Gedagtes vir elke dag
Of lees almal by Gedagtes vir elke dag
Jy moet ook nie let op al die woorde wat die mense spreek nie, sodat jy nie hoor dat jou dienaar jou vloek nie; want jou eie hart weet ook van baie gevalle dat jy self ook ander gevloek het – Prediker 7:21-22
DIE GOEIE TYDING
Ds Andrè vd Berg
“En die engel sê vir hulle: Moenie vrees nie, want kyk, ek bring julle ’n goeie tyding van groot blydskap wat vir die hele volk sal wees, dat vir julle vandag in die stad van Dawid gebore is, die Saligmaker wat Christus, die Here is” (Luk.2:10,11)
Hy is uit ’n onbeduidende jongmeisie in ’n klein dorpie gebore en het in ’n ander dorpie grootgeword waar hy as timmerman vir sy pa gewerk het. Toe Hy 30 jaar oud was, het Hy vir drie jaar as prediker gereis, nooit ’n boek geskryf, ’n huis gekoop of ’n gesin gehad nie. Hy het ook nie ver gereis of geloofsbriewe verkry soos baie van die reisigers van sy tyd nie.
Op 33 jaar het sy eie volksgenote teen Hom in opstand gekom en sy vriende weggehardloop. Een het Hom selfs vir geld verraai. Daarna is Hy aan die gereg oorgelewer, aan ’n spotverhoor onderwerp, ter dood veroordeel en tussen twee misdadigers gekruisig. Terwyl Hy doodgebloei het, het sy laksmanne die lot oor sy enigste aardse besitting gewerp - sy klere. Ná sy dood is Hy in ’n geleende graf ter ruste gelê omdat iemand Hom jammer gekry het.
Na reg moes die geskiedenis oor hierdie Man geswyg het. Desondanks is Hy na 2000 jaar steeds die sentrale figuur in die wêreldgeskiedenis. Van al die konings wat al regeer en generaals wat roemryke oorwinnings behaal het, het geen een die geskiedenis so beïnvloed soos hierdie Man nie. Dis van sy geboorte dat die engel op Kersnag melding gemaak en dit ’n groot tyding genoem het. Jesus Christus, onse Here!
Hy was onteenseglik die invloedrykste persoon wat ooit op die aarde geleef het. Jesus het die wêreld vir altyd verander. Let op die tydberekening. Datums word as voor of na Christus aangedui. Daarbenewens is meer boeke oor Hom as oor enige iemand anders geskryf.
Die wêreld vóór Christus het baie anders as die een ná Hom gelyk. Vóór Hom was dit sonder hospitale, welsynsorganisasies of eerbied vir die lewe. Hospitale is ’n skepping van die Christendom. Daarom is ’n kruis die helende simbool van ’n hospitaal (Rooikruis). Die verpleegberoep is deur Christene soos Florence Nightingale uit toewyding aan Christus op die been gebring.
Christene soos dr. Louis Pasteur was verantwoordelik vir groot vooruitgang op mediese gebied. Sy ontdekking van penisillien het miljoene lewens gered.Welsynswerk is ook ’n Christelike skepping. Vóór Christus was welwillendheid teenoor vreemdelinge basies onbekend. Jesus se leer en voorbeeld het mense tot dade van welwillendheid, barmhartigheid en selfopoffering aangewakker.
Vóór die koms van die Christendom het elke feitlik elke kultuur slawerny bedryf en mense geoffer, veral kinders. Die verbranding van ’n weduwee saam met haar oorlede man op ’n begrafnisstapel was algemeen in die Hindoe tradisie totdat die sendeling William Carey in Indië aangekom en dit beëindig het.
Slawerny is deur die optrede van Christene soos William Wilberforce gestaak. Ja, eerbied vir die lewe en vryheid is die vrug van Christendom. Mense wat aborsie, genadedood, prostitusie en gruwels soos homoseksualisme voorstaan, wil die heidendom laat herleef!
Die wêreld sal Jesus se positiewe invloed op die mensdom nooit ten volle begryp nie. Alles wat vir ons kosbaar is, van die opvoedkunde, openbare gesondheid tot ekonomiese vryheid, is na die geestelik-kulturele omwenteling wat by Jesus se geboorte begin het, terug te speur.
