Gedagtes vir elke dag
Of lees almal by Gedagtes vir elke dag
Deur terugslae en swaarkry ontdek jy die wonder van genade soos die warm sonstrale op 'n koue wintersdag – dinge wat soos rampe lyk, is gewoonlik suiwer genade.
LIBERALISTE INSTRUMENT VAN SATAN
Ds Andrè van den Berg
" Liberaliste speel ’n groot rol in die stryd om die siel van die Boerevolk, via die volksvyandige media, te vernietig... Liberalisme verdring ’n volk se siel soos onkruid ’n mooi tuin... Ons grootste probleem met liberaliste is dat hulle nooit sleg voel oor die onreg wat hulle hul volksgenote aandoen nie... Satan het ’n onversadigbare drang om ons volkswaardes af te takel. Daarvoor maak hy van kerke gebruik wat nie waak nie. Let op hoe gou volksgenote bedwelm geraak het van die gifgasse wat liberale kerklui hul kuddes toegedien het. En die golf van verwoesting wat dit in ons volkslewe gesaai het, is as 'geseënde vernuwing' gehuldig! "
“...hulle wat die waarheid van God verruil het vir die leuen en die skepsel vereer en gedien het bo die Skepper wat geprys moet word tot in ewigheid….” (Rom.1:25).
Satan haat God en alles wat aan Hom behoort, veral die ware kerk, Maar waar is hierdie ware kerk? Oral waar die Woord van God suiwer verkondig word, gelowiges die waarheid liefhet en die Bybel onvoorwaardelik geglo word.
Satan haat die ware kerk en doen alles in sy vermoë om dit te skaad. Let wel skaad. Hy weet dat hy die ware kerk nie kan vernietig nie omdat dit deur Een wat sterker as hy is, bewaar word.
“Hou Christus self sy kerk in stand, vergeefs die hel se woede (Ges.266).
Satan kan dit hoogstens skaad. En baie seer ook!
Baie gelowiges is al vir hul geloof in Christus in Islamitiese en Kommunistiese lande vervolg. Sommige is selfs doodgemaak. Ja, die Satan maak bitter seer! Dis egter nie al manier waarop hy seermaak nie. Hy maak ook van ’n ander metode gebruik wat baie meer suksesvol is – liberalisme (vrysinnigheid).
Van al die booshede wat ʼn volk kan tref, is liberalisme die ergste. Dat u nou hier sit en nie in ’n ander Afrikaanse kerk nie, is ’n bewys van die skade wat liberalisme aan ons kerklike lewe aangerig het.
Liberalisme verdring ’n volk se siel soos onkruid ’n mooi tuin. Satan het ’n onversadigbare drang om ons volkswaardes af te takel. Daarvoor maak hy van kerke gebruik wat nie waak nie. Let op hoe gou volksgenote bedwelm geraak het van die gifgasse wat liberale kerklui hul kuddes toegedien het. Die golf van verwoesting wat dit in ons volkslewe gesaai het, is as geseënde vernuwing gehuldig! Ons grootste probleem met liberaliste is dat hulle nooit sleg voel oor die onreg wat hulle hul volksgenote aandoen nie.
Liberaliste speel ’n groot rol in die stryd om die siel van die Boerevolk, via die volksvyandige media, te vernietig. Die liberale media veg ’n verbete stryd teen gelowiges wat die Bybel as die waarheid huldig. Hulle word verkleineer, as struikelblokke vir die mensdom afgemaak en gehaat, ’n haat wat o.a. deur ’n liberale teologie gevoed word.
En hoe geniet die liberale media nie die Nuwe Hervorming, Opkomende Kerk en ander bewegings wat die waarheid en die gesag van die Bybel aftakel nie! Die liberale teologie het ’n handige stok in hul hand geword waarmee hulle die ware kerk kasty. Liberaliste sou nooit kon glo dat die kerk deur sy eie teoloë van binne-af gerysmier sou word nie. Dit was die kersie op die koek! En hoe het die ateïste nie in hul vuis gelag nie!
Die liberale media hang kerklike onenigheid en aanverwante sake gereeld aan die groot klok. Kyk maar na die koerantopskrifte op die lamppale. Liberale teoloë is die grootste ondergrawers van die Bybel vandag. Die fondament van die kerk word onder die dekmantel van meerdere kennis en/of wetenskaplikheid afgebreek.
