Gedagtes vir elke dag
Of lees almal by Gedagtes vir elke dag
Die moderne mens praat deesdae baie meer openlik oor vroeëre taboes – seksualiteit, hartsgeheime ens. Maar praat oor die dood en oor sterwe, dan droog die geselskap op – is dood vir mense 'n verskrikking? Dit hoef nie te wees nie! Ons gaan in die wonderlikste harmonie in nuutopgestane liggame saam met God en Jesus en ál ons geredde geliefdes vir ewig kuier!
WAT SIEN MENSE IN JOU HUIS?
Ds Andrè van den Berg
“En hy sê: Wat het hulle in u huis gesien?.....”(2 Kon.20:15).
Mense is baie soos ʼn robot –in sommige brand die groen lig en jy kom maklik met hulle oor die weg. Sommige is soos die geel lig – jy weet nie presies waar jy met hulle staan nie. Ander brand weer rooi en stuit jou teen die bors.
Dit het alles met persoonlikhede te doen. Mense met lelike persoonlikhede kan nooit gelowiges wees nie. Mooi persoonlikhede daarenteen is die uitstalvenster van sondaars wat in Jesus mooi geword het. Jesus keer lewens om: “Daarom, as iemand in Christus is, is hy ’n nuwe skepsel; die ou dinge het verbygegaan, kyk, dit het alles nuut geword” (2 Kor.5:17).
En as Jesus lewens omkeer, vertel gelowiges graag vir mense wat Jesus vir hulle beteken. Paulus skryf: “Skaam jou dan nie oor die getuienis van onse Here of oor my, sy gevangene nie ... (2 Tim.1:18). Gelowiges swyg nie; hulle praat!
2 Kon.20 vertel van ʼn gelowige wat moes praat, maar geswyg het – Hiskia. Hy was een van Juda se beste konings en net 25 jaar oud toe hy koning van ʼn land met baie probleme geword het. Binnelands was Juda se godsdienspeil baie laag. Dit was ʼn kookpot van Satansbedrywighede. Sy pa (Agas) was ʼn slegte koning wat sy rug op God gedraai en selfs een van sy kinders as ʼn brandoffer aan die afgod Molog geoffer het. In sy tyd het menige heidentempel in Juda verrys en het afgodery Juda geestelik bankrot gemaak.
Buitelands het dit ook sleg gegaan. Assirië was oppad na wêreldheerskappy en het soos ʼn stoomroller oor lande geloop. Juda het geweet dat dit ʼn kwessie van tyd was, veral toe Israel in 722vC in ballingskap gegaan het. En wat doen Agas? Hy koop vrede met goud en laat afgodery toe.
Om koning onder sulke omstandighede te word, was uiters ongunstig. Mense het gewonder wat Hiskia gaan doen en of hy sy vader se beleid sou voortsit? Vers 3gee die antwoord: “En hy het gedoen wat reg was in die oë van die Here net soos sy vader Dawid gedoen het”. Hiskia het die afgode verwyder, hulle tempels afgebreek en Juda se eertydse godsdiens herstel.
God het hom met voorspoed geseën. Vir 14 jaar het dit goed met hom gegaan waarna ʼn ramp hom tref toe hy tot die dood toe siek geword het. Om op 39 te besef dat jou lewensson gaan sak terwyl dit nog lig was, is verskriklik! Talle goddelose konings het lank regeer. Manasse, die slegste van almal, het bv. 55 jaar lank regeer. En hier is ʼn godvresende koning se lewe op 39 jaar so goed as getel! As die parkeermeter van jou lewe sê dat tyd verstreke is, kan jy niks daaraan doen nie, al is jy ook ʼn koning.
Hiskia het op sy siekbed ʼn besoeker ontvang – Jesaja, sy dominee. Hy kom nie met ʼn trooswoord nie: “Gee bevel aan jou huis, want jy sal sterwe”. Hiskia was bitter ontsteld! ʼn Mens kan nog enige tyding ontvang en verwerk, maar as jou lewe op die spel is, is dit ʼn ander storie!
Soos ʼn briewebesteller lewer Jesaja die boodskap af en vertrek. En wat doen Hiskia? Hy bid ernstig tot God. Hy is ʼn gelowige en ken Hom. Wie die Here in die sonskyn van sy lewe geken het, kan des te meer op Hom reken as dit donker om hom word.
Toe gebeur iets wonderliks in antwoord op sy gebed. Jesaja was skaars by die paleis se hek uit toe God hom laat omdraai met die goeie nuus vir sy koning; sy lewe word met 15 jaar verleng. Hiskia se vreugde het geen einde geken nie!