Die Christendom het onteenseglik aan die moderne wetenskap beslag gegee. Die wetenskap-rewolusie het met die Hervorming begin waarna elke hoofvertakking van die wetenskap deur gelowiges ontwikkel is. So ook die opvoedkunde.
Wie het die meeste tale op skrif gestel? Christen-sendelinge. Die Christendom was ook die grootste dryfveer agter die lees-en-skryfkuns. Daarom is die Bybel die mees vertaalde boek ter wêreld.
Jesus was ongetwyfeld die grootste Leermeester van alle tye. Sy leer en invloed het die ontwikkeling van die opvoedkunde wêreldwyd beïnvloed. Sy laaste opdrag was dan ook: “Gaan dan heen, maak dissipels van al die nasies en leer hulle om alles te onderhou wat Ek julle beveel het” (Mt.28:19).
Van die begin af het Christene skole gestig waarin beide geslagte onderrig geniet het. Die ou Grieke en Romeine het slegs seuns opgelei. Gevolglik het die Christendom ’n omwenteling in die opvoedkunde veroorsaak. Augustinus het selfs gesê dat Christenvroue beter as heidenmans opgelei is!
Voor Christus was ʼn lewe in die ou wêreld min werd. Gestremde babas is gewoonlik in die veld gelos om te sterf. Die Grieke het blinde babas selfs in die see gegooi! Hoe anders was Jesus se meegevoel met blindes nie! So ook die Christendom.
Die grootste uitvinding in belang van onderrig was ongetwyfeld die drukpers deur Johannes Gutenberg; weereens die vrug van die Christengeloof. Die Bybel was die eerste boek wat gedruk is. Jesus is en bly die sentrale fokuspunt van die geskiedenis. Alles getuig van Hom. Selfs as die Engelse mekaar met ʼn goodbye groet. Dis ʼn afkorting vir God be with ye.
Die Bybel en veral die Tien Gebooie het die wettiese grondslag van die Westerse beskawing gelê. Die heel eerste wet wat oor die bevoegdheid van ’n regering gehandel het, was die Magna Carta. Dis in 1215 deur ’n leraar geskryf wat dit ryklik van Bybeltekste voorsien het.
Die Christendom het eerbied vir die lewe en staatkundige vryheid gekweek, iets wat voor Christus grootliks onbekend was. Die leer van Christus het in die ou wêreld die doodmaak van kinders stopgesit, vrouens vrygemaak, slawerny beëindig, liefdadigheid aangemoedig, hospitale laat oprig, weeshuise op die been gebring en skole laat verrys.
Tydens die Middeleeue het die Christendom biblioteke gebou, kolleges en universiteite opgerig, arbeid veredel en heidene tot inkeer gebring. In die moderne era het die Christendom wetenskap laat ontwikkel, regspleging bevorder asook wonderlike kuns, argitektuur, musiek en literatuur laat ontvou.
Niks het die mensdom die afgelope 2000 jaar meer as die Christendom verryk nie. Geen ander geloof, filosofie, leerstelling, volk of organisasie het die mensdom so ten goede verander soos die Christendom nie. Daarom is Jesus Christus die belangrikste mens was wat ooit op aarde geleef het en die Bybel die wonderlikste boek wat ooit geskryf is.
Jesus het soos ons geword sodat ons soos Hy kan word. Hy is deur die mense verwerp sodat ons deur God aangeneem kan word. Hy was veroordeel sodat ons vry kon word. Hy het gely sodat ons sterk kon word. Hy is gekasty sodat ons genees kon word. Hy is gehaat sodat ons lief kon kry. Hy is gekruisig sodat ons gered kan word. Hy het gesterf sodat ons kan leef. Hy het ter helle neergedaal sodat ons hemel toe kan gaan. Hy het dit wat ons toegekom het, verduur sodat ons dit wat Hom toekom, vandag kan geniet.
Kersfees gaan uitsluitlik om Jesus. In Engels sal ek sê: Jesus is the reason for the season. Kom ons deel in die goeie tyding wat die engel gebring het!