Daarom lyk die kerklike toneel soos wat dit vandag lyk - alles word neergehaal. Selfs die heiligheid van God. Let maar net op die sirkus agtige inkleding van talle eredienste. Dit stuit gelowiges so teen die bors, dat jy wil uitroep: ” Wat soek my volksgenote, my familie, my vriende daar? Watter genot put hulle uit sulke vermaak?” Jeremia noem die godsdienstige verval van sy tyd ’n verbreking van sy volk. Ja, liberalisme breek ’n volk!
Maar wat lê aan die wortel van die verbreking van ons eie volk? Die teksvers:
“...hulle wat die waarheid van God verruil het vir die leuen en die skepsel vereer en gedien het bo die Skepper wat geprys moet word tot in ewigheid….”
Mense-verering! Dit gaan oor wat die mens wil hê en dit waarin hy wil glo.
Die ewolusie-leer is ’n sprekende voorbeeld hiervan. Ten spyte van die oorweldigende en onweerlegbare bewyse dat dit die grootste leuen/mite van alle tye is, eet miljoene mense dit vir soetkoek op. Hulle het geen erg aan die Bybel as die werk van God nie, maar wel aan die dwalings van mense! Die ewolusie-teorie keer die ganse Skrif op sy kop – van die skepping tot die wederkoms.
Die mens word deur liberale kerklui mislei om met ander oë na die Bybel te kyk; nie meer as God se openbaring aan die mens nie, maar as mense se stories oor God. Die Bybel word afgeskaal tot ’n storieboek met ’n paar tydgebonde sedelesse. So gesien, verskil dit nie van Andersen se storieboek vir kinders nie!
Waarom val Satan se agente die Bybel so verbete aan? Om mense te oortuig dat geloof in die Bybel nie meer nodig is nie. Die mens hoef regtig nie meer in God te glo nie, net in homself. Dis meer as net ’n godsdiensverduistering; dis ’n Godsverduistering soos wat ontspoorde teoloë die lig van die Evangelie uitdoof sodat mense nie gered word nie. Hulle doen Satan se werk vir hom!
Dit bring ons by Paulus se waarskuwing dat mense wat Satan se werk vir hom doen, die gevolge daarvan sal dra:
“Daarom het God hulle oorgegee aan skandelike hartstogte… ongeregtigheid, hoerery, boosheid, hebsug, ondeug, vol nydigheid, moord, twis, bedrog…” (vers 26,29) ens.
Petrus het ook met Satans agente te doen gehad:
“Maar daar was ook valse profete onder die volk. Net soos daar onder julle valse leraars sal wees wat verderflike ketterye heimlik sal invoer en ook die Here wat hulle gekoop het, verloën en ’n vinnige verderf oor hulleself sal bring; en baie sal hulle verderflikhede navolg en om hulle ontwil sal die weg van die waarheid gelaster word” (2 Pet.2:1,2).
Die AP Kerk is binnekort 25 jaar oud. Waarom het ons ontstaan? Het ons ’n doel in ’n tyd waarin dwaalleer feitlik onaantasbare status verkry het of moet ons maar stilbly en hoop dat alles eendag sal oorwaai? Nee, een ding is seker: die tyd vir stilbly is verby! Ons moet volksgenote wat mislei is, help om na die wortels van die waarheid van die Evangelie terug te keer. Hulle geestelike wielsporing is uit lyn en moet in plek gekry word. Dis waar ons inkom en hulle met God se genade moet help om die spoor na ons beproefde konserwatiewe volkswaardes terug te vind.
Baie van ons volksgenote gaan nie meer kerktoe nie, veral in gemeentes waar die nuwe verstaan van die Bybel kop uitsteek en leraars lidmate vermaak i.p.v. lei. Ander volksgenote gaan miskien dan en wan kerk toe, maar lewer geen geldelike of ander bydrae nie. Hulle glo dat die kerklike leierskap tot hul sinne sal kom as die kerk se bankbalans rooi begin raak. Ja, ek stem saam, gelowiges durf dwaalleer nie subsidieer nie!
Ons het ’n geweldige groot getuienistaak soos nog nooit tevore nie. Ons moet met ontspoorde volksgenote praat en vir hulle sê dat uit die krom hout van liberalisme niks reguit gaan voortkom nie. Die kerk is daar om mense te verbroeder en nie te verbaster nie! ʼn Kerk wat die waarheid nie beskerm nie, het geen bestaansreg nie. Ons volk het geen behoefte aan kerklike vermaak nie, maar wel aan grondige geestelike leiding wat God vereer en nie mense nie!