Net na sy wondergenesing het Hiskia buitelandse besoek gekry – ʼn gesantskap uit Babel met geskenke. Dit was nie om dowe neute nie; hulle het bondgenote teen Assirië gesoek. Dit het na goeie strategie geklink - hoe meer soldate hoe sterker die teenstand. Maar dis nie wat God wou hê nie. Juda moes nie op mense nie, maar op God alleen vertrou. Hy was magtig om enige vyand te verdelg. “Moet op prinse nie vertrou nie, by wie niemand heil kan vind – op die mens jou heil nie bou nie, want as God hul gees ontbind, keer hul na die aarde weer en hul raadslag stort terneer” (Ps.146:2).
Hiskia was egter gediend om vir landsveiligheid op mense te vertrou en die Judees-Babiloniese verdrag geteken. Dit was, soos so baie vredesverdrae, nie die papier werd waarop dit geskryf was nie! Juda het met sy onderdrukker onderhandel want dieselfde Babel sou nie baie lank hierna nie Juda oorrompel en in ballingskap wegvoer. Die geskiedenis leer dat jy nie met volksvyande onderhandel nie. Jy kom altyd tweede!
Na die ondertekening van die verdrag het Hiskia die buitelandse geselskap op ʼn besigtigingstoer geneem. Hy wou graag pronk sodat hulle tuis kon gaan vertel hoe wonderlik en ryk Juda is. Die toer begin by sy skathuis. In die geestesoog sien ons hoedat Hiskia die deure met groot gebaar oopgooi en die gesante na hul asems snak. Soveel goud, geld en edelgesteentes het hulle nog nooit gesien nie! Dan is dit die wapenhuis met sy moderne wapentuig. Dis beslis die bondgenoot waarvoor Babel soek.
Hiskia het tot in sy kleintoontjies lekker gekry. “Ja, julle vabonde, gedink Juda het niks nie!” Hy wys hulle alles en sit ná hulle vertrek met genoegdoening agteroor soos ʼn kat wat die roomkan bygekom het. Dan ontvang hy weer besoek. Dis sy dominee, en nie op huisbesoek nie. Hy vra Hiskia een vraag: “Wat het die heidene by jou kom soek?” Hiskia vertel hom alles wat hy hulle laat sien het. Daarna vra Jesaja hom die vraag waarvoor die Here hom paleis toe gestuur het: “Wat het hulle in u huis gesien?”
Dan tref dit Hiskia soos ʼn bom; hy het hulle nie die belangrikste ding laat sien nie – sy bed. Die gesante het van sy siekte en goddelike genesing geweet. Wat ʼn getuienis kon Hiskia nie teenoor hierdie heidene gelewer het nie! Dit kon selfs hul siele red, maar Hiskia het geswyg toe hy moes gepraat het! Wie sy getuienis versuim, is ongeërg teenoor verlore siele.
Daarna het God ʼn harde oordeel oor Juda uitgespreek: “Kyk, daar kom dae dat alles wat in jou huis is en wat jou vaders tot vandag toe opgehoop het, na Babel weggevoer sal word: daar sal niks oorbly nie, sê die Here” (:17). En dit het gebeur. ʼn Hele paar jaar later is Juda in ballingskap na Babel weggevoer. Wie nie hoor nie, moet maar voel!
Dis tragies as mense hulself gelowiges noem, ywerig kerktoe gaan, bedrywig met sake van die kerk is, maar niks in hulle huis getuig van die teenwoordigheid van Christus nie. Hulle kon net sowel kerklos en ongelowiges gewees het, Niks in daardie huis getuig van gelowiges wat daar bly nie. Wat gaan werklik met hul siele aan?
Wat sien mense in jou huis? Kersfees is op hande en jy gaan waarskynlik gaste ontvang. Miskien is daar onder hulle mense wat geen geloofsekerheid het nie en net so verlore as die Babiloniërs wat by Hiskia aangekom het. Wat gaan hulle in jou huis sien? Wat gaan jy vir hulle wys? Jou besittings of gaan hulle iets van jou geloof in Jesus hoor en sy teenwoordigheid in jou huis bemerk?
Jou huishouding getuig of verloën Jesus: “Maar elkeen wat My verloën voor die mense, hom sal Ek ook verloën voor my Vader wat in die hemele is” (Mt.10:33). As ons verdra, sal ons met Hom regeer. As ons Hom verloën, sal Hy ons ook verloën(2 Tim.2:12).
Hoe lyk jou huis? Kan mense sien dat Christus die onsigbare hoof daarvan is? Of het Hy nog nooit daar gewoon nie?
Mag elke huishouding hierdie Kersfees van ‘n inwonende Jesus getuig!