Gedagtes vir elke dag
Of lees almal by Gedagtes vir elke dag
Dobbel is ‘n nare ding. Meer mense verloor as wat hulle wen. Moenie met die kosbaarste ding in die lewe dobbel nie – jou siel!
ELKEEN HET 'N TAAK
Ds AE van den Berg
Lees reeks by Artikels: Ds Andrè vd Berg
" Elke gelowige sal verantwoording van hul gawes doen. Die Gelykenis van die Talente spel dit duidelik uit... Moet nooit bang wees om in die geloof te onderneem nie. Doen, waag en verwag! Petrus sou nooit op die water kon loop indien hy dit nie buite die boot gewaag het nie! Sommige gelowiges is so bang om foute te maak, dat hulle niks doen nie en hul talente begrawe."
"Namate elkeen ’n genadegawe ontvang het, moet julle mekaar daarmee dien soos goeie bedienaars van die veelvuldige genade van God. As iemand spreek, laat dit wees soos woorde van God; as iemand dien, laat dit wees soos uit die krag wat God verleen, sodat God in alles verheerlik kan word deur Jesus Christus, aan wie heerlikheid en krag toekom tot in alle ewigheid. Amen” - 1 Pet.4:10-11
Jy gaan net een maal op die aarde leef. Gevolglik het jy net een kans om iets daarvan te maak. Hoe lyk jou lewe vandag: bestaan jy of leef jy? Maak jou lewe enige sin? ʼn Sinvolle lewe is beter as rykdom en wie sinvol leef, sterf gelukkig. Die sin van die lewe hang alles af van waaraan jy dit wy.
Wie hom in dinge groter as hyself verdiep, vind groter sin in die lewe. En wat kan groter wees as om in diens van God te staan? Nou praat ek nie van predikante nie, maar van die amp van die gelowige.
Om in diens van God te staan, kan nie sonder die bystand van die Heilige Gees geskied nie. Die Gees doen twee dinge met gelowiges. Eerstens sonder Hy hulle af en tweedens rus hy hulle toe om God se werk te doen. Die klem val op die toerusting wat die gawes van die Heilige Gees genoem word.
Die Griekse woord hiervoor is charismata en kom 17 keer in die NT voor waar dit die betekenis van geskenke van God het. Hierdie geskenke is uitsonderlike bekwaamhede wat God aan gelowiges gee ten einde die gemeente van Christus op te bou (sterk te maak) en uit te bou (meer te laat word). Die Onse Vader bede: “Laat U koninkryk kom” hou hiermee verband.
Die NT onderskei 18 geestesgawes. Dit dui daarop dat Christus op verskeie maniere werk om sy Koninkryk te laat kom. Sommige gawes is natuurlik en sluit by die mens se natuurlike vermoë aan soos bv. om te onderrig. Ander is bonatuurlik wanneer ’n mens by geleentheid t.w.v. die koninkryk van God anders optree. Sommige gawes kom eenmalig voor terwyl ander blywend van aard is en tot ’n staande bediening in ’n gemeente lei. “En Hy het gegee sommige as apostels, ander as profete, ander as evangeliste, ander as herders en leraars, om die heiliges toe te rus vir hulle dienswerk….” (Efes.4:11-12).
Die Heilige Gees deel die gawes uit soos Hy wil. Almal kry nie dieselfde gawe nie. In die Gelykenis van die Talente ontvang sommige van die diensknegte vyf talente, ander twee en ’n sekere man selfs net een talent. Feit bly staan; almal ontvang iets. Elkeen het, soos die diensknegte in die gelykenis, ’n taak. Niemand is oortollig en niemand word oorgesien of verskoon nie.
Daar is gelowiges met besonder gawes. Dis die voorgangers wat lidmate vir hul dienswerk toerus. “En Hy het gegee sommige as apostels, ander as profete, ander as evangeliste, ander as herders en leraars, om die heiliges toe te rus vir hulle dienswerk….” (Efes.4:11-12). Hulle moedig die gelowiges aan. Hulle begeester en lei hulle in die regte rigting lei. Daarom word hulle herders genoem. Hierdie voorgangers slaag egter selde daarin om ongelowiges aan te moedig, te begeester of leiding te gee. Hulle is en bly passief.
Sommige gelowiges ontvang meer gawes en ander minder. Sommige s’n staan bo die ander uit. Desondanks is geen gawe bo ’n ander een verhewe nie en niemand in ’n gemeente minder- of meerderwaardig nie.
’n Gemeente is soos ’n simfonie-orkes; elke instrument het sy eie klank. As almal saamspeel, is dit net mooier as wat elkeen op sy eie speel. Daarom kom die eenheid in Christus nie in ’n eendersheid nie, maar in ’n verskeidenheid van geestesgawes tot uitdrukking. In 1 Kor.12 vergelyk Paulus ’n gemeente met ’n liggaam; afsonderlike lede maar een liggaam.
Geestesgawes is nie trofeë soos dit in charismatiese kerke blyk te wees nie, maar gereedskap. God gee dit aan ons om ons medemens mee te dien. Jesus se dissipels moes Hom nie bloot volg nie, maar ook vir Hom werk. “Kyk Ek stuur julle soos skape onder die wolwe in…” (Mt.10:16). Om sinvol te leef, moet ons ’n lewe in belang van ander leef. Ons het ’n verantwoordelikheid teenoor medemense na buite (Mt.28:19) en dié na binne; ons geestelike familie.
Paulus moes by geleentheid baie ernstig met die Korintiërs praat wat in hul charismatiese beheptheid liefdeloos met mekaar gewedywer het. Sonder onderlinge liefde in ’n gemeente is alles tevergeefs. Dan speel die orkes nie saam nie; hulle maak net geraas! 1 Kor.13 sê dat dit soos metaal wat teen mekaar slaan, klink of ’n simbaal om aandag te trek. Die klem verskuif van die Gewer na die ontvanger. En dis fataal in ’n gemeente!
