Gedagtes vir elke dag
Of lees almal by Gedagtes vir elke dag
‘n Positiewe mens is altyd ‘n sieraad – oud of jonk. So ‘n mens besef dat hy nie die lengte van sy lewe kan bepaal nie; slegs die wydte en diepte daarvan.
GOD SE NAAM
Ds Andrè van den Berg
Die Hebreeuse Bybel gebruik verskeie name vir God. Verreweg die meeste daarvan is beskrywend van sy eienskappe waarmee Hy hom aan die mens bekend gemaak het. Die Jode het die ware Naam van God egter as heilig beskou en nie eens neergeskryf of ligtelik uitgespreek nie.
Weens die heiligheid daarvan is dit aanvanklik slegs mondelings deur Joodse geleerdes van geslag tot geslag oorgedra. In geskrewe vorm is dit slegs deur die vier letters YHVH aangedui. Dit het daartoe gelei dat daar onsekerheid oor die korrekte uitspraak en selfs betekenis van YHVH ontstaan het. Baie geleerdes meen dat die korrekte uitspraak van YHVH Yahweh is. Dit word onder meer in Gen.3:14 gebruik waar God teenoor Moses na Homself as "EK IS" verwys.
Die Hebreeuse Bybel verbied nêrens dat God se Naam uitgespreek mag word nie. Dis tydens tempeldienste uitgespreek. Jode het ook God se Naam gebruik as hulle mekaar gegroet het. Hierdie gebruik het egter later verval en in plaas daarvan om God se Naam te sê, het hulle dit met plaasvervangende name soos Adonai (my Here) of Elohim (Majesteit) vervang soos vandag nog steeds die gebruik is.
Ongelukkig kritiseer lidmate van die Israel Visie diegene wat nie die sg. heilige name gebruik nie. Hulle glo dat net hulle die volle waarheid oor die heilige name verkondig en alle ander mense dwaal. Hulle verskil ook onderling van mekaar oor God se eie Naam. Sommige glo dat dit as Yahweh uitgespreek moet word. Ander sê weer dat laasgenoemde die naam van ʼn afgod is en dat Yahuah die regte naam is. Nog ʼn groep sê dat dit Yehovah moet wees. Elkeen van hierdie onderskeie groepe kyk na dieselfde vier Hebreeuse letters en staan gereed om oorlog teen die verkeerde uitspreekdaarvan te verklaar!
Maak dit werklik saak? Wie eerbied vir sy vader het, spreek hom vir seker nie op sy eie naam aan nie, maar eerder as pa, pappie of vader. Om God sommer links en regs op sy persoonlike Naam aan te spreek, is uiters oneerbiedig! Jesus het self nooit sy hemelse Vader op sy persoonlike Naam aangespreek nie. Wie is die mens wat homself so ʼn reg toeëien?!
God het alle tale op die aarde geskep en verstaan almal; ook Afrikaans. Daar is geen enkele teksvers in die Bybel waar Hy gelowiges die opdrag gee om Hom slegs in Hebreeus aan te spreek nie!
Die getwis rondom die Naam van God hou verband met Paulus se waarskuwing aan Timoteus: “Ek besweer jou dan voor God en die Here Jesus Christus... verkondig die woord; hou aan tydig en ontydig; weerlê, bestraf, vermaan in alle lankmoedigheid en lering; want daar sal ʼn tyd wees wanneer hulle die gesonde leer nie sal verdra nie, maar, omdat hulle in hul gehoor gestreel wil wees, vir hulle ʼn menigte leraars sal versamel volgens hulle eie begeerlikhede, en die oor sal afkeer van die waarheid en hulle sal wend tot fabels.”(2 Tim.4:1-4).
Die Israel Visie verdra nie die gesonde Bybelse leer nie en hoor net wat hulle wil hoor. Hulle argumenteer ook dat Here eintlik Baal of Meester beteken. Alhoewel ander gelowe ook van “Here” praat, is die lewende God sonder enige twyfel of teëspraak gelowiges se meester bo enige ander meester en het daarom geen probleem om Hom Here te noem nie.
Indien die benaming God, Here of Jesus foutief is, waarom het Hy deur die eeue na mense wat Hom so aangeroep het, geluister? Of was die gebede van almal wat Hom op die verkeerde name aangeroep het tevergeefs? Het Hy van meet af aan slegs na diegene wat Hebreeus magtig was se gebede geluister en na geen ander nasie of taalgroep in wie se Bybels die heilige Name nie korrek voorgekom het nie?
Op Golgota is Jesus se naam in Hebreeus, Grieks en Latyn bokant sy kop aan die kruis aangebring. In Hebreeus het daar Yeshua, in Grieks Iesous en in Latyn Iesus gestaan; drie verskillende tale wat al drie na die enigste Verlosser, Jesus Christus verwys. God, Here en Jesus Christus verwys na niemand anders as die Drie-enige Skepperwese nie!