Gedagtes vir elke dag
Of lees almal by Gedagtes vir elke dag
Daar is tye wanneer stilte die hardste praat – maak jou mond oop net as jy seker is dit wat jy gaan sê het meer waarde as die stilte.
DIE GEES VAN ISEBEL
Ds AE van den Berg
“Waarlik, daar wás niemand soos Agab wat homself verkoop het om te doen wat verkeerd is in die oë van die Here nie, omdat sy vrou Isebel hom verlei het”.
Ek weet van geen opeenvolgende hoofstukke in die Bybel wat in stemming so van mekaar verskil soos I Kon 18 en 19 nie! Die een oomblik skyn die son helder en die volgende oomblik is dit pikdonker. In 1 Kon.18 triomfeer Elia oor adgodsdienaars en in die volgende hoofstuk stort hy in die afgrond af. In hoofstuk 18 is hy kragtig in God en daarna begeer hy om te sterf. In die een hoofstuk laat hy afgodspriesters ombring en in die volgende vlug hy vir ʼn vrou!
Alles begin by Elia se uitdaging aan die Baälprofete en God se magsvertoning op die berg Karmel met die slagting van die afgodspriesters daarna. Agab het sy vrou Isebel slegs van die slagting vertel, maar niks van God se magsvertoon nie. En dit het haar rooi laat sien! Sy is deur die eeue ʼn toonbeeld van boosheid; veral die vernietiging van die ware godsdiens deur afgodery.
Ons lees die eerste keer van haar in 1 Kon.16; die dogter van Etbaäl, ʼn heidenkoning, wat haar as deel van ʼn handelsooreenkoms vir Agab as vrou gegee het. Hierdie huwelik was rampspoedig omdat dit tot die invoer en vestiging van die Baälgodsdiens gelei het. Etbaäl beteken saam met Baäl. Sy dogter sou ook saam met Baäl wees en haar man verlei om haar voorbeeld te volg.
Isebel adem ʼn gees wat by alle heidene voorkom - die drang om te wil beheer. Isebel het, soos die latere Romeinse keisers, geweet hoe om mense te beheer; deur godsdiens. Om dit te doen, het sy baie subtiel te werk gegaan en Agab oorgehaal om afgodery in te voer en ʼn tempel vir Baäl op te rig. Om alles te bekroon, is hierdie afgodspriesters uit die staatskas besoldig. Israel het willens en wetens afgodery gesubsidieer!
Isebel was egter ʼn speelbal in die hand van Satan om die deur vir die vlees te open. “want die vlees begeer teen die Gees, en die Gees teen die vlees; en hulle staan teenoor mekaar...” (Gal.5:17). In vers 20 noem Paulus afgodery as een van die werke van die vlees. Ons besef nie hoe sterk die vlees is nie. Dit manipuleer, domineer en intimideer mense soos Isebel met Israel gedoen het!
Sy het ʼn drang gehad om mense te beheer en om daarvoor vereer te word, ʼn dodelike kombinasie wat deur die eeue groot skade veroorsaak. Nazisme is ʼn sprekende voorbeeld hiervan. Hierdie bose drang kom van Satan wat mag wou hê wat hom nie toegekom het nie en daarna uit die hemel gewerp is: “Hoe het jy uit die hemel geval, o morester, seun van die dageraad.... En jy het in jou hart gesê: Ek wil opklim in die hemel Ek wil klim bo die hoogtes.... my gelykstel met die Allerhoogste!” (Jes.14:12-14).
Gelowiges is nie magsbehep nie, maar onttroon eerder hulself sodat God alleen op die troon van hul lewe sit. Dis lynreg teen die gees van Isebel! Hierdie gees/gesindheid voer in baie mense se lewens die botoon, veral politici wat leierskap as ʼn persoonlike besitting beskou waaraan vasgehou moet word.
Die naam Isebel beteken sonder woning en is baie beskrywend – sy buig nie onder gesag nie, maar volg haar eie kop. Die Baälgodsdiens was besmet met gruwels soos homoseksualisme en prostitusie; so sprekend van mense wat nie onder God se gesag buig nie. Die slagting van die Baälprofete was vir Isebel van minder belang as haar verlies aan mag. Die Baälprofete was haar handlangers en nou was haar hande afgekap!
In haar daaropvolgende optrede oorheers Isebel se magsbeheptheid haar karakter en kom een van die lelikste eienskappe in ʼn mens na vore – vergelding. Want wat is vergelding anders as mag wat oor karakter triomfeer?
