glo, omdat die Here dit aan my geopenbaar het.

My toekoms

Ek het op my bed gelê en dink aan al die dinge in my lewe wat verby is en aan al die dinge wat nog moet kom. Toe hoor ek die Here se stem wat sê: "Elisa, wat jy in my Naam vir die volk en die konings van Israel gedoen het, was goed. Jou taak is afgehandel. Ek gaan jou aanstonds na My toe neem, waar jy weer jou heilige voorganger, Elia, sal ontmoet. My troue arbeiders is hulle loon waardig."

Dankie Here my God, dat U my waardig geag het om soveel jare lank in u diens te staan en u boodskapper vir Israel te wees. Ek loof en dank en prys u lieflike Naam en sien reikhalsend daarna uit dat U my nou maar moet kom haal.

AMEN

_______________

Epiloog

Dit is die verhaal van die merkwaardige lewe van die groot profeet Elisa, wat hy self vir ons vertel het. Die Here het hom kom haal, daar waar hy in sy ouderdom op sy siekbed gelê het. Sy laaste rusplekkie was in 'n begraafplaas, êrens naby die Moabitiese grens.

Jare daarna het Moabitiese bendes weer lastig geword en strooptogte in Israelitiese gebied uitgevoer. Op 'n keer was 'n begrafnisstoet na die begraafplaas op pad, toe hulle die Moabiete sien aankom. In hul haas om voor die vyand weg te kom, het die draers die dooie man van die draagbaar af in die oop graf van Elisa ingeslinger. Toe hy met Elisa se beendere in aanraking kom, het hy weer lewendig geword en by die bek van die graf uitgestap gekom.

So het die Here aan Israel getoon dat dit Hy was wat al die wonderwerke deur Elisa gedoen het en dat Hy dit selfs deur doodsbeendere heen kan laat plaasvind. Hy het vir Elia en Elisa op 'n wonderbaarlike wyse gebruik as boodskappers om sy Woord aan Israel en veral aan die ongehoorsame koning Agab te bring.

Hierdie twee manne van God staan voor in die ry van die groot profete wat hulle later opgevolg het. Hulle was vrywillige instrumente in die hand van die Here om sy lewegewende Woord aan sy volk te bring.

Elisa se boodskap weerklink nog steeds helder deur die eeue heen: "Vrees nie, want dié wat by ons is, is meer as dié wat by hulle is." En Elia se uitdaging aan die volk by die berg Karmel, rol nog steeds teen die hange af tot in die diepste skuilhoekies van ons hart: "Hoe lank gaan julle nog op twee gedagtes hink? As die Here God is, volg Hom dan na!"

_________________

NUUTSTE BYDRAES

Gedagtes vir elke dag

ELIA EN ELISA (15)

Opsoek na inligting?

Besoekers aanlyn