Gedagtes vir elke dag
Of lees almal by Gedagtes vir elke dag
Martin Luther het by geleentheid gewaarsku dat elke mens self die keuse moet maak oor wie sy sonde moet dra: jy dra óf die sonde op jou eie skouers óf jy het die aan Christus, die Lam van God gegee. As jy self jou sonde dra, is jy verlore, maar as dit op Christus rus, sal jy gered word.
WEES NIE SKAAM VIR JOU GELOOF
Ds AE van den Berg
“....maar ek skaam my nie, want ek weet in wie ek geglo het....” 2Tim.1:12
Ons leef in baie onsekere tye. Daar is min dinge waarvan ons werklik seker kan wees, veral die toekoms. Wat gaan van ons land en volk word? Gaan daar vir my en my kinders/kleinkinders ʼn beter toekomsbedeling aanbreek? Die radio, TV en koerante is vol onheilsberigte - moord, verkragting, stakings, skakings, roof, geweld ens. alles onder die dekmantel van reg en geregtigheid vir almal!
Die Boerevolk bevind hom in die stroomversnelling van onsekerheid. En as ons lewensboot nie ankerplek vind nie, is dit Ikabod met ons. Die enigste ware anker in sulke tye is die vaste geloof in Jesus Christus. Ongelowiges sê: “Ons weet nie!” - gelowiges sê: “Ons weet verseker!” God tel gelowiges in hulle beproewing bo die omstandighede van die tyd op. “...en Hy het my uit die kuil van vernietiging, uit die modderige slyk opgetrek en my voete op ʼn rots gestel; Hy het my gange vasgemaak” (Ps.40:3).
In krisistye het mense geen behoefte aan mense wat raai nie, maar wat weet. As ek siek is, gaan ek nie na 'n kwaksalwer of as ek finansiële raad nodig het na ʼn dobbelaar nie, maar na iemand wat weet! Mense het ʼn behoefte aan kundiges, veral in ʼn land soos Suid-Afrika waar kundigheid gereeld tweede viool speel.
Die waardevolste kundigheid is op geestelike terrein omdat dit juis met die toekoms te doen het. Salomo sê vir die gelowige: “Waarlik, daar is 'n toekoms, en jou hoop sal nie verydel word nie” (Spr.23:18).
Paulus sê: “ ....maar ek skaam my nie, want ek weet in wie ek geglo het....” Ons kan gerus na hom luister want hy het 'n persoonlike ervaring met Christus op pad na Damaskus gehad. Hy het persoonlik met Hom gepraat en was met die Heilige Gees vervul. Daarbenewens het hy talle ontberings ter wille van die uitbreiding van die Evangelie gehad.
“Is hulle dienaars van Christus?....ek nog meer: in arbeid oorvloediger, in slae bo die maat, in gevangenskappe baie meer, in doodsgevare dikwels. Vyf maal het ek van die Jode ontvang veertig houe op een na. Drie maal is ek met stokke geslaan, een maal is ek gestenig, drie maal het ek skipbreuk gely, ʼn nag en ʼn dag het ek op die diep water deurgebring – dikwels op reis, in gevare van riviere, in gevare van rowers, in gevare van my volk, in gevare van die heidene, in gevare in die stad, in gevare in die woestyn, in gevare op see, in gevare onder valse broeders; in arbeid en moeite, in slapelose nagte dikwels, in honger en dors, dikwels sonder ete, in koue en naaktheid. Behalwe dit alles my daaglikse bekommernis, die sorg vir al die gemeentes” (2 Kor.11:23-28). Geleerdes meen dat hy ongeveer 65 jaar oud was toe hy ter wille van sy onverskrokke geloof in Christus in Rome onthoof is.
Kort voor sy teregstelling skryf hy uit eie ondervinding: “En ons weet dat vir hulle wat God liefhet, alles ten goede meewerk, vir hulle wat na sy voorneme geroep is” (Rom.8:28). Dis nie so maklik om dit te glo nie! Daar kom tye in ons lewe dat dinge lelik skeef loop en ons soos Jesus wil uitroep: “My God, my God, waarom het U my verlaat?” Dit is sulke tye dat die gehaltevan ons geloof ons gaan laat staan of val. Moenie uit die oog verloor dat Satan gelowiges deur beproewing van die geloof afvallig probeer maak nie! As Christus in sulke tye nie vir ons intree nie, sal ons val. “En die Here sê: Simon, Simon, kyk, die Satan het vurig begeer om julle soos koring te sif. Maar Ek het vir jou gebid, dat jou geloof nie ophou nie...” (Luk.22:31,32).