Elia wat eers so kragtig in die Here was, vlug vir Isebel omdat sy een van haar effektiefste wapens teen hom gebruik het – intimidasie. Sy het voorgegee om krag te besit wat eintlik nie hare was nie. Dis immers wat intimidasie is – om voor te gee om ʼn krag te hê wat jy nie werklik het nie! In Isebel se geval het dit gewerk en Elia die hasepad laat vat. Miljoene is al met vrees en intimidasie lamgelê.
Isebel se intimidasie was so erg, dat Elia spoedig geglo het dat hy die enigste gelowige in Israel oor was. Pasop vir die gees van intimidasie - dit wil jou laat glo dat jy uitgeban is. Daarna volg selfbejammering. Baie gelowiges het al soos Elia ʼn slagoffer hiervan geword!
Daar is niks so teleurstellend soos iemand wat in ʼn verantwoordelike gesagsposisie verkeer en die gesag nie tot eer van God beoefen nie, maar kompromie met booshede aangaan. Agab is ʼn sprekende voorbeeld hiervan - ʼn magtelose koning wat sy gesag aan sy vrou oorgegee het. “Waarlik, daar was niemand soos Agab wat homself verkoop het om te doen wat verkeerd is in die oë van die Here nie, omdat sy vrou Isebel hom verlei het” (1 Kon.21:25).
Isebel het nie net die koning se mag gesteel nie, maar ook die leierskorps in haar mag gekry om haar vuilwerk vir haar te doen. Kyk wat met die onskuldige Nabot gebeur het! Dit sou God behaag het as Agab sy voet neergesit en Isebel in die bek geruk het. Hy doen dit egter nie en laat sy vrou oor hom loop.
Hoe baie mans het nie al hul gesag aan vrouens oorgegee nie! “Vroue, wees aan julle eie mans onderdanig, soos aan die Here. Want die man is die hoof van die vrou, soos Christus ook hoof is van die gemeente...” (Efes.4:22,23).
God bring ʼn ewige oordeel oor die gees van Isebel omdat dit families, kerke, en verhoudings vernietig. Hierdie gees het sedert die ontstaan van die Christelike kerk groot skade aangerig. “Maar Ek het enkele dinge teen jou, dat jy die vrou Isebel, wat haarself ʼn profetes noem, toelaat om te leer en my diensknegte te verlei om te hoereer en afgodsoffers te eet” (Openb.2:20).
Dit gaan hier oor gelowiges se stryd om die leuen en werke van die vlees uit die kerk te hou. Dat Isebel vir Elia wou doodmaak, dui daarop dat sy die waarheid gehaat het en daarom die ware godsdiens wou vernietig. Was dit nie vir die 7000 getroues wat die knie nie voor Baäl gebuig het nie, het sy daarin geslaag. Mense wat die waarheid praat en hul daarvoor beywer, is nooit baie gewild nie. Kyk maar net wat met Johannes die Doper gebeur het!
Die gees van Isebel was ook in Herodias, die vrou van Herodes, wat haar dogter aangepor het om Johannes die Doper te laat onthoof. Waarom? Omdat hy haar man op sy sonde gewys het: “Want Herodes self het gestuur en Johannes gevange geneem... vanweë Herodias... En Herodias het ʼn oog op hom gehad en wou hom om die lewe bring...” (Mark.6:17,19).
Pauls skryf in Efes.6 tereg dat ons in ʼn geestelike oorlogvoering teen Satan is wat hom op baie maniere openbaar. Hierdie gees van Isebel maai in kerke, gesinne en gemeenskappe. Dis in die vermaaklikheidwêreld baie duidelik te sien waar vloedgolwe van vuilheid op ons afgelaai word. Rebelse gesindhede word voortdurend gebeeldsend en gesagsfigure wat nie by magte is om hul huishoudings te beheer nie word helde. Dan praat ek nie eens van die feministiese beweging wat teen God se skeppingsorde as sulks in opstand is nie!
En agter alles sit Satan wat God met ʼn passie haat: “.... want die owerste van hierdie wêreld kom en het aan My niks nie” (Joh.14:30). God is ʼn God van orde en daarvan hou Satan niks nie.
Die gees van Isebel rig ons volk oneindige skade aan. Gesag word afgetakel. Rolle word omgeruil - mans tree soos vrouens en vrouens soos mans op. Gesinne spat uitmekaar. Kerke verlaat die waarheid vir dwaalleer. Politici intimideer, manipuleer en domineer. Niemand is meer eerlik nie!
Wat vra God van ons onder sulke omstandighede? Om Satan geen vatkans te gee nie. En hoe doen ons dit? Deur ons optrede altyd aan die Woord van God te toets.