Petrus gaan voort: “Namate elkeen ’n genadegawe ontvang het, moet julle mekaar daarmee dien soos goeie bedienaars….” Die Grieks vir bedienaar verwys na ’n slaaf wat verantwoordelik was om sy baas se eiendom en belange te bestuur. Dis gelykluidend met rentmeester. Van ’n rentmeester word twee dinge verwag – om met volmag binne bepaalde grense op te tree en aanspreeklikheid vir sy taak te aanvaar. Hierdie twee dinge loop hand aan hand. Dis nie die een of die ander nie, maar die een en die ander.
God gee gelowiges die vryheid om hul gawes na goeddunke aan te wend. Solank as wat dit tot hul reg kom. “Verwaarloos nie die genadegawe wat in jou is nie…” (1 Tim.4:14). Hierdie gawes is dinamies: “Om hierdie rede herinner ek jou daaraan om die genadegawe van God aan te wakker wat in jou is deur die oplegging van my hande” (2 Tim.1:6). Elke gelowige sal verantwoording van hul gawes doen. Die Gelykenis van die Talente spel dit duidelik uit.
Petrus skryf in die eerste teksvers van die veelvuldige genade van God. ’n Gemeente is soos ’n prisma waardeur God se lig van genade val en dan soos ’n pou se stert oopmaak in ’n veelkleurige spektrum en God verheerlik. Die teenoorgestelde is ook waar - indien gelowiges hul gawes verberg, doen hulle hul gemeente oneindige skade aan en verwek dit God se toorn: “Onthou dan waarvandaan jy uitgeval het en bekeer jou en doen die eerste werke. Anders kom Ek gou na jou toe en sal jou kandelaar van sy plek verwyder as jy jou nie bekeer nie” (Openb.2:5).
Petrus onderskei in die tweede teksvers tussen spreek-gawes en doen- gawes: “…. As iemand spreek, laat dit wees soos woorde van God; as iemand dien, laat dit wees soos uit die krag wat God verleen…..” Hier en daar is daar iemand wat op beide terreine goed is. Die meeste is óf op die een óf op die ander goed. Natuurlik moet die praters ook moue oprol en moet die doeners soms ook hul woord doen. Vir die meeste is daar egter dinge wat net makliker kom as die ander.
Op beide terreine word gelowiges sterk daaraan herinner om hulle daarop in te stel om God se woorde te spreek en met dade soos Hy op te tree. Onthou; sy genade vloei ook deur ons! Daarom moet ons nie halsoorkop in ’n dinge begewe nie, maar puntenerig versigtig met in dienswerk aan God wees.
Ons woorde moet wees soos woorde van God en ons dade: “….soos uit die krag wat God verleen…..” . Die doel van die geestesgawes wat ons van God ontvang het, is en bly: ”…. sodat God in alles verheerlik kan word….”
Daar word te dikwels met sg. Geestesgawes gespog. Charismatiese kerke maak onophoudelik ’n bespotting daarvan waar dit om emosie en vertoon gaan. Wat ’n oordeel wag daar nie op sulke dwaalleraars nie! “Hulle is waterlose fonteine, miswolke voortgedrywe deur ’n stormwind, vir wie die donkerheid van die duisternis vir ewig bewaar word” (2 Pet.2:17).
Maar wat van jou; waar pas jy in hierdie gemeente in? As jou hart gewas is in die bloed van Jesus is jy deel van sy genade vir hierdie gemeente. God het aan jou ’n geestesgawe of meer gegee om die gemeente mee te dien. Jy is nie ’n passasier nie, maar moet help om sy plaaslike koninkryk te laat kom. Jy is ’n rentmeester van hierdie genade nie. Daarom betaam dit jou om hierdie genade soos ’n goeie kelner op die regte bord neer te sit of om dit soos ’n goeie posbesteller by die regte adres af te lewer.
As jy dit nie doen nie, ontneem jy jou gemeente ’n deel van God se genade en is jy ’n ontroue dienskneg. As jy egter getrou en gehoorsaam aan God se opdrag is, dra jy jou deeltjie by om mense die skouspelagtige skoonheid van God se genade te laat sien. Aan die einde van jou lewe sal jy jou hemelse Heer hoor sê: “….Mooi so, goeie en getroue dienskneg…. Gaan in in die vreugde van jou heer!” (Mt.25:23).
Weet jy wat jou Geestesgawe is? As jy nie seker is nie, fokus op Jesus. Die res kom vanself. Fokus op die Gewer en nie op die gawe nie. Bid die Here dat Hy jou plek in jou gemeente sal toon sodat jou lewe sin kan maak. Gooi jou gewig in daar waar jy die Heilige Gees sien werk. Raak betrokke!
Moet nooit bang wees om in die geloof te onderneem nie. Doen, waag en verwag! Petrus sou nooit op die water kon loop indien hy dit nie buite die boot gewaag het nie! Sommige gelowiges is so bang om foute te maak, dat hulle niks doen nie en hul talente begrawe. Almal maak foute, maar as ons sink, is die Here altyd daar om ons vas te gryp voordat ons onder die water verdwyn.
Laat ons Geestesgawes in liefde geskied. Daarsonder beteken dit ’n ronde nul. As ons egter ons geestelike familie liefhet, sal die geestesgawes soos ’n borrelende fontein uit ons vloei.”….Maar die water wat Ek hom sal gee, sal in hom word ’n fontein van water wat opspring tot in die ewige lewe” (Joh.4:14).
Amen.