Die Bybel is oor een ding baie duidelik – Christenskap is nie goedkoop of maklik nie, maar moeilik en duur. Dis nie vir almal nie! “Want die poort is nou en die pad is smal wat na die lewe lei, en daar is min wat dit vind” (Mt.7:14). Miljoene oorledenes wat hul lewe lank onder die geklank van die Woord gesit het, verkeer tans in die ewige verderf. ʼn Kerk bring jou net so min in die hemel as wat die geur van heerlike kos jou maag vol maak. Sonder 'n persoonlike verhouding met Christus is daar geen redding moontlik nie!
Met daardie persoonlike verhouding kan jy die onbekende toekoms tegemoet gaan met die heerlike wete – Jesus stap saam met my. Toe Josua die mantel van Moses ontvang om Israel verder te lei, voel hy onseker oor die toekoms. En wat doen hy? Hy neem sy toevlug na God. “Wees sterk en vol moed, wees nie bevrees nie....die Here jou God is met jou, oral waar jy heengaan” (Jos.1:9). En dit was vir Josua genoeg – die wete dat God oral met hom is. “....Wees tevrede met wat julle het, want Hy het gesê: Ek sal jou nooit begewe en jou nooit verlaat nie” (Heb.13:5).
Paulus verkeer in beproewende omstandighede. Hy wag op sy teregstelling en weet dat hy dit nie gaan vryspring nie want God het dit so gewil. Dit skrik hom nie af nie: “....maar ek skaam my nie, want ek weet in wie ek geglo het....” Hy weet dat die aardse lewe nie die enigste lewe is nie. “Want ons weet dat as ons aardse tentwoning afgebreek word, ons 'n gebou het van God, 'n huis nie met hande gemaak nie, ewig, in die hemele” (2 Kor.5:1).
Die wonder van die geloof is dat dit jou die nodige geestelike murg in jou pype gee om die toekoms met sekerheid tegemoet te stap al is dit nie elke dag maneskyn en rose nie. Die groot ding is – jy stap nie alleen nie. “Wat die oog nie gesien en die oor nie gehoor en in die hart van die mens nie opgekom het nie, wat God berei het vir die wat Hom liefhet”(1 Kor.2:9). Gelowiges is vir niks bang nie, ja, soos 'n Paulus van ouds, nie eens vir die dood nie.
Jare gelede besoek ʼn gelowige dokter ʼn sterwende seuntjie met bloedkanker. Die outjie was bang vir die dood. “Sal jy bang wees as ek jou optel en na die kamer langsaan dra?” het hy die seuntjie gevra. “Nee, oom, ek sal nie” antwoord hy. “Dis presies wat Jesus gaan doen” se die dokter. “Hy wil jou in sy arms optel en hemel toe dra omdat die hemel so naby soos die kamer langsaan is en Jesus so naby aan jou is as ek aan jou” Die kind het getroos in vrede gesterf.
By geleentheid het God vir Moses op die berg Nebo laat staan vanwaar hy die beloofde land (Kanaän) duidelik kon sien. Moses was opgewonde. Toe sê God vir hom dat hy dit nie sou ingaan nie. Wat 'n teleurstelling- al sy moeite en beproewinge kom vir hom persoonlik tot niks nie! Wat Moses op daardie oomblik nie besef het nie, was dat God vir hom 'n baie beter bestemming gehad het – die hemelse Kanaän waar hy vir ewig by God sou wees! Meer as 1500 jaar later bevind Moses hom tydens Christus se verheerliking op die berg weer op aarde: “En kyk, daar verskyn aan hulle Moses en Elia....” (Mt.17:3).
Kyk wat gebeur wanneer posduiwe honderde kilometer van hul huis losgelaat word – hulle vlieg huistoe. Dis ʼn ingebore tuiste-instink. God het 'n hemelse tuiste-instink in gelowiges se siele vasgelê – om te hunker na 'n ewige tuiste waar daar geen kommer of sorge is nie. “Want ons weet dat as ons aardse tentwoning afgebreek word, ons ʼn gebou het van God, 'n huis nie met hande gemaak nie, ewig, in die hemele” (2 Kor.5:1). Jesus se in Joh.14 dat Hy vir ons plek in sy Vader se huis voorberei.
Jy het net een lewe. Leef voluit vir Jesus. Dis die beste ding om te doen. En dis net moontlik indien jy, soos Paulus, openlik vir jou geloof in Jesus uitstaan en jou nie daarvoor skaam nie.
Amen